ທ່ານ ສະເຫຼີມໄຊ ກົມມະສິດ ລັດ ຖະມົນຕີກະຊວງການຕ່າງປະເທດໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ- ສ.ເກົາຫຼີ ຄັ້ງທີ 11 ໃນຮູບແບບກອງປະຊຸມທາງໄກ, ຈັດຂຶ້ນໃນວັນທີ 8 ກັນຍາ 2021 ພາຍໃຕ້ການເປັນປະທານຮ່ວມຂອງທ່ານ ປຣາກ ໂຊຄົນ (Prak SOKHONN) ຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດ ແລະການຮ່ວມມືສາກົນແຫ່ງຣາຊະອາ ນາຈັກກໍາປູເຈຍ ແລະທ່ານ ຈອງ ອຸຍ ຢອງ (Chung Eui-yong) ລັດຖະມົນຕີກະຊວງການຕ່າງປະເທດແຫ່ງ ສ.ເກົາຫຼີ ແລະມີບັນດາລັດຖະມົນຕີຕ່າງ ປະເທດຈາກປະເທດສະມາຊິກແມ່ນໍ້າຂອງຄື: ມຽນມາ, ໄທ ແລະຫວຽດນາມ ເຂົ້າຮ່ວມຢ່າງພ້ອມພຽງ.

     ກອງປະຊຸມໄດ້ທົບທວນຄືນຄວາມຄືບໜ້າໃນການຮ່ວມມືພາຍໃຕ້ຂອບການຮ່ວມມືແມ່ນໍ້າຂອງ-ສ.ເກົາຫຼີ ໃນໄລຍະ 10 ປີ ຜ່ານມາ, ໂດຍສະເພາະການຈັດຕັ້ງປະຕິບັດບັນດາໂຄງການ ແລະແຜນງານພາຍໃຕ້ 3 ເສົາຄໍ້າຂອງການຮ່ວມມື (ປະຊາຊົນ, ຄວາມຈະເລີນຮຸ່ງເຮືອງ ແລະສັນຕິພາບ) ແລະ 7 ຂົງເຂດບູລິມະສິດ (ຂົງເຂດວັດທະນະທໍາ ແລະການທ່ອງທ່ຽວ; ການພັດທະນາຊັບພະຍາກອນມະນຸດ; ກະສິກໍາ ແລະພັດທະນາຊົນນະບົດ; ພັດທະນາພື້ນຖານໂຄງລ່າງ; ຂໍ້ມູນຂ່າວສານ ແລະເຕັກໂນໂລຊີ; ສິ່ງແວດລ້ອມ ແລະສິ່ງທ້າ ທາຍແບບໃໝ່).

   ກອງປະຊຸມຍັງໄດ້ທົບທວນຄືນໝາກຜົນຂອງການຈັດຕັ້ງປະຕິບັດບັນດາເນື້ອໃນທີ່ໄດ້ຕົກລົງກັນໃນກອງປະຊຸມລັດຖະມົນຕີຕ່າງປະເທດຂອບການຮ່ວມມືແມ່ນໍ້າຂອງ-ສ.ເກົາຫຼີ ຄັ້ງທີ 10 ແລະ ກອງປະຊຸມສຸດຍອດຂອບການຮ່ວມມື ແມ່ນໍ້າຂອງ-ສ.ເກົາຫຼີ ຄັ້ງທີ 2 ໃນປີ 2020 ຜ່ານມາ, ພ້ອມດຽວກັນນີ້, ກອງປະຊຸມຍັງໄດ້ຮ່ວມກັນປຶກສາຫາລື ແລະ ວາງທິດທາງແຜນການຮ່ວມມືໃນຕໍ່ໜ້າຊຶ່ງບັນດາລັດຖະມົນຕີຕ່າງປະເທດແມ່ນໍ້າຂອງ ແລະ ສ.ເກົາຫຼີ ໄດ້ໃຫ້ຄວາມສໍາຄັນໃນການຟື້ນຟູສະພາບເສດຖະກິດ-ສັງຄົມ ພາຍຫຼັງການແຜ່ລະບາດຂອງພະຍາດໂຄວິດ-19 ໂດຍການສືບຕໍ່ຜັນຂະຫຍາຍແຜນປະຕິບັດງານໄລຍະ 5 ປີເພື່ອຈັດຕັ້ງປະຕິບັດຖະແຫຼງການແມ່ນໍ້າຂອງແມ່ນໍ້າຮານ (2021-2025) ນອກນັ້ນ, ກອງປະຊຸມຍັງໄດ້ປຶກສາຫາລື ເພື່ອກຽມ ຄວາມພ້ອມໃຫ້ແກ່ການຈັດກອງປະຊຸມສຸດຍອດຂອບການຮ່ວມມືແມ່ນໍ້າຂອງ-ສ.ເກົາຫຼີ ຄັ້ງທີ 3 ໃນທ້າຍເດືອນຕຸລາ ທີ່ຈະມາເຖິງນີ້,ພ້ອມນີ້ບັນດາລັດຖະມົນຕີຍັງໄດ້ຮ່ວມກັນສະແດງຄວາມຊົມເຊີຍເນື່ອງໃນໂອກາດຄົບຮອບ 10 ປີ ແຫ່ງການຮ່ວມມືແມ່ນໍ້າຂອງ-ສ.ເກົາຫຼີ ແລະປີແລກປ່ຽນແມ່ນໍ້າຂອງ-ສ.ເກົາຫຼີ ໃນປີ 2021 ນີ້ (Mekong-ROK Exchange Year).

ໃນໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ປະກອບຄໍາເຫັນໃນກອງປະຊຸມ ໂດຍໄດ້ເນັ້ນເຖິງຄວາມສໍາຄັນຕໍ່ວິທີທາງໃນການຫຼຸດຜ່ອນຜົນກະທົບຈາກການແຜ່ລະບາດຂອງພະຍາດໂຄວິດ-19 ຕໍ່ຊີວິດການເປັນຢູ່ຂອງປະຊາຊົນ ແລະເສດຖະກິດໃນພາກພື້ນ ໂດຍສະເໜີໃຫ້ມີການເພີ່ມທະວີການຮ່ວມມືທາງດ້ານໂລຈິສຕິກທີ່ທັນສະໄໝເພື່ອສົ່ງເສີມ ການເຊື່ອມຈອດເສດຖະກິດຂ້າມຊາຍແດນ ແລະການເຊື່ອມໂຍງພາກພື້ນແມ່ນໍ້າຂອງ - ສ.ເກົາຫຼີ ເພື່ອອໍານວຍຄວາມສະດວກໃນການຂົນສົ່ງສິນຄ້າລວມໄປເຖິງການໄປມາຫາສູ່ກັນລະຫວ່າງປະຊາຊົນ, ສ້າງເງື່ອນໄຂສະດວກໃຫ້ແກ່ບັນດາຈຸລະວິສາຫະກິດ, ວິສາຫະ ກິດຂະໜາດນ້ອຍ ແລະກາງໃຫ້ສາມາດເຂົ້າເຖິງແຫຼ່ງທຶນ ແລະຕະຫຼາດໃນພາກພື້ນ, ສົ່ງເສີມໃຫ້ມີການຮ່ວມມືໃນຂົງເຂດອຸດສາຫະກໍາດີຈີຕອລ, ເຕັກໂນໂລຊີທີ່ທັນສະໄໝ, ການຄ້າເອເລັກໂຕຣນິກ (e-commerce) ແລະການສຶກສາເອເລັກໂຕຣນິກ (e-learning). ພ້ອມນີ້, ທ່ານ ສະເຫຼີມໄຊ ກົມມະສິດ ໃນນາມຫົວໜ້າຄະນະຜູ້ແທນລາວໄດ້ສະແດງຄວາມຊົມເຊີຍຕໍ່ລັດຖະບານ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອອຸປະກອນການແພດ ແລະວັກແຊງເພື່ອຮັບມື ແລະຕ້ານກັບການແຜ່ລະບາດຂອງພະຍາດໂຄວິດ-19 ໃຫ້ແກ່ບັນດາປະເທດແມ່ນໍ້າຂອງລວມທັງ ສປປ ລາວ ລວມມູນຄ່າ 200 ລ້ານໂດລາ ຜ່ານໂຄງການ COVAX ພາຍໃນປີ 2022.