ກາວຊູ້ເຢົາຕ້ຽນຫວຽດ-ລາວ ຜະລິດນໍ້າຢາງພາລາ 10 ພັນໂຕນຕໍ່ປີ

ຂ່າວ: ໂພທິລາດ 

   ຄະນະອໍານວຍການພ້ອມດ້ວຍວິຊາການທີ່ກ່ຽວຂ້ອງຂອງໂຮງງານປຸງແຕ່ງຢາງພາລາ ບໍລິສັດ ຮຸ້ນສ່ວນພັດທະນາກາວຊູ້ເຢົາຕ້ຽນ ຫວຽດ-ລາວ ໄດ້ໃຫ້ການຕ້ອນຮັບທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າພ້ອມດ້ວຍ ທ່ານ ວິໄລວັນ ບຸດດາຄໍາ ເຈົ້າແຂວງໆ ຈໍາປາສັກ ພ້ອມດ້ວຍຄະນະທີ່ໄດ້ລົງເຄື່ອນໄຫວຢ້ຽມຢາມເຮັດວຽກງານຂົງເຂດທີ່ກ່ຽວຂ້ອງເມື່ອທ້າຍອາທິດທີ່ຜ່ານມາ.

   ທ່ານ ຮິງ ທັນ ຕຸງ ຜູ້ອໍານວຍການບໍລິສັດ ຮຸ້ນສ່ວນພັດທະນາກາວຊູ້ເຢົາຕ້ຽນ ຫວຽດ-ລາວ ໄດ້ກ່າວລາຍງານໃນໂອກາດດັ່ງກ່າວວ່າ: ໂຮງງານປຸງແຕ່ງຢາງພາລາເຢົາຕ້ຽນ ຫວຽດ-ລາວ ແມ່ນຕັ້ງຢູ່ບ້ານຂັນລາຍ ເມືອງບາຈຽງຈະເລີນສຸກ ແຂວງຈໍາປາສັກ, ບໍລິສັດຮຸ້ນສ່ວນພັດທະນາກາວຊູ້ເຢົາຕ້ຽນ ຫວຽດ-ລາວ ຈໍາກັດຜູ້ດຽວແມ່ນມີສໍານັກງານຕັ້ງຢູ່ຫຼັກ 10 ບ້ານໜອງນໍ້າຂາວ ເມືອງບາຈຽງຈະເລີນ ສຸກ, ປະກອບມີ 4 ນິຄົມ, 1 ໜ່ວຍຜະລິດ ແລະໂຮງງານປຸງແຕ່ງຢາງພາລາຈໍາປາສັກ.

   ໂດຍໄດ້ຮັບອະນຸຍາດລົງທຶນຕ່າງປະເທດຈາກກະຊວງແຜນການ ແລະການລົງທຶນ, ຊຶ່ງມີທຶນທັງໝົດ 43 ລ້ານໂດ ລາສະຫະລັດ, ທຶນຈົດທະບຽນ 12 ລ້ານກວ່າໂດລາສະຫະລັດ, ໂດຍບໍລິສັດໄດ້ດໍາເນີນກິດຈະການປູກ, ບົວລະບັດ ແລະປຸງແຕ່ງຢາງພາລາເພື່ອສົ່ງອອກ, ຊຶ່ງມີເນື້ອທີ່ສວນທັງໝົດ 6.722,66 ເຮັກຕາ, ໃນນັ້ນເນື້ອທີ່ໃນແຂວງຈໍາປາສັກ 5.242,83 ເຮັກຕາ ແລະ ຢູ່ແຂວງສາລະວັນມີ 1.479,69 ເຮັດຕາ, ປະຈຸບັນມີເນື້ອທີ່ສ່ວນສາມາດກີດຢາງໄດ້ 6.234,69 ເຮັກຕາ ແລະເນື້ອທີ່ຍັງບໍ່ທັນສາມາດກີດຢາງໄດ້ 284,56 ເຮັກຕາ ແລະເນື້ອທີ່ຢຸດເຊົາບົວລະບັດ 203,41 ເຮັດຕາ, ປະລິມານນໍ້າຢາງທີ່ສາມາດກີດໄດ້ໃນແຕ່ລະປີສະເລ່ຍ 10 ພັນໂຕນຕໍ່ປີ. ທ່ານຜູ້ອໍານວຍການໃຫ້ຮູ້ຕື່ມວ່າ: ໂຮງງານປຸງແຕ່ງຢາງພາລາປະກອບມີ 2 ສາຍພານ, ຊຶ່ງມີກໍາລັງການຜະລິດ 9 ພັນໂຕນຕໍ່ປີ, ມີລະບົບສະໜອງນໍ້າ ແລະ ລະບົບບໍາບັດນໍ້າເສຍທີ່ໄດ້ມາດຕະຖານຮັບປະກັນດ້ານສີ່ງແວດລ້ອມ, ບໍລິສັດຮຸ້ນສ່ວນພັດທະນາກາວຊູເຢົ້າຕຽນຫວຽດ-ລາວ ຈໍາກັດຜູ້ດຽວ, ມີພະນັກງານກໍາມະກອນທັງໝົດ 1.741 ຄົນ, ໃນນັ້ນແຮງງານຄົນຫວຽດນາມມີ 160 ຄົນ ແລະແຮງງານຄົນລາວ 1.581 ຄົນ.

แชร์