ປີນີ້ຫຼວງພະບາງສົ່ງອອກສິນຄ້າກະສິກຳແລ້ວ 90,73 ຕື້ກີບ
ຫຼວງພະບາງເປັນອີກແຂວງໜຶ່ງທີ່ມີພື້ນທີ່ດິນອຸດົມສົມບູນເໝາະສົມແກ່ການທໍາການຜະລິດພືດສິນຄ້າປະເພດກະສິກໍາລວມເຖິງການລ້ຽງສັດປະເພດຕ່າງໆ ເພື່ອຮັບໃຊ້ໃນຄອບຄົວ, ສະໜອງອອກຂາຍຢູ່ໃນທ້ອງຕະຫຼາດພາຍໃນ ແລະສົ່ງອອກຂາຍຕ່າງປະເທດ ສໍາລັບປີນີ້ແຂວງສາມາດສົ່ງອອກສິນຄ້າກະສິກຳ ລວມມູນຄ່າ 90,73 ຕື້ກີບ.
ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງ ໄດ້ລາຍງານໃຫ້ຮູ້ວ່າງບໍ່ດົນນີ້ວ່າ: ແຂວງຫຼວງພະບາງເປັນແຂວງໜຶ່ງມີທ່າແຮງໃນດ້ານການຜະລິດກະສິກໍາສົ່ງອອກຂາຍເປັນສິນຄ້າສ້າງລາຍຮັບໃຫ້ກັບຄອບຄົວເຮັດໃຫ້ເສດຖະກິດຂອງພໍ່ແມ່ປະຊາຊົນນັບມື້ດີຂຶ້ນເປັນກ້າວໆ, ຊຶ່ງຜ່ານມາທາງການນໍາຂອງແຂວງໂດຍສະເພາະແມ່ນພະແນກກະສິກໍາ ແລະປ່າໄມ້ໄດ້ລົງເລິກໃນການສົ່ງເສີມພໍ່ແມ່ປະຊາຊົນເຂົ້າເຖິງການປູກ-ການລ້ຽງໄດ້ດີພໍສົມຄວນ.
ຈາກສີ່ງດັ່ງກ່າວໄດ້ສົ່ງຜົນຕໍ່ການສົ່ງອອກສິນຄ້າກະສິກຳທົ່ວແຂວງລວມມູນຄ່າບັນລຸແລ້ວ 90,73 ຕື້ກີບ, ໃນນັ້ນສົ່ງອອກພືດ ແລະໄມ້ສຳເລັດຮູບມູນຄ່າ 68,10 ຕື້ກີບ, ໝາກກ້ວຍ 18,15 ຕື້ກີບ, ໝາກໂມ 15,45 ຕື້ກີບ ແລະອື່ນໆ, ສົ່ງອອກສັດລ້ຽງປະເພດຕ່າງໆທັງໝົດ 15.279 ໂຕ, ມູນຄ່າ 22,63 ຕື້ກີບ, ງົວ 2.666 ໂຕ ມູນຄ່າ 21,32 ຕື້ກີບ.
ຄຽງຄູ່ກັນນີ້ຍັງໄດ້ສົ່ງເສີມການປູກພືດອຸດສາຫະກຳເປັນສິນຄ້າເປັນຕົ້ນແມ່ນ: ສາລີ, ຖົ່ວດິນ, ຖົ່ວເຫຼືອງ, ຖົ່ວຂຽວ, ຢາສູບ ແລະອື່ນໆ ໄດ້ທັງໝົດ 1,14 ພັນເຮັກຕາ, ທຽບໃສ່ແຜນການປະຕິບັດໄດ້ 42%, ໄດ້ຊຸກຍູ້ໃຫ້ປະຊາຊົນຫັນຈາກການລ້ຽງສັດແບບທຳມະຊາດ ໄປສູ່ການລ້ຽງນຳໃຊ້ເຕັກນິກ, ລ້ຽງເປັນຟາມ, ເປັນລ໊ອກ ແລະປູກຫຍ້າໃຫ້ອາຫານສັດຫຼາຍຂຶ້ນ.
ທົ່ວແຂວງມີຟາມລ້ຽງສັດທັງໝົດ 114 ຟາມ, ເພີ່ມຂຶ້ນ 9 ຟາມ ໃນນັ້ນ: ມີຟາມງົວ-ຄວາຍ 22 ຟາມ ເພີ່ມຂຶ້ນ 3 ຟາມ, ຟາມໝູພັນຊີ້ນ 38 ຟາມ ເພີ່ມຂຶ້ນ 2 ຟາມ, ຟາມແບ້ 5 ຟາມ, ຟາມໄກ່ພັນໄຂ່ 23 ຟາມ, ຟາມໄກ່ພັນຊີ້ນ 18 ຟາມ ເພີ່ມຂຶ້ນ 4 ຟາມ, ຟາມເປັດ 1 ຟາມ, ຟາມປາກະຊັງ 7 ຟາມ, ການລ້ຽງສັດເຫັນວ່າມີການເພີ່ມຂຶ້ນ ແລະສາມາດຕອບສະໜອງຄວາມຕ້ອງການຂອງສັງຄົມໄດ້ຫຼາຍຂຶ້ນ.
ພ້ອມນັ້ນ, ກໍ່ໄດ້ປັບປຸງທົ່ງຫຍ້າປູກຫຍ້າພັນປັບປຸງໃນ 6 ເດືອນຕົ້ນປີ 2021 ນີ້ ຂະຫຍາຍໃໝ່ໄດ້ ຈໍານວນ 8.194 ເຮັກຕາ, ປະຈຸບັນມີເນື້ອທີ່ປູກຫຍ້າທັງໝົດ 43.492 ເຮັກຕາ ທັງນີ້ທ່ານເຈົ້າແຂວງຄາດວ່າໃນອະນາຄົດການສົ່ງອອກສິນຄ້າກະສິກໍາແຂວງຫຼວງພະບາງຈະມີມູນຄ່າເພີ່ມຂຶ້ນໄປເລື້ອຍໆ.
