ອພສ ເມືອງລະມານ ມອບອຸປະກອນການຮຽນໃຫ້ໂຮງຮຽນບ້ານລະວີນ້ອຍ

ໂດຍ: ສັນຍາ 

    ໃນວັນທີ 8 ກັນຍາ 2021 ນີ້ ພຣະອາຈານ ກໍລະກັນ ເຊື້ອໂຊດ ຄະນະບໍລິຫານງານປະຈໍາການ ອພສ ເມືອງ, ຫົວໜ້າກໍາມາທິການສາທາລະນຸປະການ ອພສ ເມືອງລະມາມ ແຂວງເຊກອງ ໄດ້ນໍາເອົາປຶ້ມຂຽນ, ບິກ, ສໍດໍາ, ສໍສີ, ປຶ້ມແບບຮຽນ ແລະກະຕໍ້ລວມມູນຄ່າເກືອບ 2 ລ້ານກີບ ມອບໃຫ້ນັກຮຽນໂຮງຮຽນມູນລະປະຖົມບ້ານລະວີນ້ອຍ ເມືອງລະມາມ ຊຶ່ງກ່າວຮັບແມ່ນທ່ານ ນາງ ບິກ ຂັນທະວົງໄຊ ຫົວໜ້າໂຮງຮຽນມູນລະປະຖົມບ້ານລະວີນ້ອຍ ໂດຍມີທ່ານ ໄຊບຸນເອື້ອນ ປະທານກຸ່ມ III ໂຮງຮຽນປະຖົມດອນຈັນ, ພ້ອມດ້ວຍອໍານາດການປົກຄອງບ້ານ ແລະພາກສ່ວນກ່ຽວຂ້ອງເຂົ້າຮ່ວມ. 

    ທ່ານ ນາງ ບິກ ຂັນທະວົງໄຊ ແລະນາຍບ້ານລະວີນ້ອຍໄດ້ກ່າວສະແດງຄວາມຮູ້ບຸນຄຸນ ແລະຂອບອົກຂອບໃຈມາຍັງພຣະອາຈານ ກໍລະກັນ ເຊື້ອໂຊດ ກໍ່ຄືອົງການ ຈັດຕັ້ງພັກ-ລັດ, ບໍລິສັດ ແລະພໍ່ແມ່ປະຊາຊົນທີ່ມີໃຈສັດທາຮ່ວມທຶນຮອນຈັດຊື້ອຸປະກອນກີລາ ແລະອຸປະກອນການຮຽນມາມອບໃຫ້ໂຮງຮຽນບ້ານຂອງພວກຂ້າພະເຈົ້າໃນຄັ້ງນີ້ຊຶ່ງເປັນກໍາລັງແຮງໜຶ່ງໃນການຊ່ວຍເຫຼືອຫຼຸດຜ່ອນຄ່າໃຊ້ຈ່າຍຂອງພໍ່ແມ່ນັກຮຽນໃນການຈັດຊື້ອຸປະກອນຕ່າງໆໃຫ້ແກ່ລູກ, ໃນນາມຕາງໜ້າພະນັກງານ-ຄູອາຈານກໍຄືພໍ່ແມ່ປະຊາຊົນບ້ານລະວີນ້ອຍ ແລະໃນນາມສ່ວນຕົວຂໍອ່ວຍພອນອັນປະເສີດແກ່ພຣະອາຈານກໍລະກັນພ້ອມດ້ວຍອົງການຈັດຕັ້ງທຸກພາກສ່ວນທີ່ໃຫ້ການຊ່ວຍເຫຼືອຈົ່ງມີແຕ່ຄວາມສຸກ ແລະປະສົບຜົນສໍາເລັດໃນໜ້າທີ່ວຽກງານທຸກປະການ.
   ໃນວັນດຽວກັນ ພຣະອາຈານ ກໍລະກັນ ເຊື້ອໂຊດ ຄະນະບໍລິຫານງານປະຈໍາການ ອພສ ເມືອງ, ຫົວໜ້າກໍາມາທິການສາທາລະນຸປະການ ອພສ ເມືອງລະມາມຍັງໄດ້ນໍາເອົານໍ້າດື່ມ, ໝີ່ ແລະຜ້າອັດປາກ-ອັດດັງໄປມອບໃຫ້ພະນັກງານແພດ-ໝໍ ແລະ ເຈົ້າໜ້າທີ່ຢູ່ຈຸດກວດຄັດກອງຄົນເຂົ້າ-ອອກລະຫວ່າງແຂວງເຊກອງ-ແຂວງ ອັດຕະປື (ຈຸດບ້ານເຊນໍ້ານ້ອຍ) ເພື່ອເປັນການປະກອບສ່ວນເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ແລະ ທັງເປັນການ ໃຫ້ກໍາລັງໃຈເຈົ້າໜ້າທີ່ໆປະຕິບັດວຽກງານຢູ່ຈຸດດັ່ງກ່າວ.

แชร์