ພິດໂຄວິດດຶງແຮງງານລາວ 2 ແສນຄົນຄືນຖິ່ນ ລັດເປີດສູນຮັບຊ່ວຍເຫຼືອ

    ລັດຖະບານແຫ່ງ ສປປ ລາວ ເປີດສູນທຳອິດໃຫ້ບໍລິການຂໍ້ມູນສຳລັບຊ່ວຍເຫຼືອແຮງງານລາວທີ່ກັບມາຈາກຕ່າງປະເທດພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ຂະນະທີ່ຮອດເວລານີ້ກະຊວງແຮງງານ ແລະສະຫວັດດີການສັງຄົມເປີດເຜີຍວ່າມີແຮງງານລາວກັບປະເທດແລ້ວ 2 ແສນກວ່າຄົນ.

   ໃນວັນທີ 9 ກັນຍານີ້, ທີ່ເຮືອນຮັບແຂກກະຊວງແຮງງານ ແລະສະຫວັດດີການສັງຄົມ (ຮສສ) ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ ໄດ້ ໃຫ້ຖະແຫຼງຂ່າວເປີດສູນດັ່ງກ່າວຢ່າງເປັນທາງການໂດຍມີບັນດາຈາກຂະແໜງການກ່ຽວຂ້ອງ, ພ້ອມດວ້ຍບັນດາບໍລິສັດ ຈັດຫາງານ, ຫົວໜວ່ຍທຸລະກິດ ແລະ ຕາງໜ້າພາຍໃນກະຊວງ ຮສສ ເຂົ້າຮວ່ມ.

  ທ່ານ ພົງໄຊສັກ ອິນຖາລາດກ່າວວ່າ: ສູນດັ່ງກ່າວຈະເຮັດໜ້າທີ່ໃນການຊອກຫາຂໍ້ມູນຕຳແໜ່ງງານວ່າງນຳບັນດາບໍລິສັດ, ໂຮງຈັກໂຮງງານ, ໂຄງການລົງທຶນລວມໄປເຖິງຄົວເຮືອນເພື່ອເກັບກຳລາຍລະອຽດຕ່າງໆເຊັ່ນ: ເງິນເດືອນ, ສະຫວັດດີການ,ເງືອນໄຂການສະໝັກ ແລະອື່ນໆ ເພື່ອນຳໄປເຜີຍແຜ່ໃຫ້ຜູ້ຊອກວຽກໂດຍສະເພາະແຮງງານທີ່ຢູ່ພາຍໃນສູນຈຳກັດບໍລິເວນ, ເພື່ອຊ່ວຍເຫຼືອໃຫ້ແກ່ເຂົາເຫຼົ່ານັ້ນມີຂໍ້ມູນ ແລະສາມາດກຽມໂຕເພື່ອເຂົ້າສະໝັກ, ສຳພາດ ແລະປະກອບອາຊີບຕາມທັກສະສີມືຂອງຕົນພາຍຫຼັງອອກຈາກສູນຈຳກັດບໍລິເວນດັ່ງກ່າວນັ້ນຢ່າງວ່ອງໄວ ແລະທັນການ.

   ນອກຈາກການເກັບກຳຕຳແໜ່ງງານວ່າງໃຫ້ແກ່ແຮງງານແລ້ວ, ທາງສູນກໍ່ໄດ້ປະສານງານ ຫາ ແຕ່ລະແຂວງເພື່ອເກັບກຳຂໍ້ມູນຊີວະປະຫວັດຜູ້ຕ້ອງການສະໝັກວຽກ, ຜູ້ຕ້ອງການປະກອບອາຊີບອິດສຫຼະ ແລະຜູ້ຕ້ອງການຝຶກສີມືແຮງງານເພື່ອນຳມາສະໜອງໃຫ້ຜູ້ຕ້ອງການແຮງງານສາມາດຕິດຕໍ່, ເລືອກເຟັ້ນຄວາມຕ້ອງການ ຂອງແຮງງານທີ່ຕ້ອງການໂດຍແນ່ໃສ່ແກ້ໄຂບັນຫາການວ່າງງານ ແລະສະພາບຕະຫຼາດແຮງງານໃນປະຈຸບັນ.

   ດັ່ງທີ່ພວກເຮົາຮັບຮູ້ນຳກັນແລ້ວວ່າຈາກການລະບາດຂອງເຊື້ອພະຍາດໂຄວິດ-19 ມີຈຳນວນແຮງງານລາວ 4 ແສນ ຄົນຫວ່າງງານ ແລະທີ່ກັບຈາກຕ່າງປະເທດ ມາຮອດປະຈຸບັນມີຫຼາຍກວ່າ 2 ແສນຄົນ, ແຮງງານລາວທີ່ກັບມາກໍ່ລ້ວນມີປະສົບການເຮັດວຽກໃນຫລາກຫຼາຍຂະແໜງການທັງຂະແຫນງປູກຝັງ, ລ້ຽງສັດ, ການ ປະໂມງ, ອຸດສະຫະກຳປຸງແຕ່ງອາຫານ, ກໍ່ສ້າງ, ການຄ້າຂາຍຍ່ອຍ, ແມ່ບ້ານໃນໂຮງແຮມ ແລະເຮືອນພັກ ແລະອື່ນໆ.

 ຈາກຂໍ້ມູນລາຍງານຫຼ້າສຸດຂອງສູນນັບແຕ່ວັນທີ 30 ສິງຫາ 8 ກັນຍາ 2021 ພະນັກງານຂອງສູນສາມາດປະສານຂໍຂໍ້ມູນໄດ້ 165 ຫົວໜ່ວຍແຮງງານ, ມີ 416 ຕຳແຫນ່ງງານ, ຕ້ອງການແຮງງານ 1.861 ຄົນ; ຂໍ້ມູນທີ່ໄດ້ມານແມ່ນຍັງເປັນສ່ວນນ້ອຍຈາກຂໍ້ມູນທັງໝົດໃນຕະຫລາດແຮງງານຊຶ່ງປາສະຈາກບໍ່ໄດ້ທີ່ຕ້ອງການຄວາມຊ່ວຍເຫຼືອ, ການຮ່ວມມືຈາກສື່ຕ່າງໆທັງພາກລັດ ແລະເອກະຊົນລວມທັງອົງການຈັດຕັ້ງສາກົນໃນການໂຄສະນາປະຊາສຳພັນ, ຮຽກຮ້ອງມາຍັງແຮງງານ, ຮ້າງຮ້ານ, ບໍລິສັດ, ໂຮງຈັກໂຮງງານ, ໂຄງການລົງທຶນນຳໃຊ້ການບໍລິການຂອງສູນຜ່ານທາງເບີໂທສາຍດ່ວນ 1535, Page Face book, Whatsapps, Line ID ເພື່ອເຮັດໃຫ້ສູນດັ່ງກ່າວມີຄວາມເຂັ້ມແຂງ, ໄດ້ມີຂໍ້ມູນສະໜອງໃຫ້ແຕ່ລະຝ່າຍ ແລະພາກສ່ວນຕ່າງໆຢ່າງເປັນປົກກະຕິ.

แชร์