5 ປີ ເສຍຫາຍກວ່າ 5 ພັນຕື້ກີບ ຍ້ອນໄພພິບັດ

ຂ່າວ: ມະໄລວັນ 

   ບັນຫາໄພພິບັດ ແລະຄວາມສ່ຽງຈາກການປ່ຽນແປງຂອງດິນຟ້າອາກາດເປັນຕົ້ນແມ່ນໄພນໍ້າຖ້ວມ, ແຜ່ນດິນໄຫວ, ລົມພາຍຸພັດ, ການລະບາດຂອງພະຍາດອື່ນໆ ມີຄວາມຮຸນແຮງ ແລະເພີ່ມຂຶ້ນເລື້ອຍໆຢູ່ ສປປ ລາວ ສະເພາະ 5 ປີ ຜ່ານມາສ້າງຄວາມເສຍຫາຍກວ່າ 5 ພັນຕື້ກີບ ພ້ອມນັ້ນຍັງມີຜູ້ເສຍຊີວິດ 1 ຮ້ອຍກວ່າຄົນ.

ກອງປະຊຸມເຜີຍແຜ່ກົດໝາຍວ່າດ້ວຍການຄຸ້ມຄອງໄພພິບັດໄດ້ຈັດຂຶ້ນໃນວັນທີ 24 ສິງຫາຜ່ານມານີ້ທີ່ຫ້ອງປະຊຸມ ພະແນກສຶກສາທິການ ແລະກີລາແຂວງໄຊຍະບູລີ ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງປະທານຄະນະກໍາມະການຄຸ້ມຄອງໄພພິບັດຂັ້ນແຂວງ,ມີທ່ານ ກິນດາວົງ ຫຼວງລາດ ຮອງຫົວໜ້າກົມສັງຄົມສົງເຄາະກະຊວງແຮງງານ ແລະສະຫວັດດີການສັງຄົມ, ມີພາກສ່ວນກ່ຽວຂ້ອງພາຍໃນແຂວງເຂົ້າຮ່ວມ.

 ທ່ານ ເພັດພິໄຊ ສູນວິໄລ ໄດ້ກ່າວວ່າ: ປະຈຸບັນບັນຫາໄພພິບັດ ແລະຄວາມສ່ຽງຈາກການປ່ຽນແປງຂອງດິນຟ້າອາກາດເປັນຕົ້ນແມ່ນໄພນໍ້າຖ້ວມ, ແຜ່ນດິນໄຫວ, ຄື້ນຊຸນາມິ, ລົມພາຍຸພັດ, ການລະບາດຂອງພະຍາດອື່ນໆມີຄວາມຮຸນແຮງ ແລະເພີ່ມຂຶ້ນເລື້ອຍໆ ຊຶ່ງເປັນສິ່ງທ້າທາຍໃນການພັດທະນາຂອງບັນດາພາກພື້ນ ແລະສາກົນ.

  ສະເພາະຢູ່ ສປປ ລາວ ບັນຫາຜົນກະທົບຂອງໄພພິບັດນັບມື້ມີຄວາມຮຸນແຮງຂຶ້ນ ແລະສ້າງຄວາມເສຍຫາຍຢ່າງຫຼວງຫຼາຍທີ່ສຸດຊຶ່ງໃນໄລຍະ 5 ປີຜ່ານມາໄດ້ມີເຫດ ການໄພພິບັດເກີດຂຶ້ນຈໍານວນທັງໝົດ 235 ຄັ້ງ, ສົ່ງຜົນກະທົບໂດຍກົງຕໍ່ປະຊາຊົນ 1 ລ້ານກວ່າຄົນ, ເສຍຊີວິດ 1 ຮ້ອຍ ກວ່າຄົນ, ສູນຫາຍ 45 ຄົນ, ສ້າງຄວາມ ເສຍຫາຍຕໍ່ຂະແໜງການສັງຄົມ, ການຜະລິດ, ພື້ນຖານໂຄງລ່າງຊຶ່ງຄິດເປັນມູນຄ່າເສຍຫາຍຫຼາຍກວ່າ 5 ພັນກວ່າຕື້.

   ສໍາລັບແຂວງໄຊຍະບູລີກໍ່ເປັນແຂວງໜຶ່ງທີ່ມີຄວາມຫຼໍ່ແຫຼມຈາກການເກີດໄພພິບັດນໍ້າຖ້ວມຊຸ ຫຼືລົມພາຍຸພັດຜ່ານມາກໍ່ເຄີຍໄດ້ຮັບຜົນກະທົບຈາກສະພາບໄພພິບັດເຮັດໃຫ້ກະທົບຕໍ່ໂຄງລ່າງພື້ນຖານ ແລະຊີວິດການເປັນຢູ່ຂອງປະຊາຊົນພາຍໃນແຂວງເຮັດໃຫ້ຖ່ວງດຶງການພັດທະນາເສດຖະກິດ-ສັງຄົມຂອງບ້ານ, ເມືອງກໍ່ຄືແຂວງຂອງພວກເຮົາເນື່ອງຈາກສະພາບການປ່ຽນແປງດິນຟ້າອາກາດບໍ່ໄປຕາມລະດູການການຜັນປ່ຽນສະພາບບໍ່ປົກກະຕິແນວນີ້ ພວກເຮົາຕ້ອງໄດ້ມີການລະມັດລະວັງປ້ອງກັນ ແລະກຽມພ້ອມທຸກເວລາ, ກົດໝາຍວ່າດ້ວຍການຄຸ້ມຄອງໄພພິບັດສະບັບນີ້ປະກອບມີ X ພາກ 70 ມາດຕາ.

แชร์