ແຂວງອັດຕະປື ມີງົວ-ຄວາຍ ເປັນພະຍາດຜີວໜັງ 4.313 ໂຕ

    ແຂວງອັດຕະປື ພົບການລະບາດຂອງພະຍາດຜີວໜັງອັກເສບຕິດຕໍ່ໃນສັດລ້ຽງປະເທດງົວ ແລະຄວາຍ ແລ້ວ 4.313 ໂຕ,ໃນນັ້ນ, ມີງົວ 4.163 ໂຕ ແລະຄວາຍ 150 ໂຕ, ປະຈຸບັນທາງພະແນກກະສິກໍາ ແລະປ່າໄມ້ແຂວງພວມກໍາລັງສຸມໃສ່ການເຮັດວຽກງານໂຄສະນາປະຊາສໍາພັນແນະນໍາປະຊາຊົນກ່ຽວກັບວິທີການປ້ອງກັນໃນເບື້ອງຕົ້ນໃນການປ້ອງກັນພະຍາດດັ່ງກ່າວເພື່ອບໍ່ໃຫ້ແຜ່ລະບາດເປັນວົງກວ້າງ.


   ທ່ານ ເພັດທະນົງສັກ ຄໍາພູນວົງ ຮອງຫົວໜ້າພະແນກກະສິກໍາ ແລະປ່າໄມ້ ແຂວງອັດຕະປື ໃຫ້ສໍາພາດເມື່ອວັນທີ 31 ສິງຫາ 2021 ໃຫ້ຮູ້ວ່າ: ພະຍາດຜິວໜັງອັກເສບຕິດຕໍ່ໃນງົວ-ຄວາຍ ເກີດຈາກເຊື້ອໄວລັດສ ລຳປີສະກິນ ຊຶ່ງພະຍາດນີ້ເກີດຂື້ນກັບສັດປະເພດງົວ ແລະຄວາຍເທົ່ານັ້ນບໍ່ສາມາດຕິດແປດສູ່ຄົນ, ພະຍາດນີ້ຈະມີການແຜ່ລະບາດໃນລະດູທີ່ມີອາກາດອົບອຸ່ນ ແລະ ຊຸ່ມຊື່ນ ແລະ ໃນຍາມທີ່ມີແມງດູດເລືອດອອກເຄື່ອນໄຫວຫາກິນ, ພະຍາດນີ້ເຮັດໃຫ້ສູນເສຍການຜະລິດທີ່ສໍາຄັນ ເນື່ອງຈາກການຜະລິດນົມຫຼຸດລົງ, ບັນຫາການຈະເລີນພັນ, ການແທ້ງລູກ, ຜິວໜັງເສຍຫາຍ, ນໍ້າໜັກຫຼຸດລົງ ແລະເຮັດໃຫ້ສັດຕາຍ. ປະຈຸບັນຢູ່ແຂວງອັດຕະປືພົບການລະບາດຂອງພະຍາດຜີວໜັງອັກເສບຕິດຕໍ່ໃນງົວ-ຄວາຍ ແລ້ວທັງໝົດ 4.313 ໂຕ, ມີງົວ 4.163 ໂຕ ແລະຄວາຍ 150 ໂຕ, ປິ່ນປົວດີແລ້ວມີງົວ 389 ໂຕ, ຕາຍງົວມີ 60 ໂຕ, ສໍາລັບຄວາຍແມ່ນຍັງສືບຕໍ່ປິ່ນປົວ.

   ທ່ານ ເພັດທະນົງສັກ ຄໍາພູນວົງ ໄດ້ກ່າວຕື່ມວ່າ: ເພື່ອສະກັດກັ້ນບໍ່ໃຫ້ພະຍາດຜີວໜັງອັກເສບຕິດຕໍ່ໃນງົວ-ຄວາຍ ເກີດມີການລະບາດເປັນວົງກວ້າງທາງພາກສ່ວນກ່ຽວຂ້ອງໂດຍສະເພາະທາງພະແນກກະສິກໍາແລະປ່າໄມ້ແຂວງ, ເມືອງ ແລະສັດຕະວະແພດບ້ານໄດ້ເຄື່ອນໄຫວເຮັດວຽກງານໂຄສະນາປະຊາສໍາພັນໃຫ້ປະຊາຊົນຜູ້ລ້ຽງສັດໄດ້ຮັບຮູ້ກ່ຽວກັບວິທີການປ້ອງກັນພະຍາດດັ່ງກ່າວເປັນຕົ້ນ: ການຊື້ງົວ-ຄວາຍເຂົ້າມາໃໝ່ເພື່ອລ້ຽງໃນຝູງຄວນຊື້ຈາກແຫຼ່ງທີ່ເຊື່ອຖືໄດ້,ສັດລ້ຽງຄວນໄດ້ຮັບການກວດຫາພະຍາດກ່ອນເຄື່ອນຍ້າຍຄວນໄດ້ມີການກັກກັນກ່ອນນໍາເຂົ້າມາລ້ຽງຮ່ວມໝູ່ນໍາຝຸງເກົ່າ ໃນເວລາ 28 ວັນ, ນໍາໃຊ້ຢາຂ້າແມງໄມ້,ຢາຂ້າແມງດູດເລືອດທີ່ມີ

ຄຸນນະພາບຢ່າງສະໝໍ່າສະເໜີຕາມບໍລິເວນຄອກສັດ, ຮັກສາອະນາໄມຟາມລ້ຽງສັດບໍ່ໃຫ້ເປັນບ່ອນເພາະພັນຂອງແມງໄມ້ ແລະ ແມງດູດເລືອດ,​ບໍ່ໃຫ້ມີນໍ້າຂັງເປິເປື້ອນ, ຟາມລ້ຽງສັດຄວນປະຕິບັດຫຼັກການຄວາມປອດໄພທາງດ້ານຊີວະພາບໃຫ້ເຂັ້ມງວດທີ່ສຸດ,ຜູ້ທີ່ມາຢ້ຽມຟາມລ້ຽງສັດຄວນຈໍາກັດສະເພາະການບໍລິການທີ່ຈໍາເປັນ, ຄວນມີການຊີດພົ່ນຢາຂ້າເຊື້ອພາຫະນະຂອງຜູ້ມາຢ້ຽມຢາມ, ອຸປະກອນ ແລະເກີບ ຫຼືໃສ່ຖົງເກີບດ້ວຍຖົງຢາງກ່ອນເຂົ້າໄປໃນຟາມລ້ຽງສັດ .
ຂ່າວ: ວັດທະນາ

แชร์