ສະຫວັນສືບຕໍ່ປົວໂຄວິດ 2 ພັນກວ່າຄົນ

ຂ່າວ: ສະຫວັນ 

    ດັ່ງທີ່ຮູ້ນຳກັນແລ້ວວ່າມາໃນປະຈຸບັນພະຍາດໂຄວິດ-19 ໄດ້ແຜ່ລາມໄປຢ່າງກວ້າງຂວາງພ້ອມທັງໄດ້ແຜ່ເຂົ້າສູ່ຊຸມຊົນເຮັດໃຫ້ມີຈຳນວນຜູ້ຕິດເຊື້ອພະຍາດດັ່ງກ່າວເພີ່ມຂື້ນຢ່າງຫຼວງຫຼາຍໂດຍສະເພາະແຂວງສະຫວັນນະເຂດທີ່ໄດ້ຮັບມືກັບພະຍາດໂຄວິດ-19 ຢ່າງໜັກໜ່ວງ ແລະແກ່ຍາວພໍສົມຄວນຊຶ່ງມາຮອດວັນທີ 7 ກັນຍາ 2021 ທົ່ວແຂວງມີລາຍງານຜູ້ຕິດເຊື້ອສະສົມຈຳນວນທັງໝົດ 5.827 ຄົນ ໃນນີ້ປິ່ນປົວ ດີແລ້ວ 3.553 ຄົນ ແລະຍັງຢູ່ສູນປິ່ນປົວຈຳນວນ 2.211 ຄົນ ແລະມີຜູ້ເສຍຊີວິດແລ້ວ 7 ຄົນ, ຍິງ 2 ຄົນ.

    ຊຶ່ງໃນວັນທີ 7 ກັນຍາ 2021 ແຂວງໄດ້ພິທີມອບ-ຮັບຜູ້ທີ່ປິ່ນປົວດີຈາກພະຍາດໂຄວິດ-19 ຈຳນວນ 158 ກໍລະນີ ທີ່ໄດ້ຮັບການປິ່ນປົວດີຈາກໂຮງໝໍສະໜາມ ຫຼັກ 9 ຈຳນວນ 154 ຄົນ ແລະໂຮງໝໍສະໜາມວິທະຍາໄລວິທະຍາສາດສຸຂະພາບສະຫວັນນະເຂດ (ວສສ) 4 ຄົນ, ປະຈຸບັນແຂວງສະຫວັນນະເຂດມີສູນຈຳກັດບໍລິເວນທັງໝົດ 105 ແຫ່ງ ແລະມີໂຮງໝໍສະໜາມເພື່ອປິ່ນປົວຜູ້ຕິດໂຄວິດ 4 ແຫ່ງຄື: ວສສ, ຫຼັກ 9, ໂນນສະຫວາດ ແລະໂຮງໝໍສະໜາມແພໄໝ (ຮອງຮັບວີໄອພີ).

แชร์