ນາຍົກ ປາໄສເປີດວາງສະແດງສິນຄ້າອາຊຽນ-ຈີນ

   ເຊົ້າວັນທີ 10 ກັນຍາ 2021 ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ, ໄດ້ໃຫ້ກຽດກ່າວຄໍາປາໄສ (ແບບບັນທຶກວິດີໂອ) ຮ່ວມກັບທ່ານ ວາງ ກີຊານ,ຮອງປະທານປະເທດແຫ່ງສາທາລະນະລັດປະຊາຊົນຈີນໃນພິທີເປີດງານວາງສະແດງສິນຄ້າອາຊຽນ-ຈີນ ແລະກອງປະຊຸມສຸດຍອດການຄ້າ-ການລົງທຶນອາຊຽນ-ຈີນ ຄັ້ງທີ 18, ໃນຖານະ ສປປ ລາວ ເປັນປະເທດກິດຕິມະສັກຂອງລັດຖະບານແຫ່ງ ສປ ຈີນ ເປັນ ປີທີ 2 ຕິດຕໍ່ກັນ.

   ງານວາງສະແດງສິນຄ້າ ອາຊຽນ-ຈີນ ຄັ້ງທີ 18 ພາຍໃຕ້ຄຳຂວັນ “ກາລະໂອກາດຮ່ວມກັນຈາກແລວການຮ່ວມມືທາງບົກ-ທາງ ທະເລແບບໃໝ່,ສ້າງຄູ່ຮ່ວມຊະຕາກໍາອາຊຽນຈີນ” ແມ່ນໃນຮູບແບບທາງໄກ ແລະເຂົ້າຮ່ວມກັບທີ່, ຊຶ່ງໄດ້ຈັດຂຶ້ນທ່າມກາງບັນຍາກາດທີ່ອາຊຽນ ແລະ ສປ ຈີນ ສະເຫຼີມສະຫຼອງການພົວພັນຮ່ວມມືຄົບ ຮອບ 30 ປີ. 

 ໃນໂອກາດດັ່ງກ່າວ, ທ່ານນາຍົກລັດຖະມົນຕີໄດ້ມີຄໍາເຫັນບາງຕອນໂດຍໄດ້ເນັ້ນໃຫ້ເຫັນຄວາມສໍາຄັນຂອງງານວາງສະແດງສິນຄ້າອາຊຽນ-ຈີນ ໃນການປະກອບສ່ວນຊຸກຍູ້ການຮ່ວມມືອາຊຽນຈີນໃນໄລຍະຜ່ານມານອກນັ້ນ,ອາຊຽນໄດ້ໃຫ້ຄວາມສຳຄັນຕໍ່ການຫຼຸດຜ່ອນຄວາມແຕກໂຕນດ້ານການພັດທະນາ ແລະການເຊື່ອມຈອດພາຍໃນອາຊຽນ ແລະລະຫວ່າງອາຊຽນກັບພາກພື້ນອື່ນ, ໂດຍສະເພາະທ່າແຮງທີ່ມີຢູ່ພາຍໃນ ແລະພາຍນອກເພື່ອຈັດຕັ້ງປະຕິບັດຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ IV ແລະແຜນແມ່ບົດເພື່ອການເຊື່ອມຈອດອາຊຽນ 2025 ໃຫ້ປະກົດຜົນເປັນຈິງ, ຊຶ່ງໃນຕົວຈິງແມ່ນຕ້ອງການການຊ່ວຍເຫຼືອຈາກປະເທດຕ່າງໆ, ໂດຍສະເພາະ ສປ ຈີນ ທາງດ້ານວິຊາການ ແລະທຶນຮອນຕ່າງໆ.

   ພິເສດ, ສປປ ລາວ ຍັງໄດ້ເປັນເຈົ້າພາບຮ່ວມກອງປະຊຸມໂຕະມົນພົບປະລະຫວ່າງການນໍາຂອງ ສປປ ລາວ ແລະນັກທຸລະກິດຈີນ, ຊຶ່ງເປັນກອງປະຊຸມປິ່ນອ້ອມກອງ ປະຊຸມສຸດຍອດການຄ້າ-ການລົງທຶນ ອາຊຽນ-ຈີນ ຄັ້ງທີ 18 ນອກນັ້ນ, ສປ ລາວ ຍັງໄດ້ເປີດຮ້ານວາງສະແດງແຫ່ງຊາດລາວ ແລະ ຫຸ່ນຈໍາລອງເມືອງແຫ່ງສະເໜ່ ນະຄອນໄກສອນ ພົມວິຫານ ອີກດ້ວຍ.

   ປີ 2021 ຍັງເປັນປີແຫ່ງປະຫວັດສາດສະເຫລີມສະຫຼອງການພົວພັນຮ່ວມມື ລາວ-ຈີນ ຄົບຮອບ 60 ປີ ກໍ່ຄືປີມິດຕະພາບລາວ-ຈີນ. ໃນນີ້, ໂຄງການທາງລົດໄຟ ລາວ -ຈີນ ເປັນໂຄງການສັນຍາລັກໜຶ່ງ ພາຍໃຕ້ຂໍ້ລິເລີ່ມໜຶ່ງແລວໜຶ່ງເສັ້ນທາງເຊິ່ງເປັນນິມິດໝາຍໃໝ່ແຫ່ງມູນເຊື້ອການພົວພັນຍຸດທະສາດຮອບດ້ານຕາມທິດ 4 ດີ ແລະການເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ໃນຍຸກສະໄໝໃໝ່ທີ່ໝັ້ນຄົງທະນົງແກ່ນ, ຊຶ່ງຄາດວ່າໂຄງການທາງລົດ ໄຟລາວ-ຈີນ ດັ່ງກ່າວຈະເປີດນໍາໃຊ້ຢ່າງເປັນທາງການໃນວັນຊາດທີ 2 ທັນວາ 2021 ຂອງ ສປປ ລາວ.

แชร์