ກອງທຶນພັດທະນາບ້ານບໍລິຄໍາໄຊຮັບສິນເຊື່ອ 52%

ຂ່າວ: ຣັດສະໝີ ດວງສັດຈະ 

  ໃນຫວ່າງບໍ່ດົນມານີ້; ທ່ານ ສຸພັນສາ ສະຫວັນວິໄລ ຜູ້ປະສານງານຂັ້ນແຂວງປະຈໍາແຂວງບໍລິຄໍາໄຊໄດ້ຊີ້ແຈງຜົນການຈັດຕັ້ງປະຕິບັດແຜນງານລາວ /030 ໃຫ້ການສະໜັບສະໜູນການຫຼຸດຜ່ອນຄວາມທຸກຍາກໃນບັນດາບ້ານເປົ້າໝາຍທີ່ຖືກຄັດເລືອກຢູ່ໃນ 4 ແຂວງຂອງ ສປປ ລາວ ຊຶ່ງໜຶ່ງກົນໄກຂອງການສະໜັບສະໜູນແມ່ນ “ກອງທຶນພັດທະນາບ້ານ” (ກພບ) ຊຶ່ງໄດ້ຖືກຈັດສັນ ແລະຄຸ້ມຄອງໂດຍແຕ່ລະບ້ານ; ຂະໜາດຂອງກອງທຶນແມ່ນຂຶ້ນກັບຈໍານວນປະຊາກອນພາຍໃນບ້ານ.

   ປະຈຸບັນແຂວງບໍລິຄໍາໄຊມີກອງທຶນສິນເຊື່ອບ້ານທັງໝົດ 63 ບ້ານໃນ 3 ເມືອງຄື: ເມືອງບໍລິຄັນ, ເມືອງວຽງທອງ ແລະເມືອງຄໍາເກີດມີຈໍານວນສະມາຊິກທັງໝົດ 4.033 ຄອບຄົວໂດຍເມືອງບໍລິຄັນມີກອງທຶນສິນເຊື່ອບ້ານທັງໝົດ 26 ບ້ານ ແລະມີສະມາຊິກທັງໝົດ 2.026 ຄອບຄົວ; ເມືອງວຽງທອງ ມີກອງທຶນສິນ ເຊື່ອບ້ານທັງໝົດ 10 ບ້ານ ແລະມີສະມາຊິກທັງໝົດ 440 ຄອບຄົວ; ເມືອງຄໍາເກີດ ມີກອງທຶນສິນເຊື່ອບ້ານທັງໝົດ 27 ບ້ານ ແລະມີສະມາຊິກທັງໝົດ 1.567 ຄອບຄົວ, ກອງທຶນສິນເຊື່ອບ້ານທີ່ກ່າວມານີ້ໄດ້ຮັບການຕິດຕາມ ແລະສະໜັບສະໜູນຊຸກຍູ້ດ້ານວິຊາການຈາກອົງກອນສະໜັບສະໜູນເຄືອຂ່າຍ ຫຼືສະຫະກອນສິນເຊື່ອ ແລະເງິນຝາກປະຢັດ (ສສງ) ຊຸມຊົນພັດທະນາທີ່ຂຶ້ນທະບຽນເປັນສະຖາບັນການເງິນຈຸລະພາກກັບທະນາຄານແຫ່ງ ສປປ ລາວ (ທຫລ) ໃນຮູບແບບສະຫະກອນສິນເຊື່ອ ແລະເງິນຝາກປະຢັດ.

   ສໍາລັບການເຄື່ອນໄຫວໃນໄລຍະການແຜ່ລະບາດພະຍາດໂຄວິດ-19 ຮອບ 2 ກໍ່ໄດ້ລົງສະໜັບສະໜູນຊຸກຍູ້ດ້ານວິຊາການໃຫ້ແກ່ຄະນະກອງທຶນສິນເຊື່ອບ້ານໃນການປະກອບເອກະສານ ແລະສະໜອງເງິນກູ້ໃຫ້ເເກ່ສະມາຊິກພາຍໃນບ້ານ; ມາຮອດປະຈຸບັນ, ທຶນຊ່ວຍເຫຼືອທີ່ທາງແຜນງານ ລາວ/030 ໄດ້ຈັດສັນເປັນກອງທຶນສິນເຊື່ອບ້ານສາມາດສະໜອງສິນເຊື່ອໃຫ້ສະມາຊິກພາຍໃນບ້ານສໍາເລັດແລ້ວ 52% ຂອງທຶນສິນເຊື່ອທັງໝົດຊຶ່ງກິດຈະກໍາທີ່ສະມາຊິກເຮັດສ່ວນໃຫຍ່ຄືການປູກມັນຕົ້ນ ແລະລ້ຽງສັດ; ສສງ ຊຸມຊົນພັດທະນາໄດ້ຮັບທະບຽນອະນຸຍາດຖາວອນຈາກ ທຫລ; ຄະນະສະພາບໍ ລິຫານ, ພະນັກງານຂອງ ສສ ຊຸມຊົນພັດທະນາທັງໝົດໄດ້ຮັບການຝຶກອົບຮົມສ້າງຄວາມອາດສາມາດດ້ານຕ່າງໆ ເຊັ່ນຝຶກອົບຮົມຫຼັກສູດບໍລິຫານການເງິນຈຸລະພາກ (MFMCC), ຝຶກອົບຮົມການນໍາໃຊ້ຄູ່ມືຕ່າງໆຂອງອົງກອນ, ຝຶກອົບຮົມຫົວຂໍ້: “ການບໍລິຫານຫ້ອງການ ແລະ ບໍລິຫານເວລາ”, ຝຶກອົບຮົມຫົວຂໍ້ “ພື້ນຖານຊີສະຖາບັນການເງິນຈຸລະພາກ, ຝຶກອົບຮົມການນໍາໃຊ້ໂປຣແກຣມ MBWIN (ບັນຊີສະຖານບັນການເງິນຈຸລະພາກ”.

แชร์