ສາລະວັນ-ກວາງຈິ ຕີລາຄາຮ່ວມມືຮອບດ້ານໄລຍະເຄິ່ງສະໄໝ

   ແຂວງສາລະວັນ ສປປ ລາວ ແລະ ແຂວງກວາງຈິ ສສ ຫວຽດນາມ ຈັດກອງປະຊຸມພົບປະຂັ້ນສູງເພື່ອຕີລາຄາການຮ່ວມມືຮອບດ້ານໃນໄລຍະເຄິ່ງສະໄໝການຈັດຕັ້ງປະຕິບັດບົດບັນທຶກຜ່ານລະບົບທາງໄກຂຶ້ນທີ່ສະໂມສອນຂອງແຂວງໃນວັນທີ 27 ສິງຫາຜ່ານມາໂດຍໃຫ້ກຽດເຂົ້າຮ່ວມຂອງ ສະຫາຍ ໂພໄຊ ໄຊຍະສອນ ກໍາມະການສູນກາງພັກເລຂາພັກແຂວງເຈົ້າແຂວງສາລະວັນ, ສໍາລັບຝ່າຍແຂວງກວາງຈິຈັດຂຶ້ນທີ່ ນະຄອນດົງຮ່າ ໂດຍການເປັນປະທານຂອງສະຫາຍ ເລກວາງ ຕຸ່ງ ກຳມະການສູນກາງພັກກອມມູ ນິດຫວຽດນາມ ເລຂາພັກແຂວງຫົວໜ້າຄະນະສະມາຊິກສະພາແຫ່ງຊາດແຂວງ ແລະມີບັນດາສະຫາຍຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງຫົວໜ້າພະແນກການອ້ອມຂ້າງແຂວງ, ຫົວໜ້າກອງບັນຊາການ ປກຊ-ປກສ ແລະ ຄະນະຜູ້ແທນທັງສອງຝ່າຍເຂົ້າຮ່ວມ.
   ສະຫາຍ ໂພໄຊ ໄຊຍະສອນ ກ່າວເປີດກອງປະຊຸມຄັ້ງນີ້ວ່າ: ການພົບປະລະຫວ່າງຄະນະຜູ້ແທນຂັ້ນສູງຂອງແຂວງສາລະວັນກັບຄະນະຜູ້ແທນຂັ້ນສູງຂອງແຂວງ ກວາງຈິ ເປັນນິມິດໝາຍທີ່ມີຄວາມສຳຄັນທີ່ຈະພ້ອມກັນຕີລາຄາການຮ່ວມມືວຽກງານຮອບດ້ານຂອງສອງແຂວງໃນໄລຍະເຄິ່ງສະໄໝເພື່ອຮັດແໜ້ນສາຍພົວພັນມິດຕະ ພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານ, ສະແດງອອກໃນການຊ່ວຍເຫຼືອຊຶ່ງກັນ ແລະກັນໃນຍາມວິກິດການເຊັ່ນ: ການຊ່ວຍເຫຼືອທາງດ້ານອຸ ປະກອນການແພດປ້ອງກັນພະຍາດໂຄວິດ-19, ສະແດງຄວາມເປັນຫວ່ງເປັນໃຍ, ແບ່ງສຸກແບ່ງທຸກດັ່ງຄຳເວົ້າຂອງຜູ້ນຳທີ່ແສນເຄົາລົບຮັກ “ເຂົ້າເມັດຫັກ, ຜັກເສັ້ນດຽວກໍແບ່ງກັນກິນ’’.


   ກອງປະຊຸມຄັ້ງນີ້ທັງສອງຝ່າຍກໍໄດ້ຜັດປ່ຽນກັນລາຍງານຜົນສຳເລັດກອງປະຊຸມໃຫຍ່ຂອງສອງພັກ, ສອງລັດກໍຄືສອງແຂວງສາລະວັນ ແລະແຂວງກວາງຈິ, ຕີລາ ຄາສະພາບລວມການພັດທະນາເສດຖະກິດ-ສັງຄົມ, ວຽກງານປະຕິບັດມາດຕະການປ້ອງກັນ,ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19, ຕີລາຄາການຮ່ວມມືຮອບດ້ານເຄິ່ງໄລຍະການຈັດຕັ້ງປະຕິບັດບົດບັນທຶກໄລຍະປີ 2020-2022 ເປັນຕົ້ນວຽກງານດ້ານການເມືອງ, ວຽກງານການຕ່າງປະເທດ, ວຽກງານແກ້ໄຂບັນຫາຄວາມສະຫງົບຕາມຊາຍແດນສອງແຂວງ, ບູລະນະຮັກສາຊາຍແດນ ແລະກໍ່ສ້າງພື້ນຖານໂຄງລ່າງ, ການຮ່ວມມືດ້ານການຄ້າ, ການທ່ອງທ່ຽວ, ການລົງທຶນ ແລະວຽກກໍ່ສ້າງພັດທະນາບຸກຄະລາກອນຄຽງຄູ່ກັບການເຝົ້າລະວັງ, ປ້ອງກັນພະຍາດໂຄວິດ-19 ຢ່າງເຂັ້ມງວດ. ໃນປີ 2020-2021 ແຂວງກວາງຈິ ໄດ້ມອບອຸປະກອນ ການແພດ ເພື່ອປ້ອງກັນພະຍາດໂຄ ວິດ-19 ລວມມູນຄ່າ 511 ລ້ານດົງ (ສະກຸນເງິນຫວຽດນາມ) ແລະ ພາກສ່ວນຕ່າງໆມອບ 120 ລ້ານກວ່າດົງ, ແຂວງສາລະວັນຍັງໄດ້ໃຫ້ການຊ່ວຍເຫຼືອແຂວງກວາງຈິທີ່ໄດ້ຮັບຜົນກະທົບຈາກໄພນໍ້າຖ້ວມເປັນເງິນ 50 ລ້ານກີບ ແລະເຂົ້າສານ 10 ໂຕນ ໃນປີ 2020.


   ຈາກນັ້ນ, ບັນດາຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ກໍໄດ້ແລກປ່ຽນ, ປະກອບຄຳຄິດເຫັນເພື່ອໃຫ້ການຮ່ວມມືລະຫວ່າງສອງແຂວງສາລະວັນ ແລະ ແຂວງກວາງຈິ ໃຫ້ ນັບມື້ນັບແໜ້ນແຟ້ນຂຶ້ນເລື້ອຍໆ ແລະ ຍາວນານຕະຫຼອດການ.
ຂ່າວ-ພາບ: ວິໄລວອນ ສິດທິໄຊ

แชร์