ອັດຕະປື ຫ້າມນໍາເຂົ້າ-ສົ່ງອອກຜະລິດຕະພັນສັດໃຫຍ່ຊົ່ວຄາວ

    ເພື່ອບໍ່ໃຫ້ການແຜ່ລະບາດຂອງພະຍາດຜິວຫນັງອັກເສບຕິດຕໍ່ຂອງສັດປະເພດງົວ-ຄວາຍ ທີ່ໄດ້ເກີດຂຶ້ນໃນ 5 ຕົວເມືອງ ຂອງແຂວງອັດຕະປື, ທາງດ້ານວິຊາການໄດ້ກວດພົບເຊື້ອພະຍາດຕິດຕໍ່ດັ່ງກ່າວຈາກການເກັບຕົວຢ່າງການສຳຜັດກັບສັດເຈັບທີ່ມາຈາກງົວ-ຄວາຍ ທີ່ສະແດງອາການອອກມາຕາມຜິວໜັງພະຍາດດັ່ງກ່າວໄດ້ແຜ່ລະບາດໃນບັນດາຫລາຍບ້ານຂອງແຕ່ລະເມືອງຊຶ່ງເຮັດໃຫ້ມີສັດຕິດເຊື້ອມີຈຳນວນຫຼາຍມາຮອດປະຈຸບັນທົ່ວແຂວງອັດຕະປືມີສັດລ້ຽງປະເພດງົວຄວາຍທັງໝົດ 65.844 ໂຕ ໃນນັ້ນມີຄວາຍທັງຫມົດ 30.506 ໂຕ ແລະງົວ 35.338 ໂຕ ໄດ້ມີສັດຕິດເຊື້ອ 4.313 ໂຕ ມີງົວ 4.163 ໂຕ ແລະຄວາຍ 150 ໂຕ ປິ່ນປົວດີ ງົວ 389 ໂຕ ສຳລັບຄວາຍຍັງສືບຕໍ່ປິ່ນປົວມີງົວຕາຍ 60 ໂຕ.

   ສະນັ້ນເພື່ອເປັນການສະກັດກັ້ນ ແລະຄວບຄຸມການແຜ່ລະບາດຂອງພະຍາດດັ່ງກ່າວບໍ່ໃຫ້ອອກສູ່ວົງກວ້າງ ແລະຫລຸດຜ່ອນຜົນກະທົບໂດຍທາງກົງ ແລະທາງອ້ອມ ຕໍ່ການລ້ຽງສັດຂອງປະຊາຊົນບັນດາເຜົ່າ ແລະ ຜູ້ປະກອບການຫົວໜ່ວຍທຸລະກິດລ້ຽງສັດຢູ່ແຂວງອັດຕະປືເຈົ້າແຂວງຈື່ງໄດ້ອອກແຈ້ງການຫ້າມເຄື່ອນຍ້າຍນຳເຂົ້າ ສົ່ງອອກ ຫລືສົ່ງຜ່ານຊົ່ວຄາວສັດໃຫຍ່ປະພດງົວຄວາຍ ແລະຜະລິດຕະພັນຈາກສັດໃຫຍ່ລະຫວ່າງປະເທດກັບປະເທດໃກ້ຄຽງລະຫວ່າງແຂວງຕໍ່ແຂວງເມືອງຕໍ່ເມືອງ ຢ່າງເດັດຂາດ ແລະຢຸດການບໍລິການຂ້າສັດໃຫຍ່ທົ່ວແຂວງໃນໄລຍະການລະບາດຂອງພະຍາດທັງນີ້ກໍ່ເພື່ອສະກັດກັ້ນ ແລະຄວບຄຸມການແຜ່ລະບາດຂອງພະຍາດ,ໃຫ້ເຈົ້າເມືອງ 5 ເມືອງ ຊີ້ນໍາຫ້ອງການກະສິກຳ ແລະ ປ່າໄມ້ເມືອງໃນການຕິດຕາມກວດກາເວນຍາມ ແລະ ຄວບຄຸມການເຄື່ອນຍ້າຍສັດໃຫຍ່ປະເພດ ງົວ-ຄວາຍ ແລະ

ຜະລິດຕະພັນສັດໃຫຍ່ເຂົ້າ-ອອກ ແຂວງຈົນກວ່າສະພາບການລະບາດຂອງພະຍາດດັ່ງກ່າວໄດ້ຢຸດລົງ; ໃຫ້ພະແນກກະສິກຳ ແລະ ປ່າໄມ້ແຂວງຕິດຕາມເຝົ້າລະວັງປ້ອງກັນ ແລະສະກັດກັ້ນໂຄສະນາເຜີຍແຜ່ ແລະອອກຂ່າວທາງວິທະຍຸກະຈາຍສຽງກ່ຽວກັບວິທີການປ້ອງກັນການກຳຈັດແມງວັນດູດເລືອດ ເຫັບ ຍູງ ການອະນາໄມຂ້າເຊື້ອທີ່ຢູ່ອາໄສຂອງສັດ ໃຫ້ແກ່ປະຊາຊົນ ກຸ່ມ ຫຼື ຟາມ ຜູ້ປະກອບການໄດ້ຮັບຮູ້ ແລະ ເຂົ້າໃຈໃນທົ່ວແຂວງ ຢ່າງທົ່ວເຖິງ; ໃຫ້ຫ້ອງການຄຸ້ມຄອງດ່ານສາກົນພູເກືອຊີ້ນໍາ ໜ່ວຍງານສະກັດກັ້ນສັດເອົາໃຈໃສ່ຫ້າມເຄື່ອນຍ້າຍນຳເຂົ້າ-ສົ່ງອອກ ຫລື ສົ່ງຜ່ານຊົ່ວຄາວສັດໃຫຍ່ປະເພດງົວ-ຄວາຍ ແລະ ຜະລິດຕະພັນຈາກສັດໃຫຍ່ລະຫວ່າງປະເທດກັບປະເທດໃກ້ຄຽງຢ່າງເດັດຂາດ; ໃຫ້ພະແນກກະສິກຳແລະປ່າໄມ້ຊີ້ນໍາໃຫ້ວິຊາການສະຕະວະແພດຢູ່ສາກົນພູເກືອດ່ານທ້ອງຖິ່ນ ແລະ ດ່ານປະເພນີທີ່ຂຶ້ນກັບຄວາມຮັບຜິດຊອບໄດ້ເອົາໃຈໃສ່ເປັນພິເສດໃນການເກືອດຫ້າມເຄື່ອນຍ້າຍນຳເຂົ້າສົ່ງອອກ ຫຼືສົ່ງຜ່ານຊົ່ວຄາວສັດໃຫຍ່ປະເພດງົວຄວາຍ ແລະຜະລິດຕະພັນຈາກສັດໃຫຍ່ຜ່ານດ່ານຢ່າງເຂັ້ມງວດ.


ຂ່າວ: ສິດຕິພອນ ຂ, ອັດຕະປື

แชร์