ຊີ້ແຈງຈູດໄມ້ຂຽງ 76 ບ້ອມ ທີ່ຢືດໄວ້ກາງປ່າກາສີ

ຂ່າວ: ອຳພອນ 

   ຈາກກະແສສັງຄົມໃຫ້ຄວາມສົນໃຈກ່ຽວກັບຂ່າວຢຶດ ແລະຈູດທຳລາຍໄມ້ຂຽງຢູ່ປ່າຂອງເມືອງກາສີ ຈຳນວນ 76 ບ້ອມ (ໄມ້ມີຄວາມກວ້າງ 30-35, ລວງຍາວ 30 ຊັງຕີແມັດ), ທີ່ໄດ້ໂພສລົງເພຈ໌ ໜັງສືພິມແຂວງໃນຄັ້ງວັນທີ 30 ສິງຫາ 2021 ນັ້ນ, ໄດ້ເຮັດໃຫ້ຫຼາຍຄົນເຂົ້າມາຄອມເມັ້ນໄປໃນທາງລົບ ແລະຕັ້ງຄຳຖາມເຖິງສາເຫດການຈູດທຳລາຍໄມ້ຂຽງຈຳນວນດັ່ງກ່າວນັ້ນ, ຊຶ່ງສົ່ງຜົນກະທົບຕໍ່ການຈັດຕັ້ງພັກ, ລັດເວົ້າສະເພາະແມ່ນເມືອງກາສີສະນັ້ນ, ຕໍ່ກັບເຫດການດັ່ງກ່າວໃນເວລາ 15:00 ໂມງ ຂອງວັນທີ 31 ສິງຫາ 2021 ນີ້ທ່ານ ບຸນທ່ຽງ ວິລະພົນ ກຳມະການພັກເມືອງຫົວໜ້າຫ້ອງການກະສິກຳ ແລະປ່າໄມ້ເມືອງກາສີຕາງໜ້າໃຫ້ຄະນະສະເພາະກິດຂອງເມືອງໄດ້ອະທິບາຍຊີ້ແຈງເຖິງເຫດຜົນຂອງການຈູດທຳລາຍໄມ້ຂຽງ (ປະເພດໄມ້ກະດອມ) ຈຳນວນ 76 ບ້ອມ ໃນຄັ້ງ ວັນທີ 27 ສິງຫາ 2021 ທີ່ທາງຄະນະສະພາະກິດເມືອງໄດ້ຢຶດໄວ້ຢູ່ປ່າເຂດປ້ອມຍາມພູບວກຊ້າງບ້ານໜອງສານ ເມືອງກາສີ ແຂວງວຽງຈັນ, ຊຶ່ງທ່ານໄດ້ກ່າວວ່າ: ເຫດຜົນທີ່ຈຳເປັນຕ້ອງໄດ້ຈູດທຳໄມ້ກັບທີ່ແມ່ນຍ້ອນສາມເຫດຜົນຫຼັກຄື: 1) ໄມ້ດັ່ງກ່າວແມ່ນຢູ່ຫ່າງໄກເສັ້ນທາງເຂົ້າເຖິງມີຄວາມຫຍຸ້ງຍາກຫຼາຍຖ້າຈະທະລຸເສັ້ນທາງເຂົ້າຫາອາດຈະເປັນຊ່ອງວ່າງໃຫ້ແກ່ກຸ່ມຄົນທີ່ບໍ່ຫວັງດີເຂົ້າໄປລັກລອບຕັດໄມ້ຢູ່ເຂດດັ່ງກ່າວເພີ່ມອີກ; 2) ຖ້າຈະນຳເອົາໄມ້ດັ່ງກ່າວ ມາເມືອງແມ່ນຈຳຕ້ອງໄດ້ໃຊ້ງົບປະມານຈຳນວນຫຼາຍຊຶ່ງໄລ່ລຽງແລ້ວບໍ່ຄຸ້ມຄ່າ; 3) ຖ້າຈະປະໃຫ້ມັນເປື່ອຍເນົ່າຢູ່ປ່າອາດເປັນຊ່ອງວ່າງໃຫ້ກຸ່ມຄົນບໍ່ຫວັງດີເຂົ້າໄປເຄື່ອນຍ້າຍໄມ້ຂຽງຈຳນວນດັ່ງກ່າວນຳເອົາໄປຂາຍຊຶ່ງຈະເປັນການ ສົ່ງເສີມໃຫ້ເຂົາເຈົ້າສືບຕໍ່ລັກລອບຕັດໄມ້ເພີ່ມອີກກໍ່ອາດເປັນໄປໄດ້.

แชร์