ພາກລັດ ແລະພາກທຸລະກິດແຂວງຈຳປາສັກ ຫາລືກົນໄກສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດ

ຂ່າວ-ຮູບ: ທັດຊະນະ

 ໃນວັນທີ 1 ກັນຍາ 2021 ທີ່ຫ້ອງວ່າການແຂວງຈຳປາສັກໄດ້ຈັດກອງປະຊຸມເພື່ອການຈັດຕັ້ງປະຕິບັດກົນໄກປຶກສາຫາລືລະຫວ່າງພາກລັດ-ເອກະຊົນ ຢູ່ຂັ້ນທ້ອງຖີ່ນ ຫລືກົນໄກ LPPD ການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວແນໃສ່ເຮັດໃຫ້ກົນໄກປຶກສາຫາລືໄດ້ຮັບການຈັດຕັ້ງປະຕິບັດຢ່າງເຕັມເມັດເຕັມໜ່ວຍໃຫ້ມີຄວາມພ້ອມໃນຫລາຍໆດ້ານຕໍ່ເນື່ອງ ແລະເປັນລະບົບ, ໃຫ້ກຽດເປັນປະທານຂອງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ, ເຈົ້າເມືອງ, ບັນດາຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ສະພາການຄ້າ ແລະອຸດສາຫະກຳແຂວງ, ມີຕາງໜ້າຈາກພາກລັດ ແລະພາກທຸລະກິດເຂົ້າຮ່ວມ.

   ທ່ານ ວິໄລວົງ ບຸດດາຄໍາ ໄດ້ມີຄຳເຫັນບາງຕອນວ່າ: ພາຍໃຕ້ການນໍາພາ-ຊີ້ນໍາຂອງລັດຖະບານກໍຄືອໍານາດການປົກຄອງແຂວງຈໍາປາສັກຍາມໃດກໍໄດ້ເອົາໃຈໃສ່ຕໍ່ກັບການແກ້ໄຂບັນຫາຂອດຫຍຸ້ງຍາກທີ່ອັດຕັນ, ບໍ່ໂລ່ງລ່ຽນໃນການສ້າງຕັ້ງ ແລະດໍາເນີນທຸລະກິດຢູ່ ສປປ ລາວ ເວົ້າລວມ, ເວົ້າສະເພາະຢູ່ແຂວງຈໍາປາສັກຄະນະນໍາແຂວງຈໍາປາສັກ ໄດ້ຊີ້ນໍາໃນການຮ່າງວາລະຂອງແຂວງກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ (2021-2023).


 ຈຸດປະສົງແມ່ນກໍານົດແຜນວຽກງານຕົວຈິງທີ່ຈໍາເປັນຮີບດ່ວນເພື່ອປຸກລະດົມກໍາລັງແຮງ, ຄວາມສາມາດບົ່ມຊ້ອນທັງໝົດຂອງທຸກການຈັດຕັ້ງຂອງພັກ, ລັດ, ພະນັກ ງານ, ນິຕິບຸກຄົນ ແລະປະຊາຊົນທົ່ວສັງຄົມປະກອບສ່ວນເຂົ້າໃນການຈັດຕັ້ງປະຕິບັດວາລະຂອງແຂວງຕາມພາລະບົດບາດຂອງຕົນຢ່າງຕັ້ງໜ້າແນໃສ່ແກ້ໄຂສະພາບເສດຖະກິດ-ການເງິນໃຫ້ພົ້ນອອກຈາກຄວາມສ່ຽງທີ່ຈະຕົກເຂົ້າສູ່ວິກິດການຮ້າຍແຮງ, ໃຫ້ສາມາດປະຄັບປະຄອງ ແລະກ້າວສູ່ສະພາບປົກກະຕິໃນໄລຍະແຕ່ນີ້ຮອດປີ 2023.

 ກອງປະຊຸມດັ່ງກ່າວ, ໄດ້ກໍານົດລະອຽດແຜນວຽກຈຸດສຸມຊຸກຍູ້-ສົ່ງເສີມ, ກໍານົດທິດທາງ, ມາດຕະການແກ້ໄຂຂອງພາກລັດ, ພັນທະ, ໜ້າທີ່ຂອງພາກທຸລະກິດ ແລະການປະກອບສ່ວນຂອງພາກສັງຄົມ. ກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງກໍເປັນສ່ວນໜຶ່ງໃນແຜນວຽກຈຸດສຸມວາລະຂອງແຂວງ ແລະທັງເປັນເວທີເປີດໂອກາດໃຫ້ພາກລັດ ແລະພາກທຸລະກິດໄດ້ພົບປະແລກປ່ຽນກັນຢ່າງໃກ້ຊິດໃນການສະເໜີບັນຫາຂໍ້ຫຍຸ້ງຍາກການດໍາເນີນທຸລະກິດ, ຊ່ວຍຂະແໜງການພາກລັດຂັ້ນແຂວງໃນການກໍານົດຫົວຂໍ້ບັນຫາບູລິມະສິດທີ່ຈະຕ້ອງໄດ້ຮັບການແກ້ໄຂເພື່ອປັບປຸງສະພາບແວດລ້ອມການດຳເນີນທຸລະກິດ ແລະ ເພີ່ມຂີດຄວາມສາມາດການແຂ່ງຂັນຂອງພາກທຸລະກິດພາຍໃນແຂວງໃຫ້ດີຂຶ້ນ.

-------

แชร์