ລັດຖະມົນຕີກະຊວງ ຮສສ ຊຸກຍູ້ສູນຝຶກວິຊາຊີບຫ້ວຍຫົງ

     ທ່ານ ນາງ ໃບຄຳ ຂັດທິ ຍະລັດຖະມົນຕີກະຊວງແຮງງານ ແລະສະຫວັດດີການສັງຄົມພ້ອມຄະນະ, ໄດ້ລົງຢ້ຽມຢາມ, ຊຸກຍູ້ສູນຝຶກວິຊາຊີບຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ ໃນວັນທີ 7 ກັນຍາ 2021, ຊຶ່ງສູນດັ່ງກ່າວແມ່ນໄດ້ເລີມຈາກສະມາຄົມສົ່ງເສີມວຽກງານໃຫ້ແມ່ຍິງລາວຍີ່ປຸ່ນກັບສະມາຄົມຜູ້ສະໜັບສະໜູນແມ່ຍິງ ແລະເດັກນ້ອຍລາວທີ່ຍີ່ປຸ່ນມາປຸກສ້າງອາຄານສາມຫຼັງໃນປີ 1997 ແລະປີ 1998 ອົງການໄຈກາ (JICA) ໄດ້ເປັນຜູ້ສະໜັບສະໜູນສະໜອງທຶນຝຶກອົບຮົມວິຊາຊີບດັ່ງກ່າວ, ໃນຂັ້ນຕົ້ນແມ່ນໄດ້ເນັ້ນໃສ່ການຝຶກອົບຮົມສິດສອນວິຊາຕໍ່າຫູກພື້ນເມືອງເຊັ່ນ: ການຝຶກອົບຮົມ, ການຍ້ອມສີທຳມະຊາດ, ຕໍ່າຫູກ ແລະວິຊາຕັດຫຍິບ, ຈັດເປັນສອງລະດັບຄື: ລະດັບທີ 1 ສ້າງຄູຝຶກສອນຕໍ່າຫູກແລະຍ້ອມສີ,ລະດັບທີ 2 ສູນຈັດ ຝຶກອົບຮົມດ້ວຍຕົວເອງ ແລະໄດ້ຝຶກໄລຍະສັ້ນ 3 ເດືອນຕໍ່ໜຶ່ງຊຸດ.

    ຜ່ານມາການຮັບເຂົ້າຮຽນແມ່ນຄັ້ງລະ 10 ຫາ 35 ຄົນ, ມາເຖິງປະຈຸບັນມີຜູ້ຜ່ານການຝຶກອົບຮົມຈາກສູນແມ່ນໄດ້ກວ່າ 200 ຄົນ, ສ່ວນໃຫຍ່ຫຼັງຈາກຮຽນຈົບແລ້ວກໍ່ໄດ້ກັບຄືນບ້ານເດີມ, ເພື່ອນໍາໃຊ້ວິຊາຫາລ້ຽງຊີບສ້າງລາຍຮັບໃຫ້ຄອບຄົວ, ບາງຄົນໄດ້ກັບມາຍົກລະດັບອີກ, ຜູ້ມາຮຽນສ່ວນຫຼາຍມາຈາກຕ່າງແຂວງ, ພ້ອມນີ້ພະນັກງານສູນຍັງໄດ້ລົງຢ້ຽມຢາມ ແລະຕິດຕາມເປັນປະຈຳ ແລະໄດ້ລົງໄປຈັດການຝຶກອົບຮົມໃຫ້ພວກເຂົາເຈົ້າ ແລະໃນປີ 2002 ຊະມາຊິກຂອງສູນໄດ້ເປັນຕົວແທນປະເທດລາວເຂົ້າຮ່ວມແຂ່ງຂັນປະກວດສີມືແຮງງານອາຊຽນ ແລະ ໄດ້ຮັບຮາງວັນທີ 6 ແລະສູນຍັງໄດ້ນຳເອົາແຜ່ນແພ, ຜະລິດຕະພັນທີ່ເຮັດດ້ວຍສີມືໄປວາງສະແດງເຜີຍແຜ່ວັດທະນະທຳຂອງລາວນຳອີກ.

   ໂອກາດດັ່ງກ່າວ, ທ່ານ ນາງ ໃບຄຳ ຂັດທິຍະ ຍັງໄດ້ຊຸກຍູ້, ສົ່ງເສີມໃຫ້ສູນຝຶກວິຊາຊີບແມ່ຍິງຫ້ວຍຫົງນຳເອົາບົດຮຽນປະສົບການຕ່າງອັນສໍາຄັນມາຖ່າຍທອດໃຫ້ ກັບແມ່ຍິງລາວໃນເລື່ອງຍອມສິດ້ວຍພືດພັນທີ່ຫາໄດ້ງ່າຍ ແລະບໍ່ແພງ, ສາມາດຜະລິດຜ້າໄໝຄຸນນະພາບໂດຍໃຊ້ລິງລາຍເດີມຈາກຜ້າບູຮານທີ່ຍ້ອມດ້ວຍສີທຳມະຊາດທັງໝົດຊຶ່ງເຫັນວ່າເປັນທີ່ນິຍົມຂອງລູກຄ້າພາຍໃນ ແລະຕ່າງປະເທດ, ພ້ອມທັງສ້າງໂອກາດແກ່ແມ່ຍິງລາວຜູ້ທຸກຍາກ, ດ້ອຍໂອກາດ, ຂາດການສຶກສາໄດ້ເຂົ້າມາຝຶກວິຊາຊີບຕິດໂຕເພື່ອໃຫ້ເຂົ້າເຈົ້າລ້ຽງກຸ້ມຕົນເອງ ແລະຄອບຄົວນຳອີກ.

แชร์