ຄະນະສະເພາະກິດແຂວງຫຼວງພະບາງ ປະຊຸມດ່ວນ ຫຼັງກວດພົບຜູ້ຕິດໂຄວິດໃນຊຸມຊົນ 34 ຄົນ

ຂ່າວ:ສີສຸວັນ

    ທ່ານ ບຸນເລື່ອມ ມະນີວົງ ຫົວຫນ້າຄະນະສະເພາະກິດຄວບຄຸມການລະບາດໂຄວິດຂັ້ນແຂວງຫລວງພະບາງໄດ້ປະຊຸມຢ່າງຮີບດ່ວນຮ່ວມກັບຄະນະສະເພາະກິດໃນວັນທີ 11 ກັນຍາ 2021 ຫລັງຜົນກວດມີຜູ້ຕິດເຊື້ອໃນຊຸມຊົນ 34 ຄົນ, ແນໃສ່ປຶກສາຫາລືຮັບມືກັບການລະບາດຊຸມຊົນໃນຄັ້ງນີ້, ພ້ອມກັນເລັ່ງຊອກຫາທາມລາຍຜູ້ໃກ້ສິດສ່ຽງຕໍ່ການຕິດເຊື້ອເຂົ້າສູນກັກກັນໂດຍໄວ.

 ພ້ອມນີ້ ທ່ານ ບຸນເລື່ອມ ມະນີວົງ ຍັງໄດ້ຊີ້ນຳໃຫ້ເພີ່ມມາດຕະການຄວບຄຸມການແຜ່ລະບາດຂອງພະຍາດໂຄວິດ-19 ຢູ່ແຂວງຫຼວງພະບາງ, ໂດຍສຸມໃສ່ຂອດບໍລິການຈັດການຢູ່ສູນກັກກັນ, ກວດກາກັ່ນຕອງ, ປັບປຸງບຸກຄະລາກອນຜູ້ຮັບຜິດຊອບໃນສູນ, ປັບປຸງລະບຽບການ, ການຈັດສັນງົບປະມານສຳລັບຜູ້ກັກກັນ, ການແຕ່ງຕັ້ງບຸກຄະລາກອນຊ່ວຍວຽກ,ການກະກຽມໂຮງໝໍພາກສະໜາມເມືອງນໍ້າບາກ ແລະສະໜາມບິນເກົ່າ, ພົວພັນກັບສູນກາງເພື່ອຂໍໂຈະການນຳເຂົ້າແຮງງານຊົ່ວຄາວເພື່ອກຽມພື້ນທີ່ຮອງຮັບ, ໃຫ້ 2 ກຳລັງ ປກສ, ປກຊ ເດັດຂາດໃນການກວດກາຄົນເຂົ້າ-ອອກ, ໃຫ້ເພີ່ມການໂຄສະນາຊີ້ແຈງຜ່ານທາງໂທລະພາບ ແລະສື່ຕ່າງໆ ເປັນປົກກະຕິ ແລະໃຫ້ມີການປະຈຳການຫ້ອງສະເພາະກິດເພື່ອລາຍງານສ່ອງແສງ, ການຈັດຊື້ຕຽງນອນເພີ່ມເຕີມ, ໃຫ້ເຈົ້າໜ້າທີ່ພະນັກງານປະຈຳສູນເຂັ້ມງວດປ້ອງກັນຕົນເອງ, ຈຳກັດຜູ້ນຳສົ່ງອາຫານໃຫ້ຜູ້ທີ່ຖືກກັກກັນຢູ່ສູນ ແລະຈຳກັດການເດີນທາງເຂົ້າ-ອອກຖ້າບໍ່ຈຳເປັນ.


