ບໍ່ຮູ້ໜັງສືຄືອຸປະສັກຖ່ວງດຶງການພັດທະນາ

    ຄວາມບໍ່ຮູ້ໜັງສື ແລະການຮຽນບໍ່ຈົບການສຶກສາຂັ້ນພື້ນຖານໄດ້ກາຍເປັນອຸປະສັກຢ່າງໃຫຍ່ຫຼວງຕໍ່ກັບການພັດທະນາຄົນກໍ່ຄືການພັດທະນາຊັບພະຍາກອນມະນຸດ, ພັດທະນາເສດຖະກິດ-ສັງຄົມຂອງຊາດຂອງສັງຄົມຄອບຄົວ ແລະຂອງຕົນເອງສະນັ້ນຜ່ານມາພັກ-ລັດ ໄດ້ຖືສຳຄັນຕໍ່ການສຶກສາຂອງປະຊາຊົນບັນດາເຜົ່າ ແລະໄດ້ວາງຫຼາຍເປົ້າໝາຍດ້ານການສຶກສາໜຶ່ງໃນນັ້ນໄດ້ວາງຈະໃຫ້ຜູ້ອາຍຸ 15-35 ປີ ສໍາເລັດການສຶກສາຊັ້ນມັດທະຍົມຕອນຕົ້ນບໍາລຸງໃນຂອບເຂດທົ່ວປະເທດພາຍໃນປີ 2021 ນີ້.

  ເນື່ອງໃນໂອກາດວັນສາກົນແຫ່ງການຮຽນຮູ້ໜັງສືຄົບຮອບ 56 ປີ (8 ກັນຍາ 1965-8 ກັນຍາ 2021) ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາ ທິການ ແລະກີລາ (ສສກ) ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 7 ກັນຍານີ້, ທີ່ກະຊວງ ສສກ ວ່າ: ພັກ ແລະລັດຖະບານຍາມໃດກໍໃຫ້ຄວາມສໍາຄັນຕໍ່ວຽກການສຶກສາຂອງປະຊາຊົນບັນດາເຜົ່າ ແລະຕໍ່ການຮຽນຮູ້ໜັງສືທີ່ໄດ້ລະບຸຢູ່ໃນກົດໝາຍວ່າດ້ວຍການສຶກສາແຫ່ງ ສປປ ລາວ. 

   ພາຍຫຼັງໄດ້ຈັດຕັ້ງພິທີປະກາດຈົບຊັ້ນປະຖົມບໍາລຸງໃນຂອບເຂດທົ່ວປະເທດວັນທີ 28 ສິງຫາ 2015 ແລ້ວຍັງສືບຕໍ່ເກັບກໍາສະຖິຕິຈໍານວນປະຊາກອນທີ່ຍັງບໍ່ທັນຈົບຊັ້ນປະຖົມ ແລະຈັດຕັ້ງການຮຽນການສອນຕະຫຼອດມາຊຶ່ງປີ 2020-2021 ມີຜົນສໍາເລັດດັ່ງນີ້: ປະຊາກອນທີ່ມີອາຍຸ 6-14 ປີ ທີ່ຮຽນຈົບລະດັບລຶບລ້າງຄວາມບໍ່ຮູ້ໜັງສື ຈໍານວນ 2.132 ຄົນ,ຍິງ1.139 ຄົນ,ປະຊາກອນທີ່ມີອາຍຸ 15-40 ປີ ຮຽນຈົບຊັ້ນປະຖົມບໍາລຸງໄດ້ທັງໝົດ 15.550 ຄົນ, ຍິງ 8.503 ຄົນ ປະຊາກອນທີ່ມີອາຍຸ 15-35 ປີ.

