ອາເມລິກາ ຊ່ວຍລາວ 129 ແສນໂດລາ ອະນຸລັກມໍລະດົກທົ່ງໄຫຫີນ

 ສະຫະລັດອາເມລິກາໄດ້ປະກາດທີ່ຈະມອບທຶນຈໍານວນ 129.000 ໂດລາ ໃນການອະນຸລັກຮັກສາແຫຼ່ງບູຮານສະຖານ (500 BC-500AD) ທົ່ງໄຫຫີນມໍລະດົກໂລກ UNESCO ແຂວງຊຽງຂວາງ, ຊຶ່ງທຶນນີ້ເປັນສ່ວນໜຶ່ງຂອງກອງທຶນທ່ານທູດເພື່ອການອະນຸລັກວັດທະນະທໍາ (AFCP).

   ທ່ານເອກອັກຄະລັດຖະທູດ ປະຈໍາ ສປປ ລາວ ທ່ານ ປີເຕີ ເຮມ໋ອນ ໄດ້ປະກາດທຶນໃນພິທີຢູ່ທີ່ທົ່ງໄຫຫີນເມື່ອອາທິດຜ່ານມານີ້ຊຶ່ງເຂົ້າຮ່ວມໂດຍທ່ານຮອງເຈົ້າແຂວງຊຽງຂວາງ ທ່ານ ສິວິໄລ ແສງຈະເລີນ ແລະທ່ານຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະທ່ອງທ່ຽວ ທ່ານ ອຸ່ນທວງ ຂາວພັນ ພ້ອມດ້ວຍຜູ້ຕາງໜ້າຈາກກະຊວງການຕ່າງປະເທດ ແລະພາກສ່ວນກ່ຽວຂ້ອງຂອງທັງສອງຝ່າຍ.

   ທ່ານເອກອັກຄະລັດຖະທູດ ປີເຕີ ເຮ ມ໋ອນ ກ່າວວ່າ: ຂ້າພະເຈົ້າມີຄວາມຮູ້ສຶກດີໃຈທີ່ສຸດທີ່ໄດ້ເປັນສ່ວນໜຶ່ງໃນການສືບຕໍ່ປົກປັກຮັກສາແຫຼ່ງວັດທະນະທໍາທາງດ້ານປະຫວັດສາດທີ່ໜ້າປະທັບໃຈີ້. ໄຫຫີນໃຫຍ່ນີ້ເປັນສິ່ງທີ່ອ້າງອີງເຖິງຮີດຄອງປະເພນີຂອງ ສປປ ລາວ ຊຶ່ງນັບຫວນຄືນຫຼັງຫຼາຍພັນປີ. ໃນຂະນະທີ່ພວກເຮົາພວມສະເຫຼີມສະຫຼອງ ຄົບຮອບ5 ປີ ສາຍພົວພັນແບບກວມລວມລະຫວ່າງ ສະຫະລັດ ອາເມລິກາ ແລະ ສປປ ລາວ ແລະການສະເຫຼີມສະຫຼອງ ຄົບຮອບ 20 ປີ ຂອງ ໂຄງການ AFCP ໃນ ສປປ ລາວ, ພວກເຮົາມີຄວາມໝາຍໝັ້ນທີ່ຈະເຮັດວຽກຮ່ວມກັບປະຊາຊົນ ແລະ ລັດຖະບານ ສປປ ລາວ ໃນທຸກດ້ານໃນການປົກປັກຮັກສາ ແລະພັດທະນາເສດຖະກິດ ແລະສັງຄົມ.

   ສໍາລັບທຶນໂຄງການ AFCP ທີ່ທົ່ງໄຫຫີນນີ້ແມ່ນໄດ້ມີສາມອົງປະກອບຫຼັກ ຄື:ການສ້າງຖານຂໍ້ມູນໄຫຫີນ ແລະລະບົບ GIS ເພື່ອຮັກສາບັນຊີລາຍຊື່ໄຫຫີນ ແລະ ແຫຼ່ງໄຫຫີນ, ການອະນູລັກຮັກສາ ແລະບູລະນະຄຸ້ມຄອງໄຫຫີນທີ່ມີຄວາມເສຍຫາຍລວມທັງຝາປິດພ້ອມ. ນອກນັ້ນຍັງຈະໄດ້ມີການສ້າງຄວາມເຂັ້ມແຂງໃຫ້ແກ່ພະນັກງານແລະເຈົ້າໜ້າທີ່ຫ້ອງການມໍລະດົກໂລກທີ່ຮັບຜິດຊອບໃນເຂດມໍລະດົກແຫ່ງນີ້. 

    ປີນີ້ເປັນປີແຫ່ງການສະເຫຼີມສະຫຼອງຄົບຮອບ 20 ປີ ຂອງໂຄງການ AFCP ໃນທົ່ວໂລກກໍ່ຄືໃນ ສປປ ລາວ. ທຶນ ທ່ານເອກອັກຄະລັດຖະທູດໄດ້ໃຫ້ການສົ່ງເສີມສະໜັບສະໜູນໂຄງການຕ່າງໆ ໃນທົ່ວໂລກເພື່ອອະນຸລັກຮັກສາຄວາມຫຼາກຫຼາຍມໍລະດົກທາງວັດທະນະທຳແຫ່ງຊາດໃນຫຼາຍຂອບເຂດໃນບັນດາປະເທດທີ່ດ້ອຍພັດທະນາຊຶ່ງລວມມີການປົກປັກຮັກສາຕຶກອາຄານທາງດ້ານປະຫວັດສາດ, ແຫຼ່ງບູຮານຄະດີ, ວັດຖຸທາງວັດທະນະທຳຂອງຊົນເຜົ່າ, ຮູບແຕ້ມ, ໜັງສືໃບລານ, ພາສາພື້ນເມືອງດັ້ງເດີມ ແລະສິ່ງສະແດງອອກທາງດ້ານວັດທະນະທໍາຮີດຄອງປະເພນີໃນຮູບແບບຕ່າໆ.

แชร์