ທນບ ເດີນໜ້າສູ່ຮາກຖານ

ຂ່າວ: ຣັດສະໝີ ດວງສັດຈະ

    ທະນາຄານນະໂຍບາຍ (ທນບ) ຈັດຕັ້ງຂຶ້ນເພື່ອຜັນຂະຫຍາຍແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມຂອງລັດຖະບານໃນການສະໜອງສິນເຊື່ອດອກເບ້ຍຕໍ່າໃຫ້ປະຊາຊົນທີ່ຢູ່ບັນດາເມືອງເປົ້າໝາຍ, ຈຸດສຸມພັດທະນາ ແລະບ້ານ 3 ສ້າງ ທົ່ວປະເທດແນໃສ່ປະກອບສ່ວນປົດປ່ອຍປະຊາຊົນອອກຈາກຄວາມທຸກຍາກກໍ່ຄືສ້າງຄວາມຢູ່ດີມີສຸກ, ຄວາມຈະເລີນສູ່ຕົວເມືອງ ແລະຊົນນະບົດຕາມທິດທາງຂອງພັກ, ລັດວາງອອກໃຫ້ປາກົດຜົນເປັນຈິງຢ່າງບໍ່ຢຸດຢັ້ງ.

   ທ່ານ ວຸດທິ ເລື່ອນວິໄລວົງ ຄະນະພັກທະນາຄານແຫ່ງ ສປປ ລາວ (ທຫລ), ຜູ້ອໍານວຍການ ທນບ ໄດ້ໃຫ້ຮູ້ຜົນການເຄື່ອນໄຫວໃນ 8 ເດືອນປີ 2021 ໂດຍໄດ້ແຫຼ່ງທຶນກູ້ຢືມຈາກ ທຫລ ທີ່ຍອດຍົກມາຕົ້ນປີ 2021ຈໍານວນ 3.412,49 ຕື້ກີບ, ຖອນນຳໃຊ້164,80 ຕື້ກີບ, ຊຳລະຄືນ 225 ຕື້ກີບ, ຮອດທ້າຍເດືອນ 8 ປີ 2021 ມີຍອດເຫຼືອທ້າຍ 3.351,58 ຕື້ກີບ, ສຳລັບປີ 2021 ໄດ້ຮັບອະນຸມັດແຫຼ່ງທຶນທັງໝົດ 331,58 ຕື້ກີບ.

 ການປ່ອຍສິນເຊື່ອ 8 ເດືອນ ມີທັງໝົດ 178,57 ຕື້ກີບ ເທົ່າກັບ 47 % ຂອງແຜນການປີໃນນີ້ປ່ອຍໃຫ້ເມືອງເປົ້າໝາຍທຸກຍາກ 119,63 ຕື້ກີບ, ຈຸດສຸມລັດຖະ ບານແລະທ້ອງຖິ່ນ 16,36 ຕື້ກີບ, ວຽກງານ 3 ສ້າງ 42,31 ຕື້ກີບ; ເກັບຕົ້ນທຶນຄືນໃນ 8 ເດືອນ ປີ 2021 ໄດ້ 61% ຂອງແຜນການປີ. ຍອດສິນເຊື່ອເຮັດໃຫ້ຮອດທ້າຍເດືອນ 08/2021 ມີຍອດເຫຼືອສິນເຊື່ອທັງໝົດ 2.788,04 ຕື້ກີບໃນນີ້ສິນເຊື່ອຢູ່ເມືອງເປົ້າໝາຍ 63%, ຈຸດສຸມລັດຖະບານ-ທ້ອງຖີ່ນ 11%, ບ້ານ 3 ສ້າງ 10 %, ໂຄງການຜະລິດສິນຄ້ານອກເມືອງເປົ້າໝາຍ 15 % ຂອງຍອດສິນເຊື່ອທັງໝົດ;

   ຂະນະດຽວກັນ; ກໍ່ມີດ້ານອ່ອນ ແລະຂໍ້ຄົງຄ້າງເປັນຕົ້ນການຈັດຕັ້ງປະຕິບັດແຜນປະຈຳປີ 2021 ລາຍຮັບ-ລາຍຈ່າຍເຮັດບໍ່ທັນໄດ້ຕາມແຜນກຳນົດໄວ້ເປັນຕົ້ນດ້ານ ລາຍຮັບ; ການຄຸ້ມຄອງບໍລິຫານສິນເຊື່ອບໍ່ໄດ້ຮັບຜົນເທົ່າທີ່ຄວນ, ປະສິດທິຜົນສິນເຊື່ອບໍ່ສູງ, ການປ່ອຍສິນເຊື່ອມີລັກສະນະຊັກຊ້າບໍ່ບັນລຸຕາມແຜນການ, ການສະ ໜອງສິນເຊື່ອໃນຮູບແບບໃໝ່ຜ່ານອົງການຈັດຕັ້ງການເມືອງ-ສັງຄົມ ແລະກອງທຶນບ້ານ (ອກສກ) ຢູ່ບັນດາສາຂາຍັງບໍ່ເອົາໃຈໃສ່ຜັນຂະຫຍາຍ ແລະຈັດຕັ້ງປະຕິບັດ; ການແກ້ໄຂໜີ້ບໍ່ເກີດດອກອອກຜົນ (NPL) ເຮັດບໍ່ທັນໄດ້ດີ ແລະບັນຫາອື່ນໆຈໍານວນໜຶ່ງ.

