ຄອບຄົວບຸນລໍ້າດີຂື້ນ ຍ້ອນດຸໝັ່ນຮູ້ໃຊ້ແຫຼ່ງທຶນ

ຂ່າວ: ຣັດສະໝີ ດວງສັດຈະ 

 ຜູ້ຂຽນມີໂອກາດນັ່ງລົມກັບ ບຸນລໍ້າ ວົງປັນຍາ ຊາວບ້ານໄຮ່ເໜືອ, ເມືອງສັງທອງ, ນະຄອນຫຼວງວຽງຈັນ ເຈົ້າຂອງ ຝູງງົວ-ຝູງຄວາຍ ຢູ່ກັບຖຽງຄັງລ້ຽງສັດ; ລາວໃສ່ໝວກໃບໃຫຍ່, ນຸ່ງຖືແບບບໍ່ຖືຕົວ, ທັງໂອ້ລົມ, ທັງເອົາເຟືອງໃຫ້ງົວ-ຄວາຍ ກິນ; ຄອບຄົວລາວມີ 8 ຄົນ, ຍິງ 4 ຄົນ, ມີແຮງງານຕົ້ນຕໍ 4 ຄົນ ຊຶ່ງແຮງງານຫຼັກໆກໍ່ມີເມຍທີ່ເປັນຄູ່ສ້າງຄູ່ສົມໂດຍຖືເອົາການປູກຝັງ-ລ້ຽງສັດເປັນຕົ້ນຕໍ, ເອົາການຄ້າຂາຍເປັນສໍາຮອງ.

    ທ່ານ ບຸນລໍ້າ ເວົ້າວ່າ: “ເງິນມາປັນຍາ ເກີດ...ມີປັນຍາບໍ່ແພ້ແຕ່ທຶນຄ້າພັດບໍ່ມີ”, ສໍາຄັນເຮົາຕ້ອງດຸ-ຕ້ອງໝັ່ນ, ຮູ້ປະຢັດ, ອົດທົນ, ມີຫຼັກວິຊາການໃນການລ້ຽງການປູກ ແລະບໍລິຫານເງິນທີ່ມີຢູ່ຢ່າງມືອາຊີບຈຶ່ງສາມາດຜ່ານຜ່າສູ່ຊີວິດທີ່ດີລື່ນເກົ່າ; ກ່ອນໜ້ານີ້, ຊີວິດການເປັນຢູ່ຂອງຄອບຄົວຝືດເຄືອງຫຼາຍ, ຂາດທຶນຮອນໃນການເຮັດນາ-ລ້ຽງສັດ, ເຮັດພຽງແຕ່ກຸ້ມກິນ ຫຼືບໍ່ກໍ່ຫຍຸ້ງຍາກ, ຊອກກູ້ຢືມເງິນນອກລະບົບພັດດອກເບ້ຍສູງຫຼາຍ, ບໍ່ມີ ຫຼັກຊັບປະກັນ; ສະນັ້ນ, ຍ້ອນແນວທາງ ຂອງພັກ ແລະລັດຖະບານໃນການລຶບລ້າງຄວາມທຸກຍາກບວກກັບການສະໜອງແຫຼ່ງທຶນດອກເບ້ຍຕໍ່າຂອງທະນາຄານນະໂຍບາຍ (ທນບ); ໃນປີ 2007 ຈຶ່ງໄດ້ປຶກສາກັບຄອບຄົວເພື່ອກູ້ຢືມເງິນຈາກ ທນບ ມາປູກເຂົ້າ ແລະລ້ຽງງົວ ໂດຍເລີ່ມແຕ່ປີ 2008-2019 ໃນວົງເງິນ 5.000.000 ກີບລົງມາບວກກັບເງິນທີ່ສະສົມມາ ແລະໃນປີ 2020 ໄດ້ກູ້ເງິນລ້ຽງງົວ 30.000.000 ກີບ, ປູກເຂົ້ານາປີ 5.000.000 ກີບ ແລະ ມີການຊຸກຍູ້, ຕິດຕາມເປັນປະຈໍາຂອງ ທນບ ກັບປະຕິບັດສັນຍາກູ້ຢືມຢ່າງເຂັ້ມງວດຈຶ່ງໄດ້ຊໍາລະຕົ້ນ+ດອກເບ້ຍເຫຼືອ 0 ໃນທຸກປີ.

   ທ່ານ ບຸນລໍ້າ ໃຫ້ຮູ້ຕື່ມວ່າ: ການນໍາໃຊ້ແຫຼ່ງທຶນ ທນບ ແມ່ນເກີດປະໂຫຍດສູງຍ້ອນດອກເບ້ຍມັນຕໍ່າຫຼາຍ; ສາມາດຜະລິດເຂົ້າໄດ້ 13,5 ໂຕນຕໍ່ປີ, ສ້າງລາຍຮັບໄດ້ສະເລ່ຍ 35.000.000 ກີບຕໍ່ປີ; ປະຈຸບັນກໍ່ລ້ຽງງົວ 26 ໂຕ, ຄວາຍ 6 ໂຕ ໃນນີ້ໄດ້ນໍາໃຊ້ແຫຼ່ງທຶນຂອງ ທນບ ຊື້ຈໍານວນ 6 ໂຕ ແລະ ອອກລູກຕື່ມອີກ 6 ໂຕ; ຍ້ອນມີລາຍຮັບຈາກການຂາຍເຂົ້າ, ຂາຍຄວາຍທີ່ໄດ້ສະສົມໃນແຕ່ລະປີຜ່ານມາສາມາດຊື້ລົດໄຖນາໃຫຍ່ 1 ຄັນ ມູນຄ່າ 375.000.000 ກີບ, ລົດກະບະ (ໂຕໂຍຕ້າລີໂວ້) 1 ຄັນ ມູນຄ່າປະມານ 384.000.000 ກີບ ຫຼື 40.000 ໂດລາ, ລົດກະບະ (ຮຸນໄດ) 1 ຄັນ ມູນຄ່າ 52.000.000 ກີບ ແລະຈັກຟາດເຂົ້າ 1 ເຄື່ອງ.

 ຄອບຄົວ ວົງປັນຍາ ຍັງກ່າວສະແດງຄວາມຮູ້ບຸນຄຸນອັນສູງມາຍັງຂັ້ນເທິງໂດຍສະເພາະການນໍາຂອງເມືອງ ແລະດ້ວຍການສະໜັບສະໜູນແຫຼ່ງທຶນ-ສິນເຊື່ອດອກເບ້ຍນະໂຍບາຍຂອງລັດຖະບານທີ່ ທນບ ສະໜອງໃຫ້ເພື່ອທໍາການຜະລິດສາມາດໄດ້ຮັບຜົນສູງເຮັດໃຫ້ຄອບຄົວຂອງຂ້າພະເຈົ້າທີ່ເຄີຍຫຍຸ້ງຍາກຂາດເຂີນທຶນຮອນ, ເປັນຄອບຄົວທີ່ບໍ່ພຽງພໍໃນເມື່ອກ່ອນຈົນກາຍມາເປັນຄອບຄົວທີ່ມີຢູ່-ມີກິນຄືໃນທຸກມື້ນີ້.

แชร์