869 ຄອບຄົວ ທີ່ຫຼວງພະບາງຖືກລົດໄຟ-ລາວຈີນ ຊົດເຊີຍແລ້ວ 92,99%

ຂ່າວ: ສີສຸວັນ 

    ສໍາລັບທາງລົດໄຟຊ່ວງຜ່ານ ແຂວງຫຼວງພະບາງ ແມ່ນມີຄວາມຍາວ 80 ກິໂລແມັດ, ກວມ 2 ເມືອງ 1 ນະຄອນມີ: ເມືອງຈອມເພັດ, ເມືອງຊຽງເງິນ ແລະນະຄອນຫຼວງພະບາງ ມາຮອດປະຈຸບັນການຊົດເຊີຍສໍາເລັດເກືອບ 93% ແລ້ວ.

    ທ່ານ ເຂັມຄໍາ ພົງສະຫວັດ ຫົວໜ້າຫ້ອງການປະສານງານໂຄງການກໍ່ສ້າງທາງລົດໄຟ-ລາວຈີນ ປະຈຳແຂວງຫຼວງພະບາງໄດ້ລາຍງານໃຫ້ນັກຂ່າວພວກເຮົາໃນວັນທີ 9 ກັນຍານີ້ຮູ້ວ່າ: ສໍາລັບ 2ເມືອງ 1 ນະຄອນ ກວມທັງໝົດ 28 ບ້ານ, 869 ຄອບຄົວທີ່ຖືກຜົນກະທົບຕໍ່ໂຄງການກໍ່ສ້າງທາງລົດໄຟມູນຄ່າສົດເຊີຍ 120,03 ຕື້ກີບ, ໃນນີ້,ຢູ່ໃນແລວທາງລົດໄຟ ແລະທີ່ດິນບ້ານຈັດສັນມີ 532 ຄອບຄົວ,ມູນຄ່າ 100,97 ຕື້ກີບ ແລະຢູ່ນອກແລວທາງລົດໄຟມີ 337 ຄອບຄົວ ມູນຄ່າ 19,05 ຕື້ກີບ.

   ໃນທັງໝົດນັ້ນໄດ້ຮັບງົບປະມານຊົດເຊີຍຈາກຄະນະຄຸ້ມຄອງໂຄງການແລ້ວຈໍານວນ 10 ງວດ ລວມມູນຄ່າ 118,1 ຕື້ກີບ ເປັນບ້ວງບໍລິສັດທາງລົດໄຟ ຈໍານວນ 2 ງວດ ມູນຄ່າ 29,69 ຕື້ກີບ ແລະບ້ວງງົບປະມານລົງທຶນຂອງລັດ ຈໍານວນ 8 ງວດ ມູນຄ່າ 88,41 ຕື້ກີບ ແລະໄດ້ເບີກຈ່າຍເງິນຄ່າຊົດເຊີຍໃຫ້ແກ່ປະຊາຊົນທີ່ຖືກຜົນກະທົບໃນແລວທາງ, ສະຖານີ ແລະບ້ານຈັດສັນ ຈໍານວນ 24 ບ້ານ ລວມມີ 497 ຄອບຄົວ, ມູນຄ່າ 93,9 ຕື້ກີບ,ມາຮອດປະຈຸບັນແມ່ນປະຕິບັດໄດ້ 92,99% ແລ້ວ.

   ທ່ານໃຫ້ຮູ້ຕື່ມວ່າ: ປະຈຸບັນພວມລົງມືກໍ່ສ້າງບ້ານຈັດສັນໃໝ່ຄື: ບ້ານບວມອໍ້ ປະຕິບັດໄດ້ 25% ແລະຈະໃຫ້ສຳເລັດໃນທ້າຍເດືອນພະຈິກ 2021 ນີ້ ແລະໄດ້ສໍາເລັດການມອບ-ຮັບຖາວອນໂຄງການກໍ່ສ້າງຫ້ອງຮຽນອານຸບານ ແລະໂຮງຮຽນປະຖົມສວນຫຼວງເມືອງຊຽງເງິນ.

แชร์