ລາວຟອດ ມອບທຶນຊ່ວຍໂຄງການວຽງຈັນສີຂຽວ

   ໃນວັນທີ່ 9 ກັນຍາ 2021 ທີ່ນະຄອນຫຼວງວຽງຈັນ ລາວຟອດຊີຕີ ວຽງຈັນ ໄດ້ຈັດພິທີມອບທຶນຊ່ວຍເຫຼື່ອໃຫ້ແກ່ອົງການວຽງຈັນສີຂຽວໃນຈຳນວນເງີນ 5.000 ໂດລາສະຫະລັດ ໂດຍເປັນກຽດມອບ-ຮັບລະຫວ່າງທ່ານ ເວນ ເມັກອິນທອດ ຜູ້ບໍລະຫານຈັດການທົ່ວໄປບໍລິສັດ ລາວຟອດຊີຕີ ຈຳກັດ ແລະທ່ານ ແຊຈ໌ ດູຊານຕູຊ ຜູ້ບໍລິຫານໂຄງ ການວຽງຈັນສີຂຽວ ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ເວນ ເມັກອິນທອດ ໃຫ້ຮູ້ວ່າ: ໃນແຕ່ລະປີທີ່ຜ່ານມາທາງບໍລິສັດລາວ ຟອດຊີຕີ ໄດ້ໃຫ້ການຊ່ວຍເຫຼື່ອຕະຫຼອດມາເພື່ອເອົາໃຈໃສ່ໃນການຮັກສາສິ່ງແວດລ້ອມໃຫ້ສະອາດ ແລະລົນນະລົງທຸກຄົນຮ່ວມກັນຮັກສາພາວາໂລກຮ້ອນໄປດ້ວຍກັນໃນປີທີ່ຜ່ານມາ.

   ບໍລິສັດຟອດມໍເຕີຄອມປານີ ແລະບໍລິສັດລາວຟອດຊີຕີໄດ້ເລີ່ມການມອບທຶນຊ່ວຍເຫຼືອນັບຕັ້ງແຕ່ປີ 2012–2019 ໃນນີ້ປີ 2012 ໄດ້ເຮັດໂຄງການປູກຜັກຂອງໂຮງຮຽນທົ່ວນະຄອນຫຼວງ ຊຶ່ງໄດ້ມອບທຶນ 20 ພັນໂດລາ, ປີ 2013 ໄດ້ມອບທຶນສ້າງໂຮງຮຽນບ້ານຊໍ້ ຈຳນວນ 20 ພັນໂດລາ, ປີ 2014 ໄດ້ມອບທຶນໃຫ້ແກ່ອົງການ LIRE ເພື່ອຝຶກອົບຮົບໜ່ວຍກູ້ໄພ້ 1623 ມູນຄ່າ 2 ພັນໂດລາ, ປີ 2015 ໄດ້ມອບທຶນການສຶກສາ ໃຫ້ແກ່ໂຮງຮຽນ LANITH ມູນຄ່າ 20 ພັນໂດລາ, ປີ 2016 ໄດ້ມອບທຶນສະໜັບສະໜູນໃຫ້ແກ່ອົງການສຸພານິມິດສາກົນປະຈຳລາວ ມູນຄ່າ 25 ພັນໂດລາ, ປີ 2017 ໄດ້ມອບທຶນໃຫ້ແກ່ອົງການກົງຟຣູອ່ອງ ເພື່ອອານຸລັກປົກປັກຮັກສາສິ່ງແວດລ້ອມໃນລາວ ມູນຄ່າ 25 ພັນໂດລາ,

   ປີ 2018 ໄດ້ມອບທຶນໃຫ້ແກ່ອົງການເພື່ອສຸຂະພາບ ແລະຫຼຸດຜ່ອນຄວາມທຸກຍາກມູນຄ່າ 25 ພັນໂດລາ ແລະ ປີ 2019 ໄດ້ມອບທຶນໃຫ້ແກ່ອົງການເພື່ອມະນຸດສະທໍາ ແລະການມີສ່ວນຮ່ວມ ຈໍານວນ 20 ພັນໂດລາ ແລະອົງການວຽງຈັນສີຂຽວ ຈໍານວນ 5 ພັນໂດລາ, ລວມມູນຄ່າ 25 ພັນໂດລາ, ມາຮອດ 2021 ນີ້ຟອດມໍເຕີຄອມປານີ ແລະບໍລິສັດລາວຟອດຊີຕີກໍໄດ້ສືບຕໍ່ມອບທຶນການຊ່ວຍເຫຼືອໃຫ້ອົງການວຽງຈັນສີຂຽວ ຈຳນວນ 5 ພັນໂດລາ ຊຶ່ງຈະໝູນໃຊ້ເງິນທຶນໃນການສະໜອງໃນການພັດທະນາເຂດຊຸມຊົນໃຫ້ມີຄວາມສະອາດ ແລະກວດກາເກັບກູ້ລະເບີດທີ່ບໍ່ທັນແຕກໃນແຂວງຫົວພັນປະເທດລາວ.

   ແຕ່ເຖິງຢ່າງໃດກໍ່ດີໃນຊ່ວງທີ່ມີການລະບາດຂອງເຊື້ອພະຍາດໂຄວິດນີ້ທາງ ບໍລິສັດ ລາວຟອດຊີຕີ ຍັງໄດ້ແບ່ງງົບປະມານຈຳນວກໜຶ່ງເພື່ອຊ່ວຍເຫຼື່ອຊຸກຍູ້ອ້າຍນ້ອງທະຫານ, ຕຳຫຼວດ ແລະແພດໝໍທີ່ເປັນແນວໜ້າຕໍ່ສູ້ກັບພະຍາດເພື່ອປະຊາຊົນທຸກຄົນໃນການຊ່ວຍເຫຼື່ອດັ່ງກ່າວພວກເຮົາໄດ້ມອບເຄື່ອງບໍລິໂພກອຸປະໂພກເຊັ່ນ: ອາຫານ, ເຄື່ອງດື່ມ ແລະລວມໄປເຖິງພາຫະນະໃຫ້ນຳໃຊ້ເຂົ້າໃນການຮັບມືກັບພະຍາດໂຄວິດທີ່ກຳລັງລະບາດໃນຕອນນີ້ ແລະພວກເຮົາຍັງຈະສຶບຕໍ່ປະຕິບັດ ແລະຊ່ວຍເຫຼືອຊຸກຍູ້ໃຫ້ກັບທາງໜ່ວຍງານທີ່ເປັນແນວໜ້າຂອງເຮົາ.

แชร์