   ສາເຫດທີ່ພາໃຫ້ມີຂໍ້ຄົງຄ້າງໃນໄລຍະ 8 ເດືອນຜ່ານມາແມ່ນຍ້ອນຂອບເຂດການເຄື່ອນໄຫວສະໜອງສິນເຊື່ອຢູ່ຫ່າງໄກສອກຫຼີກ,ບາງທ້ອງຖິ່ນເຄື່ອນໄຫວໄດ້ພຽງລະດູດຽວ, ສະພາບການແຜ່ລະບາດຂອງພະຍາດໂຄວິດ-19 ເຮັດໃຫ້ການເຄື່ອນໄຫວວຽກງານວິຊາສະເພາະພົບຄວາມຫຍຸ້ງຍາກ, ບໍ່ສາມາດເຄື່ອນໄຫວໄດ້ຢ່າງເຕັມ ທີ່ໃນການເຂົ້າເຖິງປະຊາຊົນ; ການສະໜອງສິນເຊື່ອສ່ວນຫຼາຍບໍ່ທັນມີໂຄງການຈຸດສຸມ,ບາງເຂດຖືກຜົນກະທົບຈາກໄພທຳມະຊາດ-ພະຍາດລະບາດເຮັດໃຫ້ຜົນຜະລິດ ເສຍຫາຍແລະບໍ່ມີລາຍຮັບຊຳລະໜີ້ເງິນກູ້; ດ້ານໜຶ່ງການຕິດຕາມຊຸກຍູ້ການແກ້ໄຂບັນຫາໜີ້ສິນ, ປະກົດການຫຍໍ້ທໍ້ບໍ່ທັນເຂັ້ມແຂງ, ຂາດການຕິດຕາມຢ່າງຕໍ່ເນື່ອງ, ການປະຕິບັດວຽກງານຫຼ້າຊ້າບໍ່ທ່ວງທັນກັບສະພາບການ.

  ແຜນການໃນຕໍ່ໜ້າຈະສືບຕໍ່ສູ້ຊົນປະຕິບັດແຜນທ້າຍປີ 2021 ຄື: ສູ້ຊົນສ້າງລາຍຮັບໃຫ້ໄດ້ 209,65 ຕື້ກີບ, ສູ້ຊົນປະຕິບັດລາຍຈ່າຍຕາມແຜນກໍານົດໄວ້; ບໍລິການຮັບເງິນຝາກໃນ 34 ເມືອງ ທີ່ບໍ່ມີທະນາຄານທຸລະກິດອື່ນຕັ້ງຢູ່ໃຫ້ເປັນຮູບປະທຳ, ສືບຕໍ່ເປັນຕົວແທນການໃຫ້ບໍລິການແກ່ທະນາຄານພັດທະນາລາວ ແລະການບໍລິການວຽກງານຄັງເງິນແຫ່ງຊາດ; ສືບຕໍ່ປ່ອຍສິນເຊື່ອໃນ 4 ເດືອນທ້າຍປີ 2021 ໃຫ້ໄດ້ 201 ຕື້ກີບໃນນີ້ໄລຍະສັ້ນ 17ຕື້ກີບ, ກາງ 62 ຕື້ກີບ, ຍາວ 122 ຕື້ກີບ; ສືບຕໍ່ຊຸກຍູ້, ຕິດຕາມການນຳໃຊ້ເງິນກູ້ເພື່ອສ້າງໃຫ້ໄດ້ໂຄງການພົ້ນເດັ່ນ ແລະຄອບຄົວຕົວແບບໃນການນຳໃຊ້ເງິນກູ້ປະຈຳປີ 2021 ບໍ່ໃຫ້ຫຼຸດ 50 ຄອບຄົວ;ສືບຕໍ່ຂະຫຍາຍການສະໜອງສິນເຊື່ອຜ່ານ ອກສກ ໃຫ້ມີທ່າອ່ຽງເພີ່ມຂຶ້ນ; ສືບຕໍ່ປະສານສົມທົບກັບຂະແໜງການທີ່ກ່ຽວຂ້ອງໂດຍສະເພາະ ທລຍ ເພື່ອຈັດຕັ້ງປ່ອຍສິນເຊື່ອແບບມີສ່ວນຮ່ວມໃນ 23 ເມືອງ ທຸກຍາກທີ່ສຸດໃຫ້ເກີດເປັນຮູບປະທຳ; ສືບຕໍ່ປັບປຸງລະບົບລາຍງານ, ຂໍ້ມູນຂ່າວສານດ້ວຍການພັດທະນາບັນດາເຄື່ອງມືຕ່າງໆ ທີ່ຮັບໃຊ້ໃນວຽກງານໃຫ້ມີຄວາມປອດໄພ ແລະຫັນໄປສູ່ທັນສະໃໝເທື່ອລະກ້າວ.

แชร์