ຕາປູກາຊ້າງຄູ່ຖືກກະທົບໂຄວິດໜັກຂໍລັດຊ່ວຍ 2 ບັນຫາ

ໂດຍ: ໂພທິລາດ 

   ຍ້ອນພິດໂຄວິດ-19 ລະບາດ ແກ່ເວລາຍາວນານເຮັດໃຫ້ຫຼາຍຂະແໜງການຕ້ອງປະເຊີນກັບບັນຫາວິກິດເສດຖະກິດຝຶດ ແລະມີຫຼາຍໂຮງງານໄດ້ປິດກິດຈະການໄປສ່ວນໂຮງງານຜະລິດຕະປູແສງເດືອນກາຊ້າງຄູ່ທີ່ແຂວງຈຳປາສັກຍອມຮັບວ່າໄດ້ຮັບຜົນກະທົບໜັກເຮັດໃຫ້ຍອດຈໍາໜ່າຍຫຼຸດລົງສູງເຖິງ 80% ແຕ່ຜູ້ປະກອບການຍັງໃຈສູ້ຜະລິດຕໍ່ເພື່ອຕອບສະໜອງໃຫ້ກັບລູກຄ້າປະຈໍາ ແລະເພື່ອປະຄັບປະຄອງການເປັນຢູ່ຂອງພະນັກງານໄປນຳ.

    ທ່ານ ຫົງທອງ ວັນນະລັດສະໝີ ຜູ້ອໍານວຍການໂຮງງານຜະລິດຕະປູ ແສງເດືອນ ກາຊ້າງຄູ່ ເມືອງບາຈຽງຈະເລີນສຸກ ແຂວງຈໍາປາສັກ, ໄດ້ເປີດເຜີຍຕໍ່ສື່ຂ່າວໜັງ ສືພິມເສດຖະກິດ-ສັງຄົມ ເມື່ອບໍ່ດົນມານີ້ໃຫ້ຮູ້ວ່າ: ບັນຫາການແຜ່ລະບາດຂອງເຊື້ອພະຍາດໂຄວິດ-19 ແມ່ນໄດ້ສົ່ງຜົນກະທົບຢ່າງໜັກໜ່ວງຕໍ່ການຜະລິດ ແລະຈໍາໜ່າຍຂອງໂຮງງານພວກເຮົາເຮັດໃຫ້ການສັ່ງຊື້ຂອງລູກຄ້າຕ່າງແຂວງນ້ອຍລົງ ແລະລູກຄ້າພາຍໃນກໍ່ຫຼຸດລົງເຊັ່ນດຽວກັນ.

   ໃນປີ 2020 ຜ່ານມາພວກເຮົາສາມາດຈໍາໜ່າຍເຫຼັກຕະປູໄດ້ທັງໝົດ 1.500 ໂຕນ ແຕ່ຕົກມາໃນປີນີ້ກໍ່ຄື 8 ເດືອນຜ່ານມາສາມາດຈໍາໜ່າຍໄດ້ພຽງ 350 ໂຕນ ແລະ 3-4 ເດືອນທີ່ຍັງເຫຼືອຄາດວ່າຈໍາໜ່າຍໄດ້ຫຼາຍສຸດບໍ່ເກີນ 200 ໂຕນ, ສະນັ້ນຈາກຜົນກະທົບດັ່ງກ່າວຈຶ່ງເຮັດໃຫ້ຍອດຈໍາໜ່າຍຂອງພວກເຮົາຫຼຸດລົງເຖີງ 80%, ຊຶ່ງເປັນຜົນກະທົບທີ່ໜັກ ແລະບໍ່ເຄີຍມີມາກ່ອນ.

  ຜູ້ອໍານວຍການກ່າວຕື່ມວ່າ: ສາເຫດຫຼັກທີ່ເຮັດໃຫ້ຍອດຈໍາໜ່າຍຫຼຸດລົງແມ່ນເນື່ອງມາຈາກໂຄວິດແກ່ຍາວມີການລ໊ອກດາວເລື້ອຍໆເຮັດໃຫ້ການທໍາມາຫາກີນຄ້າຂາຍຂອງສັງຄົມບໍ່ປົກກະຕິ, ການຂົນສົ່ງສີນຄ້າລະຫວ່າງແຂວງຕໍ່ແຂວງໄດ້ຖຶກຢຸດສະຫງັກເຮັດໃຫ້ລູກຄ້າປະຈໍາທີ່ຊື້ໄປຈໍາໜ່າຍຕໍ່ບໍ່ສາມາດສັ່ງຊື້ໄດ້.

 ອີກບັນຫາໜຶ່ງການຕອບສະໜອງດ້ານວັດຖຸດີບຈາກຕ່າງປະເທດຂາດເຂີນ, ປະຈຸບັນອາໃສວັດຖຸດີບພາຍໃນແມ່ນຍັງບໍ່ພຽງພໍເຊັ່ນ: ເຫຼັກ, ແກັດເຈ້ຍແມ່ນຢູ່ໃນພາວະຂາດແຄນ, ດັ່ງນັ້ນປະຈຸບັນໂຮງງານຈຶ່ງໄດ້ຫຼຸດກໍາລັງການຜະລິດລົງຈາກເດີມ 6 ວັນຕໍ່ອາທິດມາເປັນ 3 ວັນຕໍ່ອາທິດເພື່ອປະຄອງກິດຈະການໄປກ່ອນທັງການເປັນຢູ່ຂອງພະນັກງານ, ກໍາມະກອນພາຍໃນໂຮງງານ.

   ຢ່າງໃດກໍ່ຕາມທ່ານຜູ້ອໍານວຍການຢໍ້າວ່າ: ນອກຈາກໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19 ທາງໂຮງງານຍັງໄດ້ຮັບຜົນກະທົບຈາກການກໍ່ສ້າງໂຮງງານຜະລິດຕະປູຂອງນັກລົງທຶນຈາກປະເທດພາຍຫຼັງທີ່ອໍານາດການປົກຄອງແຂວງໄດ້ມີການອະນຸມັດໃຫ້ກໍ່ສ້າງຊຶ່ງປະຈຸບັນໂຮງງານດັ່ງກ່າວໄດ້ມີການອັດຮ່າຍໃສ່ແກັດທີ່ມີນໍ້າໜັກຫຼຸດຂອງໂຮງງານເກີດມີຫາງສຽງທີ່ບໍ່ດີຕໍ່ຜູ້ປະກອບການພາຍໃນ, ສະນັ້ນຈຶ່ງຮຽກຮ້ອງເຖິງຂະແໜງການທີ່ກ່ຽວຂອງລົງຕິດຕາມ ແລະກວດກາແກ້ບັນຫາດັ່ງກ່າວ ແລະປະຈຸບັນຜູ້ປະກອບການພາຍໃນແມ່ນຕົກໃນພາວະເສດຖະບວນການຜະລິດຖ້າລັດຖະບານມີແຫຼ່ງທຶນນະໂຍບາຍ ແລະສົ່ງເສີມຜູ້ປະກອບການພາຍໃນແມ່ນມີຄວາມຈໍາເປັນທຶນເພື່ອໄປພັດທະນາຜະລິດຕະພັນໄໝ່ໆທີ່ສັງຄົມຕ້ອງການ.

แชร์