ຄົ້ນຄວ້າ ແລະສຳຫຼວດພະຍາດແມ່ກາຝາກຕິດສັດສູ່ຄົນ

  ວັນທີ 31 ສິງຫາ 2021 ທີ່ນະຄອນຫຼວງວຽງຈັນ ຄະນະກະເສດສາດ (ມະຫາວິທະຍາໄລແຫ່ງຊາດ), ຮ່ວມກັບກົມຄວບຄຸມພະຍາດຕິດຕໍ່ (ກະຊວງສາທາລະນະສຸກ) ແລະມະຫາວິທະຍາໄລເມີດ໋ອກປະເທດອົດສະຕາລີໄດ້ຈັດກອງປະຊຸມໂຄງການຄົ້ນຄວ້າ ແລະສໍາຫຼວດພະຍາດແມ່ກາຝາກທີ່ຕິດເຊື້ອຈາກສັດສູ່ຄົນຢູ່ພາກເໜືອຂອງລາວໄລຍະໂຄງການ 3 ປີ (2021-2023) ໂດຍສະໜັບສະໜູນຈາກແຫຼ່ງທຶນ ACIAR ປະເທດອົດສະຕາລີໂດຍເປັນກຽດການເປັນປະທານຂອງທ່ານ ສຸລິອຸດົງ ສຸນດາລາ ຮອງລັດ ຖະມົນຕີກະຊວງສຶກສາທິການ ແລະກີ ລາ, ທ່ານ ດຣ ສະໜອງ ທອງຊະນະ ຮອງລັດຖະມົນຕີ ກະຊວງສາທາລະນະ ສຸກ, ມີທ່ານ ອຸດົມ ພອນຄຳເພັງ ຮັກສາການອະທິການບໍດີ ມຊ, ທ່ານ ດຣ. ຣັດ ຕະນະໄຊ ພົມສຸວັນ ຫົວໜ້າກົມຄວບຄຸມພະຍາດຕິດຕໍ່, ທ່ານ ດຣ Anna Okello from ACIAR-Australian RPM, ທ່ານ ນາງ Dulce Simmalavong from ACIAR-Lao Regional Manager ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 ທ່ານ ສຸລິອຸດົງ ສຸນດາລາ ໃຫ້ຮູ້ວ່າ: ການເປີດໂຄງການດັ່ງກ່າວເພື່ອຜ່ານທິດທາງແຜນການໂຄງການ ແລະແລກປ່ຽນບົດຮຽນກັບພາກສ່ວນທີ່ກ່ຽວຂ້ອງ, ສ້າງຄວາມຮ່ວມມືກັບແຕ່ລະພາກສ່ວນ, ກວດສອບເພີ່ມເຕີມກ່ຽວກັບການແຜ່ລະບາດ ຂອງພະບາດປົນເປື້ອນທາງອາຫານຕິດຕໍ່ຈາກສັດສູ່ຄົນຢູ່ເຂດທີ່ຖືກຄັດເລືອກໂດຍສະເພາະແມ່ນຢູ່ແຂວງຫຼວງພະບາງ, ອຸດົມໄຊ ແລະຜົ້ງສາລີ ແລະເພື່ອປະເມີນຍຸດທະສາດການຄວບຄຸມ, ຄັດຂວາງການແຜ່ລະບາດຂອງຫຼາຍໆພະບາດປົນເປື້ອນທາງອາຫານຕິດຕໍ່ຈາກສັດສູ່ຄົນໃນເວລາດຽວກັນ.

