ສີນຸກ ສີສົມບັດ ຮຽກຮ້ອງຄົນລາວ ຊົມໃຊ້ສິນຄ້າພາຍໃນຫຼາຍຂຶ້ນ

   ຍຸກເສດຖະກິດຝຶດເຄືອງບ້ານເມືອງປະເຊີນກັບບັນຫາຄວາມຫຍຸ້ງຍາກຍ້ອນສະພາບການແຜ່ລະບາດຂອງພະຍາດໂຄວິດ-19 ແນ່ນອນວ່າທຸກຂະແໜງການແມ່ນຖືກຜົນກະທົບຢ່າງຫຼີກລ່ຽງບໍ່ໄດ້ໜຶ່ງໃນນັ້ນກໍ່ແມ່ນຜູ້ປະກອບການຜະລິດກາເຟພາຍໃນຍິ່ງສະເທືອນໜັກເນື່ອງຈາກຕະຫຼາດການຈຳໜ່າຍທັງພາຍໃນ ແລະ ຕ່າງປະເທດຫົດຕົວຢ່າງໜ້າເປັນຫ່ວງທັງນີ້ຜູ້ປະກອບການຮຽກຮ້ອງໃຫ້ສັງຄົມລາວຫັນມາຊຸກຍູ້ສົ່ງເສີມຜະລິດຕະພັນຂອງລາວເຮົາເອງຫຼາຍຂຶ້ນກວ່າເກົ່າ.

    ທ່ານ ສີນຸກ ສີສົມບັດ ປະທານກຸ່ມບໍລິສັດສີນຸກເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມເມື່ອເຊົ້າວັນທີ 1 ສິງຫາ 2021 ທີ່ສຳນັກງານກຸ່ມບໍລິສັດດັ່ງກ່າວບ້ານສົມສະໜຸກ ເມືອງຫາດຊາຍຟອງ ນະຄອນຫຼວງວຽງຈັນ ຮູ້ວ່າ: ທຸລະກິດກາເຟສີນຸກມີຈຸດເລີ່ມຕົ້ນທາງພາກໃຕ້ຂອງລາວທີ່ເມືອງປາກເຊແຂວງຈຳປາສັກໃນປີ 1994 ກ່ອນຂະຫຍາຍກິດຈະການມາຢູ່ເມືອງເອກຂອງປະເທດຄືນະຄອນຫຼວງວຽງຈັນໃນປີ 2004 ດ້ວຍຈັງຫວະການເຕີບໃຫຍ່ຂະຫຍາຍຕົວຂອງເສດຖະໂລກປະກອບໃສ່ເສດຖະກິດລາວມີທ່າກ້າວໄດ້ສົ່ງຜົນດີຕໍ່ທຸລະກິດສີນຸກໄດ້ເຕີບໃຫຍ່ຂະຫຍາຍຕົວມາໂດຍຕະຫຼອດໂດຍເວລານີ້ໃນກຸ່ມບໍລິສັດລວມມີ 3 ກິດຈະການຕົ້ນຕໍຄື: 1 ຂົ້ວ ແລະຈຳໜ່າຍກາເຟຂົ້ວສີນຸກ; ຮ້ານກາເຟສີນຸກ ແລະສວນອາຫານຣີສອດສີນຸກທີ່ເມືອງທ່າແຕງ ແຂວງເຊກອງ.

   ຢ່າງໃດກໍຕາມທ່ານປະທານກຸ່ມບໍລິສັດສີນຸກກ່າວຕື່ມວ່າ: ພາຍຫຼັງທີ່ມີການລະບາດຂອງພະຍາດໂຄວິດ-19 ຢູ່ໃນໂລກກໍ່ຄືຢູ່ປະເທດເຮົານັບແຕ່ປີຜ່ານມານີ້ໄດ້ສົ່ງຜົນກະທົບຢ່າງໜັກໜ່ວງຕໍ່ 3 ທຸລະກິດຂອງກຸ່ມເນື່ອງຈາກວ່າລູກຄ້າສ່ວນຫຼາຍໃນເມື່ອກ່ອນແມ່ນເປັນນັກທ່ອງທ່ຽວຈາກຕ່າງປະເທດເມື່ອພະຍາດໂຄວິດ-19 ລະບາດເຂົາເຈົ້າເດີນທາງເຂົ້າມາລາວບໍ່ໄດ້ບັນດາໂຮງແຮມ ແລະ ຮ້ານອາຫານຖືກປິດຕົວສີ່ງດັ່ງກ່າວໄດ້ເຮັດໃຫ້ຍອດການດື່ມກາເຟຫຼຸດລົງຕາມກັນຈາກເມື່ອກອນກວມເອົາ 70-80% ຂອງລູກຄ້າກາເຟສີນຸກ.

ແນວໃດກໍດີມາພ້ອມກັບວິກິດກໍຍ່ອມມີໂອກາດໃນສະພາບໂຄວິດ-19 ລະບາດຄົນລາວຊາວຄໍກາເຟເດີນທາງໄປທ່ອງທ່ຽວຕ່າງປະເທດບໍ່ໄດ້ເປັນຜົນດີໜຶ່ງຕໍ່ກາເຟພາຍໃນທັງນີ້ທ່ານ ສີນຸກ ສີສົມບັດ ປະທານກຸ່ມບໍລິສັດສີນຸກໄດ້ຮຽກຮ້ອງມາຍັງສັງຄົມລາວຈົ່ງຫັນມາຊົມໃຊ້ຜະລິດຕະພັນລາວຫຼາຍຂຶ້ນເພື່ອເປັນການສົ່ງເສີມ ແລະສ້າງຄຸນຄ່າ ສີນຄ້າກໍຄືຄ່າເງິນກີບລາວລາວຜະລິດລາວໃຊ້ລາວໄດ້ລາວຈະເລີນເພາະສິນຄ້າຫຼາຍຢ່າງຄົນລາວເຮົາກໍສາມາດຜະລິດ ແລະ ຄຸນນະພາບເທົ່າທຽມກັບຕ່າງຊາດໂດຍສະເພາະກໍແມ່ນກາເຟລາວ.

   ສຳລັບກາເຟສີນຸກປະຈຸບັນມີສວນເພື່ອຜະລິດກາເຟຄຸນນະພາບເປັນວັດຖຸດິບກະເຟຂົ້ວປ້ອນໃຫ້ກັບຕະຫຼາດທັງພາຍໃນ ແລະຕ່າງປະເທດແລ້ວຈຳນວນທັງໝົດ 30 ກວ່າເຮັກຕາ ແລະມີຮ້ານກາເຟສີນຸກບໍລິການລູກຄ້າຢູ່ບັນດາແຂວງອີກ 12 ຮ້ານ ຂະນະທີ່ໃນອານາຄົດຫາກພະຍາດໂຄວິດ-19 ຈາງຫາຍທາງກຸ່ມກໍມີແຜນຂະຫຍາຍສາຂາຮ້ານກາເຟສີໜຸກຕື່ມອີກໂດຍສະເພາະແມ່ນໄປທີ່ແຂວງບໍ່ແກ້ວທີ່ໄດ້ມີການເຊັນສັນຍາກັບເຂດເສດຖະກິດຢູ່ທີ່ນັ້ນແລ້ວ.

แชร์