ຈະໃຊ້ງົບ 282,05 ຕື້ກີບ ປັບປຸງທາງ 13 ໃຕ້ ແຕ່ບໍລິຄຳໄຊ ຫາ ຄຳມ່ວນ

ຂ່າວ: ກະຊວງ ຍທຂ 

   ລັດຖະບານກຽມປັບປຸງເສັ້ນທາງ 13 ໃຕ້ ໃນໄລຍະຄວາມຍາວ 78 ກິໂລແມັດ (ແຕ່ກິໂລແມັດ 190-ກິໂລແມັດ 268) ແຂວງບໍລິຄຳໄຊ ແລະແຂວງຄຳມ່ວນ ໂດຍໄດ້ຮັບທຶນຈາກທະນາຄານລົງທຶນພື້ນຖານໂຄງລ່າງອາຊີ ແລະ ກອງທຶນທາງ (AIIB) ໃນມູນຄ່າ 29.690.305 ໂດລາສະຫະລັດ ຫຼືປະມານ 282,05 ຕື້ກີບ.
ເມື່ອອາທິດຜ່ານມາທີ່ກົມຂົວທາງກະຊວງໂຍທາທິການ ແລະຂົນສົ່ງ (ຍທຂ), ໄດ້ມີພິທີເຊັນສັນຍາໂຄງການປັບປຸງ ແລະສ້ອມແປງເສັ້ນທາງ 13 ໃຕ້ ດັ່ງ ກ່າວຂຶ້ນ ໂດຍຕາງໜ້າລົງນາມຄັ້ງນີ້ຂອງ ທ່ານ ສຸກສາກົນ ແຫວນວົງສົດ ຫົວໜ້າໂຄງການປັບປຸງ ແລະສ້ອມແປງເສັ້ນທາງ 13 ໃຕ້ ແລະທ່ານ ຊູ ຮັນ ຕາງໜ້າ ບໍລິສັດ China Inter national Water and Electric Corporation ມີບັນດາພາກສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ສຸກສາກົນ ແຫວນວົງສົດ ຫົວໜ້າໂຄງການກ່າວວ່າ: ໂຄງການດັ່ງກ່າວ, ແມ່ນຈະເລີ່ມປັບປຸງ ແລະສ້ອມແປງແຕ່ກີໂລແມັດ 71 ຫາ ກິໂລແມັດ 346 ມີຄວາມຍາວທັງໝົດ 275 ກິໂລແມັດ, ໂດຍໄດ້ແບ່ງອອກເປັນ 4 ຊ່ວງ, ຊຶ່ງແຕ່ລະຊ່ວງໄດ້ຮັບການສະໜັບສະໜູນເງິນກູ້ດອກເບ້ຍຕໍ່າຈາກສາມສະຖາບັນການເງິນຄື: ທະນາຄານໂລກ (WB) IDA ພາຍໃຕ້ໂຄງການຂະແໜງຂົວທາງໄລຍະ 2 (LRSP2), ທະນາຄານລົງທຶນເອີຣົບ (EIB), ທະນາຄານການລົງທຶນໂຄງລ່າງພື້ນຖານອາຊີ (AIIB) ແລະລັດຖະບານລາວ (ກອງທຶນທາງ) ຮູບແບບສັນຍາແມ່ນໃຊ້ຮູບແບບສັນຍາໃໝ່ OPBRC ໂດຍກໍ່ສ້າງ 3 ປີ ແລະບູລະນະຮັກສາ 7 ປີ.

   ໃນການອອກແບບເພື່ອປັບປຸງ ແລະສ້ອມແປງເສັ້ນທາງດັ່ງກ່າວ, ແມ່ນເປັນການຍົກລະດັບຈຸດນໍ້າຖ້ວມ, ຂະຫຍາຍໜ້າທາງໃຫ້ກ້ວາງອອກໄປຕື່ມບາງຊ່ວງ (ຈາກ 9 ແມັດ ມາເປັນ 12 ແມັດ) ແລະເພື່ອໃຫ້ສາມາດຮັບນໍ້າໜັກການບັນທຸກຕາມມາດຕະຖານຂອງອາຊຽນ ຄື 11 ໂຕນຕໍ່ເພົາ (ຂອງລາວແມ່ນ 9,1 ໂຕນຕໍ່ເພົາ).

   ສຳລັບໂຄງສ້າງທາງໄດ້ອອກແບບເປັນໜ້າທາງປູຢາງຂົ້ວ AC ສະເພາະຊ່ວງທີ 3 ແຕ່ກິໂລແມັດ 190 ຫາ ກິໂລແມັດ 268 ມີລວງຍາວ 78 ກິໂລແມັດ ໃນກອບສັນຍາແບບມອບເໝົາ (Output and Performance- Based Road Contract–OPBRC) ໝາຍຄວາມວ່າຜູ້ຮັບເໝົາເປັນຜູ້ດຳເນີນການກໍ່ສ້າງສຳ ເລັດແລ້ວສືບຕໍ່ບູລະນະຮັກສາໄປອີກຕື່ມ 7 ປີ, ຈຶ່ງມອບໃຫ້ແກ່ເຈົ້າຂອງໂຄງການ.

แชร์