  ນອກຈາກນີ້ຍັງໄດ້ບໍາລຸງຊັ້ນມັດທະຍົມ ແລະຜູ້ຮຽນຈົບຊັ້ນມັດທະຍົມຕອນຕົ້ນລະບົບບໍາລຸງໄດ້ຈໍານວນ 8.258 ຄົນ, ຍິງ 3.626 ຄົນ, ປະຊາກອນທີ່ມີອາຍຸ 15-30 ຈົບຊັ້ນມັດທະຍົມຕອນປາຍລະບົບບໍາລຸງໄດ້ຈໍານວນ 1.909 ຄົນ, ຍິງ 63 ຄົນ, ປະຈຸບັນໄດ້ສໍາເລັດການຈັດການຮຽນ-ການສອນຈົບຊັ້ນມັດທະຍົມຕອນຕົ້ນບໍາລຸງຂັ້ນແຂວງ 18 ແຂວງ, ນະຄອນຫຼວງວຽງຈັນ ແລະຂັ້ນເມືອງໄດ້ 148 ເມືອງ ໃນທົ່ວປະເທດ.

  ທ່ານ ລັດຖະມົນຕີກ່າວອີກວ່າ: ໂດຍອີງໃສ່ເປົ້າໝາຍການພັດທະນາທີ່ຍືນຍົງການສຶກສາຫຼັງປີ 2015 ຈະພັດທະນາຕາມທິດແບບຍືນຍົງ ແລະການຮຽນຮູ້ຕະຫຼອດຊີວິດ, ສະນັ້ນ ສປປ ລາວ ຈະໄດ້ເລັ່ງໃສ່ຍົກລະດັບການສຶກສາໃຫ້ພົນລະເມືອງລາວຈົບການສຶກສາພາກບັງຄັບ 9 ປີ ຮຽນດ້ວຍການເອົາໃຈໃສ່ຂະຫຍາຍຕາໜ່າງການສຶກສາຊັ້ນປະຖົມ ແລະມັດທະຍົມຕອນຕົ້ນໃຫ້ທົ່ວເຖິງພ້ອມທັງສ້າງເງື່ອນໄຂໃຫ້ພົນລະເມືອງລາວສາມາດເຂົ້າເຖິງການສຶກສາຢ່າງມີຄວາມສະເໝີພາບກັນ.

   ພ້ອມກັນນັ້ນກໍ່ເອົາໃຈໃສ່ຈັດການຮຽນ-ການສອນການບໍາລຸງຍົກລະດັບໃຫ້ປະຊາຊົນໃນຮູບແບບການສຶກສານອກໂຮງຮຽນເປັນປົກກະຕິ, ຜູ້ຈົບຊັ້ນປະຖົມສຶກສາແລ້ວກໍ່ໃຫ້ໄດ້ສືບຕໍ່ບໍາລຸງໃຫ້ຈົບຊັ້ນມັດທະຍົມຕົ້ນ ຫຼື ສູງຂຶ້ນໄປກວ່ານັ້ນ, ສອນໃຫ້ຜູ້ຮຽນມີຄວາມຮູ້ຕິດພັນກັບການຮຽນຮູ້ວິຊາຊີບໃດໜຶ່ງທີ່ໝັ້ນຄົງ, ນໍາເອົາຄວາມຮູ້ນັ້ນໄປພັດທະນາຄຸນນະພາບຊີວິດຂອງເຂົາເຈົ້າໃຫ້ດີຂຶ້ນ,ນໍາເອົາຄວາມຮູ້ນັ້ນໄປພັດທະນາເສດຖະກິດ-ສັງຄົມຂອງຊາດໃຫ້ຈະເລີນກ້າວໜ້າຂຶ້ນເລື້ອຍໆ.

  ພວກເຮົາຍັງຈະໄດ້ເອົາໃຈໃສ່ບໍາລຸງຊັ້ນປະຖົມໃຫ້ກຸ່ມຄົນທີ່ຕົກຄ້າງ ແລະຊຸກຍູ້ໃຫ້ຮຽນຕໍ່ຊັ້ນມັດທະຍົມຕົ້ນ, ຄາດໝາຍພວກເຮົາຮອດປີ 2021, ປະຊາກອນທີ່ມີອາຍຸ 15-35 ປີ ໃຫ້ສໍາເລັດການສຶກສາຊັ້ນມັດທະຍົມຕອນຕົ້ນບໍາລຸງໃນຂອບເຂດທົ່ວປະເທດ.

แชร์