   ຄຽງຄູ່ກັນນັ້ນບັນຫາທີ່ສໍາຄັນຕ້ອງຄົ້ນຄວ້າອັນຮີບດ່ວນກ່ຽວກັບການເຝົ້າລະວັງຕອບໂຕ້ບັນຫາທີ່ເກີດມີການຕິດເຊື້ອໂຄວິດ-19 ຢູ່ຊຸມຊົນເປັນຈໍານວນຫລາຍ, ຫ້າມບໍ່ໃຫ້ເດີນທາງໄປຕ່າງແຂວງເດັດຂາດ, ເລັ່ງໃສ່ການກວດກາຊອກຫາທາມລາຍຜູ້ທີ່ໃກ້ສິດສໍາພັດກັບຜູ້ຕິດເຊື້ອເປັນບູລິດມະສິດຮິບດ່ວນສໍາຄັນ, ສຸມໃສ່ການປິ່ນປົວຜູ້ທີ່ຕິດເຊື້ອ, ກະກຽມທິມງານຄະນະສະເພາະກິດຂັ້ນແຂວງ, ທີມງານແພດໝໍໂຮງໝໍແຂວງລົງຊ່ວຍ, ການກະກຽມສະຖານທີ່ຮອງຮັບຜູ້ທີ່ສໍາພັດໃກ້ສິດ, ວາງວຽກງານຄວບຄຸມຮອບດ້ານເພື່ອກະກຽມຮັບມືກັບການແຜ່ລະບາດໃນຮອບນີ້, ໃຫ້ເພີ່ມມາດຕະການປະຕິບັດຄໍາສັ່ງຂອງຄະນະສະເພາະຂັ້ນສູນກາງ ແລະຂັ້ນແຂວງ, ຂັ້ນເມືອງ, ຂັ້ນບ້ານ,ເພື່ອຄວບຄຸມໃຫ້ຫຼຸດລົງບໍ່ໃຫ້ແຜ່ລາມອອກເປັນວົງກວ້າງ.
   ສໍາລັບແຂວງຫລວງພະບາງຕິດເຊື້ອໃນວັນທີ 11 ກັນຍາ ທັງໝົດ 37 ຄົນ,ນໍາເຂົ້າ 3 ຄົນ, ຊຸມຊົນ 34 ຄົນ ຊື່ງມາຈາກ 06 ກຸ່ມຄື: ພະຍາບານຈາກສຸກສາລາ ນະຄອນຫລວງພະບາງ ມີ 01 ຄົນ, ເຂົ້າປະຈໍາການຢູ່ສູນຫໍຄອຍສະໜາມບິນ ແລະຈາກນັ້ນຍ້າຍມາປະຈໍາການຢູ່ສູນໂຮງຮຽນສ້າງແພດ; 01 ຄົນ ພະນັກງານຕໍາຫລວດປະຈໍາການຢູ່ສູນຫ້ວຍມາວແຕ່ມື້ເປີດສູນຈົນຮອດປະຈຸບັນ; ເມືອງວຽງຄໍາມີ 20 ຄົນ ແມ່ນກໍາມະກອນທີ່ມາຈາກແຂວງວຽງຈັນ ເຮັດວຽກຢູ່ສວນກ້ວຍບ້ານຕັ່ງນ່າຍ, ເມືອງກາສີ ຊື່ງທັງໜົດໄດ້ກັກໂຕຢູ່ສູນໂຮງຮຽນສ້າງແພດ; 04 ຄົນ ແມ່ນກໍາມະກອນເຮັດວຽກຢູ່ສວນຢາງ ບ້ານໜ້ຽງ, ເມືອງວັງວຽງ, ທັງໜົດກັກໂຕຢູ່ສູນເມືອງວຽງຄໍາ; 08 ຄົນ ແມ່ນກໍາມະກອນໂຮງເລື່ອຍ, ເມືອງປາກລາຍ, ແຂວງໄຊຍະບູລີ ແລະທັງໜົດໄດ້ກັກໂຕຢູ່ສູນເມືອງນານ; 02 ຄົນ ແມ່ນອາຊີບແມ່ບ້ານກັບມາແຂວງ ແລ້ວຖືກກັກໂຕຢູ່ສູນ ເມືອງວຽງຄຳ ແລະຜູ້ນື່ງກັກໂຕຢູ່ສູນໂຮງຮຽນແພດ; 02 ຄົນ ແມ່ນອາຊີບເປັນແມ່ເຮືອນ ແລະກໍາມະກອນກໍ່ສ້າງທີ່ໄດ້ໄປເຮັດວຽກຢູ່ເມືອງບຸນເໜຶອ, ແຂວງຜົ້ງສາລີ ແລະທັງໜົດ ກັບມາແຂວງ ແລະຖືກກັກໂຕຢູ່ສູນໂຮງຮຽນສ້າງແພດ.

แชร์