200 ກວ່າຮ້ານປຶ້ມເຂົ້າຮ່ວມບຸນມະໂຫລານສົ່ງເສີມການອ່ານ

  ງານບຸນມະໂຫລານສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ 1 ແມ່ນເວທີສໍາຄັນໃນການສົ່ງເສີມທັງຜູ້ຂຽນ ແລະຜູ້ອ່ານໄດ້ເປີດຂຶ້ນຢ່າງເປັນທາງການ ແລະຈະດໍາເນີນເປັນເວລາ 11 ວັນ ໃນງານມີຜູ້ປະກອບການ 200 ກວ່າຫົວໜ່ວຍນໍາເອົາຜົນງານຂຽນທັງພາຍໃນ ແລະຕ່າງປະເທດມາໂຮມ ໄວ້ບ່ອນດຽວ.

  ງານຄັ້ງນີ້ຈັດໃນລະຫວ່າງວັນທີ 7-17 ມີນາ 2019 ທີ່ລານດ້ານສູນການຄ້າສາກົນ ນະຄອນຫຼວງວຽງຈັນ ໂດຍການເຂົ້າຮ່ວມໃນພິທີເປີດຂອງທ່ານ ສີຫຸນ ສິດທີສືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານນາງ ດາລາ ກັນລາຍາ ນັກປະພັນອາວຸໂສ, ສີລະປິນແຫ່ງຊາດພ້ອມດ້ວຍບັນດາຕາງໜ້າຈາກອົງການສາກົນ, ຄູອາຈານ ແລະນ້ອງນັກຮຽນເຂົ້າຮ່ວມ.

  ທ່ານ ສີຫຸນ ສິດທີສືໄຊ ກ່າວວ່າ: ການຈັດງານບຸນມະໂຫລານສົ່ງເສີມການອ່ານນະຄອນຫຼວງວຽງຈັນຄັ້ງທີ 1 ນີ້ແມ່ນເພື່ອເລັ່ງເຫັນຄວາມສໍາຄັນຂອງການ ອ່ານ ແລະສົ່ງເສີມໃຫ້ອ່ານໜັງສືຢ່າງຕໍ່ເນື່ອງລວມເຖິງການຊ່ວຍເຫຼືອຂອງພໍ່ແມ່ຜູ້ປົກຄອງ, ຄູ-ອາຈານ ແລະນ້ອງນັກຮຽນຮັບຮູ້ ແລະເຂົ້າໃຈເຕັກນິກວິທີ ການສົ່ງເສີມການອ່ານແກ່ເດັກ ແລະເຍົາວະຊົນຢ່າງເໝາະສົມ, ພ້ອມກັນນັ້ນຍັງໄດ້ເປີດໂອກາດໃຫ້ຄົນລາວໄດ້ສໍາຜັດກັບປຶ້ມຈາກນາໆຊາດ, ເພື່ອເປີດໂລກະທັດ ແລະ ເບິ່ງເຫັນການພັດທະນາອຸດສະຫະກໍາປຶ້ມໃນຕ່າງປະເທດ. ຂະນະດຽວກັນກໍ່ເປີດໂອກາດໃຫ້ຄົນຕ່າງຊາດສໍາຜັດກັບປຶ້ມອ່ານຂອງລາວ ແລະຍັງເປັນສື່ກາງ ໃນການສ້າງໂອກາດໃຫ້ກັບນັກຂຽນ ແລະສໍານັກພິມຂອງລາວ ໃນການຈໍາ ໜ່າຍລິຂະສິດໃຫ້ກັບຕ່າງປະເທດ ນອກ ນັ້ນຍັງເຮັດໃຫ້ສໍານັກພິມມີຄວາມຕື່ມ ຕົວປັບປຸງ ແລະພັດທະນາການຜະລິດ ປຶ້ມອ່ານໃຫ້ມີຄຸນນະພາບທີ່ຫຼາກຫຼາຍສີ ສັນເປັນປະໂຫຍດຕໍ່ຜູ້ອ່ານ ແລະພັດທະ ນາເສດຖະກິດ-ສັງຄົມ.

  ໃນງານດັ່ງກ່າວມີການວາງສະແດງສື່ສິ່ງພິມຕ່າງໆເປັນຕົ້ນແມ່ນປຶ້ມອ່ານຈໍານວນຫຼາຍກວ່າ 200 ຮ້ານ, ມີກິດຈະກໍາແຈກຢາຍປຶ້ມໃຫ້ບັນດາການນໍາພັກ-ລັດ ແລະໂຮງຮຽນຕ່າງໆໃນທົ່ວນະຄອນຫຼວງວຽງຈັນ, ມີກິດຈະກໍາຖາມ-ຕອບ ຄວາມຮູ້ຮອບຕົວສໍາລັບນັກຮຽນ ແລະ ນັກກີລາຕ່າງໆນອກນັ້ນຍັງໄດ້ພົບກັບ ບັນດານັກຂຽນ, ນັກແຕ່ງ ແລະນັກເວົ້າທີ່ມີປະສົບການສູງຈາກພາຍໃນ ແລະ ຕ່າງປະເທດ.

ຂ່າວ: ວົງມະນີ      

แชร์