ຫຼາຍພາກສ່ວນສືບຕໍ່ຊ່ວຍຄຳມ່ວນສູ້ໂຄວິດ

    ວັນທີ 8 ກັນຍາ 2021 ທີ່ຫ້ອງວ່າການແຂວງຄຳມ່ວນໄດ້ມີພາກສ່ວນຕ່າງໆນໍາເອົາເງິນມາມອບໃຫ້ຄະນະສະເພາະກິດຂັ້ນແຂວງເພື່ອນໍາໃຊ້ເຂົ້າໃນວຽກງານປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ຊຶ່ງໃນນັ້ນປະກອບມີທະນາຄານພັດທະນາລາວ ຈຳນວນ 120 ລ້ານກີບ ຕາງໜ້າມອບໂດຍທ່ານ ພົງສະຫວັດ ພົມມະແສງ ຫົວໜ້າສາຂາໃຫຍ່ທະນາຄານພັດທະນາລາວ ແຂວງສະຫວັນນະເຂດ ແລະບໍລິສັດ ດີເອັມ ການຄ້າຈຳກັດຜູ້ດຽວຈຳນວນ 100 ລ້ານກີບ ມອບໂດຍທ່ານ ນາງ ພອນສະຫວັນ ຈອມພານຸວົງ ຕາງໜ້າບໍລິສັດໂດຍການກ່າວຮັບຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ.
    ໂອກາດນີ້ທ່ານເຈົ້າແຂວງຄຳມ່ວນກໍ່ໄດ້ມອບໃບຍ້ອງຍໍ ແລະໄດ້ສະແດງຄວາມຂອບໃຈມາຍັງບັນດາພາກສ່ວນທີ່ໃຫ້ການຊ່ວຍເຫຼືອໃນຄັ້ງນີ້ພ້ອມທັງແຈ້ງກ່ຽວກັບສະພາບການແຜ່ລະບາດຂອງພະຍາດໂຄວິດ-19 ຢູ່ພາຍໃນແຂວງຄຳມ່ວນໂດຍສະເພາະແມ່ນການແຜ່ລະບາດຢູ່ໃນຊຸມຊົນທີ່ໄດ້ເລີ່ມແຜ່ຂະຫຍາຍໃນຂອບເຂດເທສະບານແຂວງ ແລະ ບັນດາ ເມືອງຈຳນວນໜຶ່ງຊຶ່ງເປັນບັນຫາຄວາມຫຍຸ້ງຍາກ ແລະສິ່ງທ້າທາຍຕໍ່ຄະນະສະເພາະກິດປະຕິບັດວຽກງານການປ້ອງກັນ ແລະແກ້ໄຂ.
   ແຂວງຄຳມ່ວນມີຈຳນວນຜູ້ຕິດເຊື້ອສະສົມທັງໝົດ 1.444 ຄົນ ໃນນີ້ປິ່ນປົວຫາຍດີແລ້ວ 707 ຄົນ, ຍັງສືບຕໍ່ປິ່ນປົວ 737 ຄົນ ສະເພາະວັນທີ 8 ກັນຍາ 2021 ມີຜູ້ຕິດເຊື້ອທັງໝົດ 40 ຄົນ ໃນນັ້ນນຳເຂົ້າ 10 ຄົນ ແລະຕິດເຊື້ອໃນຊຸມຊົນ 30 ຄົນ.

แชร์