ສຳເລັດບ້ານຈັດສັນ ບ້ານເມືອງມ່ວນ ໂຄງການນໍ້າເທີນ 1

   ພິທີມອບ-ຮັບໂຄງການບ້ານຈັດສັນບ້ານເມືອງມ່ວນ ລະຫວ່າງບໍລິສັດໄຟຟ້ານໍ້າເທີນ 1 ຈໍາກັດ ໃນນາມເຈົ້າຂອງໂຄງການເຂື່ອນໄຟຟ້ານໍ້າເທີນ 1 ແລະອົງການປົກຄອງແຂວງບໍລິຄໍາໄຊ ໄດ້ຈັດຂຶ້ນເມື່ອວັນທີ 2 ກັນຍານີ້ທີ່ບ້ານຈັດສັນເມືອງມ່ວນ ເມືອງວຽງທອງ ແຂວງບໍລິຄຳໄຊ ໂດຍໃຫ້ກຽດເຂົ້າຮ່ວມຂອງທ່ານ ກອງແກ້ວ ໄຊສົງ ຄາມ ເຈົ້າແຂວງບໍລິຄຳໄຊປະທານຄະນະກຳມະການທົດແທນຄ່າເສຍຫາຍຈັດສັນຍົກຍ້າຍປະຊາຊົນໂຄງການເຂື່ອນໄຟຟ້ານໍ້າຕົກ-ນໍ້າເທີນ1 (RC), ທ່ານ ພິເສດສຸດ ກະເຊັນສຸຣະພັນ ຮອງຜູ້ອຳນວຍການໃຫຍ່ຝ່າຍກໍ່ສ້າງບໍລິສັດໄຟຟ້ານໍ້າເທີນ 1 ຈຳກັດ, ມີແຂກຖືກເຊີນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ປໍລີບົວລົ່ງ ຜູ້ຈັດການພາກສະໜາມກ່າວວ່າ: ການມອບ-ຮັບບ້ານຈັດສັນໃນຄັ້ງນີ້ປະກອບມີ: 1) ເຮືອນຂອງປະຊາຊົນຈໍານວນທັງໝົດ 88 ຫຼັງ, ໃນນີ້ໄດ້ແບ່ງອອກເປັນ 3 ຂະໜາດ 50 ຕາແມັດ ຈໍານວນ 14 ຫຼັງ, 60 ຕາແມັດ ຈໍານວນ 41 ຫຼັງ ແລະ70 ຕາແມັດ ຈໍານວນ 32 ຫຼັງ, ອີກ 1 ຫຼັງ ຂະໜາດ 48 ຕາແມັດ ສໍາລັບຜູ້ດ້ອຍໂອກາດ; 2) ສິ່ງປຸກສ້າງອື່ນໆ ພາຍໃນບ້ານປະກອບມີຫ້ອງການບ້ານ ແລະສະໂມສອນບ້ານ 1 ຫຼັງ, ອາຄານໂຮງຮຽນປະຖົມສົມບູນຈໍານວນ 6 ຫ້ອງ 1 ຫຼັງ; 3) ໂຄງລ່າງພື້ນຖານ ແລະສິ່ງອໍານວຍຄວາມສະດວກພາຍໃນບ້ານມີເສັ້ນທາງເຂົ້າບ້ານ ແລະ ທາງໃນບ້ານ, ຕາຂ່າຍໄຟຟ້າ 22 ກິໂລໂວນ ແລະ 0,4 ກິໂລໂວນ, ລະບົບນໍ້າສະອາດຂອງຊຸມຊົນ ແລະສະໜາມຖີ້ມຂີ້ເຫຍື້ອຂອງບ້ານ.

    ບ້ານເມືອງມ່ວນ ເມືອງວຽງທອງ ແຂວງບໍລິຄໍາໄຊ ແມ່ນບ້ານໜຶ່ງໃນຈໍານວນບ້ານກຸ່ມ 2 ທີ່ໄດ້ຮັບຜົນກະທົບບາງສ່ວນ, ແຕ່ມີຄວາມຈໍາເປັນທີ່ຕ້ອງຍົກຍ້າຍຂຶ້ນໄປຢູ່ພື້ນທີ່ສູງ ແລະປອດໄພຈາກເຂດອ່າງເກັບນໍ້າເພາະວ່າທີ່ຕັ້ງຖິ່ນຖານແມ່ນນອນໃນລະດັບຄວາມສູງ 292-299 ແມັດ ເໜືອນໍ້າທະເລເຫັນ ວ່າມີຄວາມສ່ຽງຈະໄດ້ຮັບຜົນກະທົບຈາກອ່າງເກັບນໍ້າ, ໃນນີ້ມີ 76 ຄົວເຮືອນ, ຈຳນວນ 334 ຄົນ (ຍິງ 152 ຄົນ) ຈໍາເປັນຕ້ອງໄດ້ຫຍັບຍ້າຍ, ການຫຍັບຍ້າຍປະຊາຊົນແມ່ນໄດ້ປຶກສາຫາລືຮ່ວມກັບປະຊາຊົນຜູ້ທີ່ໄດ້ຮັບຜົນກະທົບ, ອົງການປົກຄອງຂັ້ນທ້ອງຖິ່ນ ແລະໜ່ວຍງານຄຸ້ມຄອງການທົດແທນຄ່າເສຍຫາຍ ແລະຈັດສັນຍົກຍ້າຍ (RMU).

     ບໍລິສັດ ໄຟຟ້ານໍ້າເທີນ 1 ຈຳກັດ ແມ່ນເຈົ້າຂອງໂຄງການເຂື່ອນໄຟຟ້ານໍ້າເທີນ 1 ແລະເປັນຜູ້ຈັດຕັ້ງປະຕິບັດການທົດແທນຄ່າເສຍຫາຍ ແລະ ຈັດສັນຍົກຍ້າຍປະຊາຊົນຜູ້ທີ່ໄດ້ຮັບຜົນກະທົບຈາກການກໍ່ສ້າງເຂື່ອນໄຟຟ້ານໍ້າເທີນ 1 ລວມທັງວຽກງານກໍ່ສ້າງໂຄງລ່າງພື້ນຖານຕ່າງໆ ທັງເປັນເປັນຜູ້ຮັບຜິດຊອບວຽກງານຈັດສັນຍົກຍ້າຍປະຊາຊົນຊຶ່ງລວມມີບ້ານຈັດສັນຫ້ວຍຫອຍ ແລະຫຍັບຍ້າຍບ້ານເມືອງມ່ວນ ເມືອງວຽງທອງ ແຂວງບໍລິຄຳໄຊ.

แชร์