ໂຮງງານກາເຟດາວ ຜະລິດເຖິງ 3,5 ພັນໂຕນຕໍ່ປີ

   ໂຮງງານກາເຟສຳເລັດຮູບກາເຟດາວ ຢູ່ເມືອງບາຈຽງຈະເລີນສຸກ ແຂວງຈຳປາສັກ ພາຍຫຼັງສ້າງຕັ້ງມາເກືອບ 10 ປີ ເວລານີ້ມີສວນກາເຟຂອງກຸ່ມກວ່າ 200 ເຮັກຕາ ສາມາດສ້າງວຽກເຮັດງານທຳແກ່ແຮງງານພາຍໃນໂຮງງານ 500 ກວ່າຄົນ ໂດຍໂຮງງານແຫ່ງນີ້ສາມາດຜະລິດກາເຟສຳເລັດຮູບໄດ້ 3,5 ພັນໂຕນຕໍ່ປີ.

   ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະການຄ້າພ້ອມດ້ວຍຄະນະໄດ້ເຄື່ອນໄຫວຢ້ຽມຢາມໂຮງງານກາເຟສຳເລັດຮູບ Dao Coffee ໂດຍມີທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ພ້ອມດ້ວຍການນຳພະແນກການທີ່ກ່ຽວຂ້ອງເຂົ້າຮ່ວມໃນວັນທີ 26 ສິງຫາຜ່ານມາໂດຍການຕ້ອນຮັບຂອງທ່ານ ນາງ ບຸນເຮືອງ ແຄລໍລິດດັງ ຮອງປະທານກຸ່ມບໍລິສັດດາວເຮືອງ.

   ໂອກາດນີ້, ທ່ານລັດຖະມົນຕີກະຊວງອຸດສາຫະກໍາ ແລະການຄ້າ ແລະທ່ານເຈົ້າແຂວງຈຳປາສັກພ້ອມຄະນະໄດ້ຮັບຟັງການລາຍງານຈາກຜູ້ອຳນວຍການກຸ່ມບໍລິສັດ ດາວເຮືອງສາຂາປາກເຊຮູ້ວ່າ: ໂຮງງານກາເຟສຳເລັດຮູບກາເຟດາວ Dao Coffee ຕັ້ງຢູ່ບ້ານຫຼັກ 21 ເມືອງບາຈຽງຈະເລີນສຸກ ແຂວງຈຳປາສັກ ມີເນື້ອທີ່ລວມທັງໝົດ 13 ເຮັກຕາ, ມີຄວາມສູງຈາກລະດັບໜ້ານໍ້າທະເລ 400-500 ແມັດ, ອຸນຫະພູມສະເລ່ຍ 30-32 ອົງສາ ຕະຫຼອດປີ. ເນື້ອທີ່ສວນປູກກາເຟຂອງກຸ່ມບໍລິສັດດາວເຮືອງມີຈຳນວນ 250 ເຮັກຕາ ປູກພັນອາລາບຣິກາຢູ ຢູ່ເຂດພູພຽງບໍລະເວນ ເມືອງປາກຊ່ອງ ແຂວງຈຳປາສັກ. ໃນລະດັບຄວາມສູງຈາກນໍ້າທະເລປະມານ 1.200 ແມັດ. ເປັນດິນພູໄຟເກົ່າ. ພ້ອມດຽວກັນນັ້ນທາງບໍລິສັດກໍ່ໄດ້ເຮັດການສົ່ງເສີມການປູກກາເຟຮ່ວມກັບຊາວສວນໃນຮູບແບບ 2+3 ຕາມແນວທາງນະໂຍບາຍຂອງພັກ-ລັດ.

