ຊາວແກ້ງກອກທີ່ ນວ ລະດົມທຶນສ້າງທາງບ້ານເກີດ

  ເມື່ອວັນທີ 28 ສິງຫາຜ່ານມາທີ່ສວນນາໜອງປາປ່າຍາງ ບ້ານບໍ່ນາງົວ ເມືອງຈັນທະບູລີ ນະຄອນຫຼວງວຽງຈັນ ຂອງທ່ານ ກອງມາລາ ພົມມາໄລ ເຈົ້າຂອງໂຮງງານເຄແອນບີເຟີນິເຈີໄດ້ມີກອງປະຊຸມພົບປະກາງແຈ້ງຢູ່ເດີ່ນສວນຂອງສະມາຊິກຄະນະສະມາຄົມອຸດໜູນການສຶກສາແກ້ງກອກຢູ່ນະຄອນຫຼວງວຽງຈັນໂດຍມີບັນດາສະມາ ຊິກຄະນະສະມາຄົມເຂົ້າຮ່ວມຢ່າງພ້ອມພຽງ.

  ທ່ານ ສົມບູນ ສົນທິກຸມມານ ປະທານສະມາຄົມອຸດໜູນການສຶກສາແກ້ງກອກທີ່ຢູ່ນະຄອນຫຼວງວຽງຈັນ ກ່າວວ່າ: ສຳລັບກອງປະຊຸມພົບປະຄັ້ງນີ້ແມ່ນເພື່ອລາຍງານຄືນການເຄື່ອນໄຫວຂອງສະມາຄົມໃນໄລຍະຜ່ານມາ, ເພື່ອເປັນການລະດົມທຶນເພື່ອສົມທົບການກໍ່ສ້າງເສັ້ນທາງເບຕົງຢູ່ເທສະບານແກ້ງກອກ ເມືອງຈຳພອນ ແຂວງສະຫວັນນະເຂດຊຶ່ງທາງເມືອງໄດ້ມີແຜນກໍ່ສ້າງ ແລະສ້າງສຳເລັດແລ້ວສ່ວນໜຶ່ງ, ແຕ່ຍັງຂາດທຶນຮອນຈຳນວນໜຶ່ງສະນັ້ນທາງສະມາຄົມຈຶ່ງໄດ້ເຕົ້າໂຮມສະມາຊິກເພື່ອປຸກລະດົມທຶນຮອນເມືອຊຸກຍູ້ໃຫ້ກັບການສ້າງເສັ້ນທາງດັ່ງກ່າວ, ຊຶ່ງທາງສະມາຄົມໄດ້ມີຄວາມຕັ້ງໃຈຢາກຕອບແທນບຸນຄຸນແຜ່ນດິນແມ່ກໍຄືປະກອບສ່ວນໃນການປົກປັກຮັກສາ ແລະພັດທະນາບ້ານເກີດເມືອງນອນໃຫ້ສົມໜ້າສົມຕາາສົມກັບວ່າເຄີຍເປັນທີ່ວ່າການແຂວງຈຳພອນໃນເມື່ອກ່ອນ.

   ທ່ານ ສົມບູນ ສົນທິກຸມມານ ກ່າວຕື່ມອີກວ່າ: ການສ້າງຕັ້ງສະມາຄົມຂຶ້ນມາແມ່ນເພື່ອເຕົ້າໂຮມຄວາມສະມັກຄີຂອງພີ່ນ້ອງຊາວບ້ານແກ້ງກອກເມືອງຈຳພອນແຂວງສະຫວັນນະເຂດ ທີ່ຢູ່ນະຄອນຫຼວງວຽງຈັນ, ເພື່ອເປັນການເຕົ້າໂຮມແນວຄວາມຄິດຄວາມເຫັນໃນການຊຸກຍູ້ການສ້າງສາພັດທະນາຢູ່ ເມືອງຈຳພອນ, ເພື່ອຊຸກຍູ້ຊ່ວຍເຫຼືອການສຶກສາຢູ່ເຂດເມືອງຈຳພອນໂດຍສະເພາະແມ່ນການຊ່ວຍເຫຼືອໂຮງຮຽນທີ່ມີຄວາມຂາດເຂີນທາງດ້ານອຸປະກອນການສຶກສາສ້າງເງື່ອນໃຫ້ລູກຫຼານໄດ້ມີ ເງື່ອນໄຂໃນການສຶກສາຮໍ່ຮຽນ, ສຳລັບສະມາຄົມດັ່ງກ່າວແມ່ນພາຍໃຕ້ການຕົກລົງຂອງທ່ານເຈົ້າເມືອງຈຳພອນ.

  ໃນໄລຍະຜ່ານມາທາງສະມາຄົມໄດ້ປະກອບສ່ວນຊ່ວຍທາງເມືອງຫຼາຍຢ່າງເປັນຕົ້ນແມ່ນສ້າງໂຮງຮຽນສົງບ້ານແກ້ງກອກ, ເຮັດປະຕູໂຂງວັດ, ເຮັດຫໍແຈກ, ຊ່ວຍເຫຼືອໄພນໍ້າຖ້ວມເມືອງຈຳພອນ ແລະອື່ນໆອີກຫຼາກຫຼາຍໃນຕະຫຼອດໄລຍະຜ່ານມາ.

• 31/08/2021