ກຸ່ມຜະລິດກະສິກໍາອິນຊີໄຊຍະ ຮັບແນວພັນພືດ

    ວັນທີ 31 ສິງຫາ 2021 ທີ່ພະແນກກະສິກໍາ ແລະປ່າໄມ້ ແຂວງໄຊຍະບູລີ ໄດ້ມີພິທີມອບແນວພັນພືດໃຫ້ແກ່ກຸ່ມຜະລິດກະສິກໍາອິນຊີ ຈາກໂຄງການຜະລິດກະສິກໍາສະອາດໄຈກາ (JICA) ໃຫ້ກຽດມອບຂອງທ່ານ ທະວີສິດ ບຸນຍາສຸກ ຫົວໜ້າໂຄງການພັດທະນາກະສິກໍາສະອາດ CADP (JICA) ແລະເປັນກຽດຮັບຂອງທ່ານ ພົງແກ້ວ ບຸນຍາວົງ ຮອງຫົວໜ້າພະແນກກະສິກໍາ ແລະປ່າໄມ້ແຂວງ ແລະໄດ້ມອບໃຫ້ຕາງໜ້າກຸ່ມປູກຜັກກະສິກໍາອິນຊີ 3 ກຸ່ມຄື: ກຸ່ມຜະລິດກະສິກໍາອິນຊີບ້ານນາຍາວ, ກຸ່ມບ້ານບຸ່ງ-ບ້ານ ຜາປູນ ແລະກຸ່ມບ້ານນາເລົາໂດຍເຂົ້າຮ່ວມເປັນສັກຂີພິຍານຈາກພະນັກງານໂຄງການ ແລະພະນັກງານວິຊາການຕາງໜ້າກຸ່ມເຂົ້າຮ່ວມ.

ກຸ່ມຜະລິດກະສິກໍາອິນຊີແຂວງໄຊຍະບູລີໄດ້ຮັບການສະໜັບສະໜູນຈາກໂຄງການຜະລິດກະສິກໍາສະອາດ CADP (JICA) ໂດຍຮ່ວມມືກັບກົມປູກຝັງ (ສູນມາດຕະຖານກະສິກໍາສະອາດພະແນກກະສິກໍາ ແລະປ່າໄມ້ແຂວງ ເລີ່ມແຕ່ປີ 2018 ເປັນຕົ້ນມາຈົນເຖິງປະຈຸບັນ). ຈຸດປະສົງເພື່ອຊຸກຍູ້ສົ່ງເສີມໃນການສ້າງຄວາມເຂັ້ມແຂງໃຫ້ແກ່ກຸ່ມຜະລິດກະສິກໍາອິນຊີ ແລະເຊື່ອມໂຍງກັບການຕະຫຼາດເພື່ອພັດທະນາວຽກງານກະສິກໍາສະອາດພືດຜັກອິນຊີຂອງແຂວງໄຊຍະບູລີໃຫ້ກວ້າງຂວາງ ແລະຮັບຮູ້ໃນສັງຄົມຫຼາຍຂຶ້ນພ້ອມທັງຂະຫຍາຍຜະລິດກະສິກໍາອິນຊີໃນຂັ້ນທ້ອງຖິ່ນໃຫ້ມີຄວາມຫຼາກຫຼາຍ, ມີຄວາມສະອາດປອດໄພທາງສັງຄົມ ແລະສິ່ງແວດລ້ອມ; ແຕ່ເນື່ອງຈາກໃນວັນທີ 14 ມິຖຸນາ 2021 ຜ່ານມາກຸ່ມຜະລິດກະສິກໍາອິນຊີ ໄດ້ຮັບຜົນກະທົບຈາກນໍ້າຖ້ວມທັງ 3 ກຸ່ມ 3 ບ້ານ, ມີ 23 ຄອບຄົວ, ມີມູນຄ່າເສຍຫາຍທັງໝົດ 372 ລ້ານກວ່າກີບ. ດັ່ງນັ້ນເພື່ອເປັນກໍາລັງໃຈໃຫ້ກຸ່ມຜະລິດກະສິກໍາອິນຊີໄດ້ດໍາເນີນສືບຕໍ່ທາງໂຄງການຜະລິດກະສິກໍາສະອາດຈຶ່ງໄດ້ຊອກ ແລະນໍາເອົາແນວພັນພືດຜັກຕ່າງໆມາມອບໃນຄັ້ງນີ້ຄື: ກະລໍາປີດອກ 23 ປ໋ອງ, ກະລໍາປີຫົວ 23 ປ໋ອງ, ຫອມປ້ອມ 23 ປ໋ອງ, ຜັກບົ້ງ 23 ປ໋ອງ, ຜັກກາດຫໍ່ 23 ປ໋ອງ ແລະຜັກອື່ນໆ ມີຈໍານວນທັງໝົດ 16 ຊະນິດ ລວມມູນຄ່າ 16 ລ້ານກວ່າກີບ.

แชร์