  ພະຍາດກາຝາກທີ່ເກີດຈາກອາຫານສ່ວນໃຫຍ່ເຊັ່ນ: Taenia, Trichinella ແລະ Fasciola ພວກແມ່ນພະຍາດຕິດຕໍ່ທີ່ສາມາດໄຕິດຕໍ່ໃສ່ຄົນໄດ້ຊຶ່ງກໍ່ໃຫ້ເກີດບັນຫາສຸຂະພາບ, ພ້ອມດຽວກັນນັ້ນກໍ່ຍັງເຮັດໃຫ້ຜົນຜະລິດຂອງສັດລ້ຽງທີ່ຕິດເຊື້ອຫຼຸດລົງເຊັ່ນ: ໝູ, ງົວ ແລະຄວາຍ, ກາຝາກຕິດຕໍ່ສູ່ຄົນໂດຍຜ່ານການບໍລິໂພກຊີ້ນໝູ ແລະຜະລິດຕະພັນຊີ້ນງົວມີໄຂ່ຂອງແມ່ກາຝາກເຫຼົ່ານີ້.

  ທ່ານ ດຣ ສະໜອງ ທອງຊະນະ ກ່າວວ່າ: ສໍາລັບໂຄງການນີ້ເປັນໂຄງການໜຶ່ງທີ່ສໍາຄັນ ແລະເປັນປະໂຫຍດທີ່ຈະຊ່ວຍໃນການກໍານົດເຂດທີ່ມີຄວາມສ່ຽງຕໍ່ການຕິດເຊື້ອພະຍາດກາຝາກທີ່ຕິດຕໍ່ຈາກອາຫານ, ເປັນຕົວແບບໃນການຈັດຕັ້ງປະຕິບັດສຸຂະພາບໜຶ່ງດຽວເພື່ອຄວບຄຸມພະຍາດຕິດຕໍ່ຈາກອາຫານ, ເພີ່ມຜົນຜະລິດຈາກສັດລ້ຽງໃນຊຸມຊົນທີ່ຂຶ້ນກັບໂຄງການ, ເພີ່ມຄວາມຮູ້ ແລະແນວທາງການຈັດຕັ້ງປະຕິບັດທີ່ກ່ຽວຂ້ອງກັບການແຜ່ເຊື້ອກາຝາກທີ່ຕິດຕໍ່ຈາກອາຫານ.

 ພະຍາດກາຝາກທີ່ຕິດຈາກອາຫານແມ່ນພະຍາດໜຶ່ງທີ່ມີອັດຕາການຕິດເຊື້ອສູງໃນ ສປປ ລາວ, ພະຍາດກາຝາກທີ່ຕິດຕໍ່ຈາກອາຫານແມ່ນຕິດພັນກັບພຶດຕິກໍາການກິນທີ່ບໍ່ຖືກສຸຂະອະນາໄມເຊັ່ນ: ກິນປາດິບ, ຊີ້ນໝູດິລ, ຊີ້ນງົວດິບ ຫຼື ການປຸງແຕ່ງທີ່ບໍ່ສຸກດີ ແລະ ພະຍາດໃບໄມ້ໃນຕັບມີອັດຕາການຕິດເຊື້ອສູງເຖິງ 70% ໂດຍສະເພາະແມ່ນທາງພາກກາງ ແລະພາກໃຕ້ສ່ວນພະຍາດໂຕແປແມ່ນມີອັດຕາຕິດເຊື້ພຽງແຕ່ 2,3 ຫາ 2,9% ໃນແຂວງຫຼວງພະບາງ, ສະຫວັນນະເຂດ, ຜົ້ງສາລີ ແລະອຸດົມໄຊຊຶ່ງພະຍາດໂຕແປແມ່ນອາໄສຢູ່ໃນສໍາໄສ້ ຊຶ່ງເປັນສາເຫດໃຫ້ມີການຂາດສານອາຫານຢ່າງຮຸນແຮງ, ພົບກ້ອນເປົ້າໂຕອ່ອນໃນສະໝອງ 6.1% ຖ້າການບົງມະຕິບໍ່ຊັດເຈນ ແລະປິ່ນປົວທີ່ບໍ່ຖືກຕ້ອງຈະເຮັດໃຫ້ຄົນເຈັບເສຍຊີວິດໄດ້.

แชร์