ລາວ-ອາເມລິກາ ສືບຕໍ່ຮ່ວມມື

 ໃນວັນທີ 26 ສິງຫາ 2021 ທີ່ນະຄອນຫຼວງວຽງຈັນ, ທ່ານ ປີເຕີ ເຮມ໋ອນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສະຫະລັດອາເມລິກາ ປະຈຳ ສປປ ລາວ ໄດ້ໃຫ້ສຳພາດ ຕໍ່ສື່ມວນຊົນເນື່ອງໃນໂອກາດຄົບຮອບ 5 ປີ ແຫ່ງການເປັນຄູ່ຮ່ວມມືແບບກວມລວມລາວ-ອາເມລິກາ ທີ່ໃກ້ຈະມາເຖິງນີ້ວ່າ: ຕະຫຼອດໄລຍະທີຜ່ານມີການຮ່ວມມືດັ່ງກ່າວໄດ້ມີການຂະຫຍາຍຕົວໃນຫຼາຍດ້ານເປັນຕົ້ນແມ່ນ: ດ້ານວຽກງານເກັບກູລະເບີດບໍ່ທັນແຕກທີ່ຍັງຕົກຄ້າງຢູ່ ສປປ ລາວ, ດ້ານການສຶກສາ, ສາ ທາລະນະສຸກ, ດ້ານໂພຊະນາການ, ວຽກງານຕ້ານການຄ້າມະນຸດ, ດ້ານການຊຸກຍູ້ເສດຖະກິດໃຫ້ເຕີບໂຕ, ດ້ານການບັງຄັບໃຊ້ກົດໝາຍ ແລະການສະໜັບສະໜູນດ້ານການພັດທະນາເສດຖະກິດ-ສັງຄົມ ຢູ່ ສປປ ລາວ.

    ທ່ານ ປີເຕີ ເຮມ໋ອນ ໃຫ້ຮູ້ວ່າ: ຕະຫຼອດໄລຍະ 5 ປີຜ່ານມາລັດຖະບານ ສະຫະລັດອາເມລິກາກໍ່ຄືສະຖານທູດໄດ້ຊ່ວຍຊຸກຍູ້ ແລະສະໜັບສະໜູນທາງດ້ານການຄ້າ ໂດຍສະເພາະການເຕີບໂຕຂອງເສດຖະກິດລາວໃນການເພີ່ມການນຳເຂົ້າ-ສົ່ງອອກລະຫວ່າງສອງປະເທດໃຫ້ຫຼາຍຂຶ້ນ, ໄດ້ມີໂຄງການສ້າງຄວາມເປັນຜູ້ນຳໃຫ້ກັບໄວ ໜຸ່ມ, ໂຄງການຊ່ວຍເຫຼືອໃນການອະນຸລັກຮັກສາວັດທະນະທໍາໃນເຂດມໍລະດົກໂລກຢູ່ແຂວງຊຽງຂວາງ ແລະຫຼວງພະບາງ.

   ນອກຈາກນັ້ນ, ຍັງໄດ້ຮ່ວມມືກັບບັນດາກະຊວງທີ່ກ່ຽວຂ້ອງຕ່າງໆຂອງ ສປປ ລາວ ໃນການພັດທະນາ ແລະປັບປຸງດ້ານຕ່າງໆເຊັ່ນ: ໄດ້ຮ່ວມມືກັບກະຊວງຍຸຕິທຳໃນການເປີດຫ້ອງການບໍລິການທາງດ້ານກົດໝາຍເພື່ອຊ່ວຍປະຊາຊົນໃນທົ່ວປະເທດໃຫ້ເຂົ້າເຖິງ ແລະ ການຮັບບໍລິການທາງດ້ານກົດໝາຍ, ຊ່ວຍເຫຼືອໃນວຽກງານການບັງຄັບໃຊ້ກົດໝາຍໃນການຕ້ານ ແລະປາບປາມການຄ້າຂາຍຢາເສບຕິດໂດຍສະເພາະແມ່ນບັນຫາການປູກຝິ່ນ, ຂາຍຝິ່ນ, ຕິດຝິ່ນ ແລະດ້ານອື່ນໆ.

   ການລະບາດຂອງພະຍາດໂຄວິດ-19 ລັດຖະບານອາເມລິກາໄດ້ຊ່ວຍເຫຼືອດ້ານອຸປະກອນການແພດ, ວັກແຊງ ແລະຊ່ວຍການຟື້ນຕົວຂອງເສດຖະກິດທີ່ໄດ້ຮັບຜົນກະທົບຈາກໂຄວິດ-19 ແກ່ ສປປ ລາວ. ນອກຈາກນີ້, ຍັງມີຫຼາຍໆ ໂຄງການທີ່ກຳລັງຈັດຕັ້ງປະຕິບັດຢູ່ໃນ ສປປ ລາວ ໂດຍສະເພາະໂຄງການຊ່ວຍເຫຼືອຄົນພິການມາແຕ່ກຳເນີດ ແລະພິການມາຈາກອຸປະຕິເຫດຢູ່ແຂວງຊຽງຂວາງ ແລະແຂວງສະຫວັນນະເຂດ.

แชร์