ໂລກ້າຮ່ວມມືກັບ ບີວາຍດີ ເປີດໂຄງການນຳໃຊ້ລົດໄຟຟ້າໃນບໍລິການແທັກຊີຢູ່ໃນລາວ

ບໍລິສັດໂລກ້າ ແລະ ບໍລິສັດ ບີວາຍດີ ລາວ (BYD Laos) ໄດ້ຮ່ວມມືກັນເປີດໂຕໂຄງການນຳໃຊ້ລົດໄຟຟ້າເພື່ອສຶກສາຄົ້ນຄ້ວາຫາຄວາມເປັນໄປໄດ້ໃນການນຳເອົາລົດໄຟຟ້າມານຳໃຊ້ໃນການຂົນສົ່ງໂດຍສານຢູ່ປະເທດລາວ. ຈຸດປະສົງຂອງໂຄງການດັ່ງກ່າວແມ່ນເພື່ອແນໃສ່ການນຳເອົາລົດໄຟຟ້າມາປັບໃຊ້ກັບແທັກຊີຂອງໂລກ້າ ແລະການຂົນສົ່ງ, ເພື່ອເປັນການຫຼຸດຕົ້ນທຶນ ແລະຜົນກະທົບຕໍ່ສິ່ງແວດລ້ອມໃນໄລຍະຍາວ.

 ພິທີເຊັນສັນຍາການຮ່ວມມືໄດ້ຈັດຂຶ້ນໃນວັນທີ 10 ກັນຍາ 2021 ທີ່ສູນລົດບີວາຍດີ ນະຄອນຫຼວງວຽງຈັນ ລະຫວ່າງທ່ານນາງ ແມງໂກ ຫວານ ຜູ້ອໍານວຍການບໍລິສັດບີວາຍດີ ລາວ ແລະທ່ານ ສຸລິໂຍ ວົງດາລາ ຜູ້ອຳນວຍການບໍລິສັດໂລກ້າ, ຊຶ່ງການຮ່ວມມືຂອງທັງສອງຝ່າຍແມ່ນມີເປົ້າໝາຍເປັນຜູ້ລິເລີ່ມພັກດັນ ແລະເພື່ອສະແດງໃຫ້ຜູ້ສ້າງກອບນະໂຍບາຍ ແລະໃຫ້ຜູ້ບໍລິໂພກໄດ້ເຫັນວ່າລົດໄຟຟ້ານັ້ນແທດເໝາະກັບຕະຫຼາດປະເທດລາວ ແລະຕອບໂຈດດັ່ງວິໄສທັດຂອງປະເທດທີ່ວ່າເປັນແບັດເຕີລີຂອງອາຊ່ຽນໃນໂຄງການດັ່ງກ່າວ, ໂລກ້າຢາກໃຫ້ທຸກຄົນນັ້ນໄດ້ເຫັນວ່າໄລຍະທາງທີ່ລົດໄຟຟ້າສາມາດແລ່ນໄດ້ໃນປະຈຸບັນນັ້ນບໍ່ແມ່ນອຸປະສັກເລີຍ, ນອກນັ້ນຍັງຈະຊ່ວຍໃຫ້ຄົນຂັບບໍລິການແທັກຊີໂລກ້າໄດ້ກຳໄລຫຼາຍຂຶ້ນເນື່ອງຈາກຕົ້ນທຶນຂອງລົດໄຟຟ້າຈະຕໍ່າກ່ວາລົດທົ່ວໄປທີ່ໃຊ້ນໍ້າມັນ.

 ທ່ານນາງ ແມງໂກ ຫວານ ກ່າວວ່າ: ລົດ BYD E2 ເປັນລຸ້ນທີ່ຈະໃຊ້ໃນການທົດລອງນຳໃຊ້ໃນໂຄງການດັ່ງກ່າວເຊິ່ງລົດລຸ້ນດັ່ງກ່າວສາມາດແລ່ນໄປໄກໄດ້ເຖິງ 305 ກິໂລແມັດ ຕໍ່ ການສາກໄຟຄັ້ງໜຶ່ງພ້ອມທັງເປັນລົດໄຟຟ້າທີ່ລາຄາເໝາະກັບຕະຫຼາດບ້ານເຮົາທີ່ສຸດໃນຕອນນີ້ຊິ່ງທັງສອງບໍລິສັດໄດ້ຈັດໂຄງການນີ້ຂຶ້ນມາພ້ອມກັບນະໂຍ ບາຍພິເສດຮ່ວມກັນເຊັ່ນ: ຊ່ວຍໃນເລື່ອງການເຂົ້າເຖິງສິນເຊື່ອ, ມີທຶນອຸດໜູນ, ມີສ່ວນຫຼຸດພິເສດ ແລະບໍລິການຫຼັງການຂາຍຈາກບີວາຍດີ.

   ທ່ານ ສຸລິໂຍ ຜູ້ອຳນວຍການບໍລິສັດໂລກ້າ ມີຄໍາເຫັນວ່າ: ຫຼັງຈາກໄດ້ຊື້ລົດໄຟຟ້າມາຂັບເອງ, ກໍບໍ່ຢາກກັບໄປໃຊ້ລົດທີ່ໃສ່ນໍ້າມັນຄືເກົ່າເລີຍເພາະລົດໄຟຟ້າຊ່ວຍປະຢັດໄດ້ຫຼາຍກວ່າລົດໃຊ້ນໍ້າມັນ ແລະກໍຫວັງວ່າຈະຊ່ວຍປະຢັດເງິນໃຫ້ແກ່ຄົນຂັບແທັກຊີຂອງໂລກ້າທີ່ຈະຫັນມາເປັນລົດໄຟຟ້າເພາະລົດ BYD E2 ໃຊ້ເງິນຄ່າໄຟຟ້າປະມານ 45.000ກີບ ໃນການສາກໄຟຈາກ 0-100% (35KWh) ແລະສາມາດເດີນທາງໄດ້ 305 ກິໂລແມັດ. ປະຈຸບັນໂລກ້າໄດ້ກາຍເປັນຜູ້ໃຫ້ບໍລິການຂົນສົ່ງທີ່ໃຫຍ່ທີ່ສຸດຂອງປະເທດລາວເຊິ່ໄດ້ເປີດໃຫ້ບໍລິການແລ້ວຢູ່ 3 ແຂວງຄື: ນະຄອນຫຼວງວຽງຈັນ, ນະຄອນຫຼວງພະບາງ ແລະແຂວງຈຳປາສັກ. ຫຼ້າສຸດ,ບໍລິສັດໂລກ້າກໍຍັງເປັນບໍລິສັດສະຕາດອັບ ແລະທຸລະກິດຂະໜາດນ້ອຍທຳອິດຂອງລາວທີ່ຢູ່ໃນລາຍຊື່ 100 ບໍລິສັດຂອງອາຊີທີ່ໜ້າຈັບຕາ.

แชร์