ຄໍາເກີດ ເປີດໂຄງການແກ້ໄຂ ແລະສະກັດກັ້ນຢາເສບຕິດ

    ວັນທີ 26 ສິງຫາຜ່ານມານີ້ຢູ່ສະໂມສອນບ້ານໂພນທອງ, ເມືອງຄຳເກີດ ແຂວງບໍລິຄໍາໄຊ ໄດ້ຈັດພິທີເປີດໂຄງການແກ້ໄຂ ແລະສະກັດກັ້ນຕ້ານການແຜ່ລະບາດຂອງຢາເສບຕິດ (ຢາບ້າ), ໂດຍເປັນກຽດເຂົ້າຮ່ວມຂອງ ທ່ານ ຜາສຸກ ຈູມມະລາວົງ ຮອງເຈົ້າເມືອງຄຳເກີດ, ມີຫົວໜ້າກອງບັນຊາການ ປກສ, ຄະນະຮັບຜິດຊອບ, ແຂກຖືກເຊີນ ແລະການຈັດຕັ້ງບ້ານຕະຫຼອດຮອດປະຊາຊົນພາຍໃນບ້ານເຂົ້າຮ່ວມ.
  ຈຸດປະສົງການເປີດໂຄງການແກ້ໄຂ ແລະສະກັດກັ້ນການແຜ່ລະບາດຂອງຢາເສບຕິດກໍ່ເພື່ອເປັນການສຶກສາອົບຮົມ, ເຊື່ອມຊຶມໃຫ້ປະຊາຊົນບັນດາເຜົ່າໄດ້ຮັບຮູ້ເຂົ້າໃຈກ່ຽວກັບຜົນຮ້າຍຂອງຢາເສບຕິດ ແລະ ບັນດາມາດຕາຂອງກົດໝາຍວ່າດ້ວຍອາຍາທີ່ກ່ຽວພັນກັບຢາເສບຕິດໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈເພື່ອກໍາໄດ້ເລ່ລ່ຽມ, ກົນອຸບາຍວິທີການລັກລອບຂົນສົ່ງ, ຊື້-ຂາຍ, ມົ້ວສຸມເສບ ຫຼືມີໄວ້ໃນຄອບຄອງຂອງກຸ່ມຄົນບໍ່ຫວັງດີ, ແນ່ໃສ່ການແກ້ໄຂບັນດາເປົ້າໝາຍເສບ, ຄ້າ-ຂາຍ, ຂົນສົ່ງ, ມີໄວ້ໃນຄອບຄອງຢູ່ພາຍໃນເມືອງຄຳເກີດໃຫ້ຫຼຸດໜ້ອຍຖອຍລົງເທື່ອລະກ້າວ. ຕາມການເກັບກຳຂໍ້ມູນໃນເບື້ອງຕົ້ນຂອງການຈັດຕັ້ງບ້ານ ແລະເຈົ້າໜ້າທີ່ຢູ່ບ້ານໂພນທອງມີຜູ້ເປົ້າໝາຍເສບ ຈໍານວນ 60 ຄົນ, ເປົ້າໝາຍຂາຍ 10 ຄົນ ແລະຍັງຈະຕ້ອງໄດ້ສືບຕໍ່ຕິດຕາມກວດກາເກັບກໍາຂໍ້ມູນເພື່ອຈະໄດ້ຮຽກຕົວ, ພາຕົວບັນດາເປົ້າໝາຍມາເອົາຄໍາໃຫ້ການ, ສຶກສາອົບຮົມ, ກ່າວເຕືອນ, ກວດປັດສະວະ ແລະສ້າງບົດບັນທຶກຄໍາປະຕິຍານ, ຖ່າຍຮູບເປັນຫຼັກຖານ ແລ້ວມອບໃຫ້ຜູ້ປົກຄອງ ແລະ ປກສ-ປກຊ ກຸ່ມ ສົມທົບກັບອົງການຈັດຕັ້ງບ້ານຕິດຕາມກວດກາຕໍ່ໄປຖ້າຫາກວ່າຜູ້ກ່ຽວຍັງບໍ່ປະຕິບັດຕາມບົດບັນທຶກແມ່ນຈະຖືກດໍາເນີນຄະດີຕາມກົດໝາຍ.


ຫຼັງຈາກນັ້ນທ່ານ ຜາສຸກ ຈູມມະລາວົງ ຮອງເຈົ້າເມືອງຄຳເກີດກໍ່ໄດ້ມອບເຄື່ອງອຸປະໂພກ, ບໍລິໂພກໃຫ້ແກ່ອ້າຍນ້ອງກຳລັງ ປກສ ເມືອງຄຳເກີດ ທີ່ລົງໄປປະຕິບັດໜ້າທີ່ໃນຄັ້ງນີ້ຕື່ມອີກ.

ຂ່າວ: ສີວັນ ອິນທິລາດ

แชร์