ໂຮງງານໄດ້ສ້າງຕັ້ງຂຶ້ນແຕ່ປີ 2012, ຊຶ່ງມີກຳລັງການຜະລິດສູງເຖິງ 3,5 ພັນໂຕນຕໍ່ປີ ແລະໄດ້ນຳໃຊ້ລະບົບອຸດສະຫະກຳພັດທະນາຄຸນນະພາບໃຫ້ໄດ້ມາດຕະຖານຢູ່ຕະຫຼອດຣົບ, ຊຶ່ງເຄື່ອງຈັກທັງໝົດທີ່ຢູ່ໃນໂຮງງານແມ່ນນຳເຂົ້າຈາກຍີ່ຫໍ້ເຄື່ອງຈັກທີ່ມີຊື່ສຽງໂດ່ງດັງເຊັ່ນ: ເຄື່ອງຂົ້ວກາເຟຂອງ PROBAT ຈາກປະເທດເຢຍລະມັນ, ເຄື່ອງຈັກລະບົບຜະລິດກາເຟສຳເລັດຮູບຂອງ NIRO ຈາກປະເທດເດັນມາກ ແລະເຄື່ອງຈັກບັນຈຸພັນຂອງ SANKO ຈາກປະເທດຍີ່ປຸ່ນເພື່ອຜະລິດອາຫານໃຫ້ມີຄຸນ ນະພາບສູງ ແລະໃຫ້ໄດ້ມາດຕະຖານ.

   ໂຮງງານແຫ່ງນີ້ມີຈຳນວນພະນັກງານ ທັງໝົດ 500 ກວ່າຄົນ, ເຊິ່ງວ່າທາງບໍລິສັດໄດ້ມີນະໂຍບາຍໃນການດູແລພະນັກງານ ຄືຄອບຄົວດຽວກັນເປັນຄອບຄົວກາເຟດາວ. ໃນນັ້ນຈະມີບ້ານພັກພະນັກງານ, ໂຮງອາຫານ, ສຸກສາລາປະຈຳໂຮງງານພ້ອມນັ້ນຍັງມີນະໂຍບາຍໃນການກວດເຊັກສຸຂະພາບປະຈຳປີ, ມີລົດຮັບສົ່ງພະນັກງານ ຊຶ່ງເປັນສະຫວັດດີການເຊິ່ງກຸ່ມບໍລິສັດດາວເຮືອງໄດ້ຈັດຕັ້ງຂຶ້ນ.

  ຈາກນັ້ນ, ທ່ານລັດຖະມົນຕີກະຊວງອຸດສາຫະກໍາ ແລະການຄ້າ ແລະທ່ານເຈົ້າ ແຂວງຈຳປາສັກ ພ້ອມຄະນະໄດ້ລົງເບິ່ງຂະບວນການຜະລິດ. ໂຮງງານດັ່ງກ່າວມີພະແນກ QA ຫຼື ພະແນກຄວບຄຸມຄຸນນະພາບມີໜ້າທີ່ກວດສອບຄຸນນະພາບ ແລະຄວາມສະອາດປອດໄພຂອງຜະລິດຕະພັນອາຫານທີ່ຢູ່ໃນໂຮງງານໃນຈຸດປະສົງ ເພື່ອຜະລິດຕະພັນທີ່ມີຄຸນນະພາບປອດໄພ ແລະສືບຕໍ່ພັດທະນາຄຸນນະພາບໃຫ້ໄດ້ມາດຕະຖານຢູ່ຕະຫຼອດ.

 ປັດຈຸບັນໂຮງງານກາເຟດາວໄດ້ນໍາໃຊ້ລະບົບຄວາມສະອາດປອດໄພຂອງຜະລິດຕະພັນອາຫານກໍຄື: ISO 22000. HACCP. GMP ທີ່ຜ່ານການກວດສອບໂດຍສະຖາບັນ SGS ປະເທດໄທ. ໂດຍຜະລິດຕະພັນຂອງກາເຟດາວມີກາເຟຂົ້ວເມັດ ແລະກາເຟສຳເລັດຮູບ ແລະຮູບແບບຂອງການຜະລິດເລີ່ມຕົ້ນຈາກສ່ວນປູກຝັງຈົນຮອດຂະບວນການສຸດທ້າຍຂອງການແປຮູບເປັນຜະລິດຕະພັນກາເຟດາວໄດ້ມີການກວດສອບຂັ້ນຕອນຂອງຜະລິດຕະພັນຕັ້ງແຕ່ວັດຖຸດິບຈົນຮອດຜະລິດຕະພັນສຳເລັດຮູບ.

แชร์