ຮ່ວມຫາລືພັດທະນາສື່ແບບໃໝ່

   ສະມາຄົມນັກຂ່າວແຫ່ງ ສປປ ລາວ (ສຂລ) ຮ່ວມກັບວິທະຍຸສາກົນ ແຫ່ງປະເທດຈີນ (CRI) ປະຈໍາລາວໄດ້ຈັດ “ເວທີປຶກສາຫາລືການພັດທະນາສື່ແບບໃໝ່” ໃນວັນທີ 26 ສິງຫາ 2021 ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊມົນຕຣີ ປະທານ ສຂລ, ມີທ່ານ ນາງ ແສງແກ້ວ ຫົວໜ້າາ CRI ປະຈໍາ ລາວ, ບັນດາຄະນະກົມ, ຄະນະນໍາສື່ມວນຊົນ, ນັກຂ່າວ ແລະ ພາກສ່ວນກ່ຽວຂ້ອງຈາກພາກລັດ-ພາກ ເອກະຊົນພາຍໃນ ແລະ ຕ່າງປະເທດ ເຂົ້າຮ່ວມ.

    ເວທີປຶກສາຫາລືການພັດທະນາສື່ແບບໃໝ່ຄັ້ງນີ້ເປັນອີກເວທີໜຶ່ງທີ່ມີຄວາມສໍາຄັນໃນການພັດທະນາຖັນແຖວສື່ມວນຊົນລາວຊຶ່ງໄດ້ໃຊ້ຫຼາກຫຼາຍຄວາມຄິດ, ຄວາມເຫັນທີ່ຕິດພັນກັບການພັດທະນາສື່ແບບໃໝ່ເພື່ອຮ່ວມກັນປຶກສາຫາລື,ແລກປ່ຽນພ້ອມທັງຖອດຖອນບົດຮຽນເພື່ອນໍາມາໃຊ້ໃນວຽກງານຕົວຈິງໂດຍສະເພາະສິ່ງທ້າທາຍ ແລະໂອກາດໃນການນໍາໃຊ້ສື່ແບບໃໝ່ກໍ່ຄືສື່ສັງຄົມອອນລາຍ, ຊຶ່ງໃນເວທີນີ້ໄດ້ປຶກສາຫາລືກັນໃນ 5 ຫົວຂໍ້ທີ່ໜ້າສົນໃຈຄື:ການສ້າງສື່ແບບໃໝ່ໃຫ້ເປັນສື່ກະແສຫຼັກ ແລະ ເປັນທີ່ນິຍົມ; ການຊົມໃຊ້ຜະລິດຕະພັນສື່ມວນຊົນລາວ; ທິດທາງໃນການພັດທະນາສື່ມວນຊົນລາວໃນອະນາຄົດ; ບົດຮຽນຕົວຈິງສື່ຫຼັກຂອງຈີນທີ່ໃຊ້ສື່ແບບໃໝ່ການຮ່ວມມືລາວ-ຈີນ; ການຮ່ວມມືລາວຈີນດ້ານສື່ມວນຊົນ ແລະດ້ານອື່ນໆ ໂດຍມີບັນດາທ່ານເອກອັກຄະລັດຖະທູດ, ຄະນະນໍາຈາກສະພາອຸດສາຫະກໍາ ແລະ ການຄ້າ ແລະຜູ້ຊ່ຽວຊານດ້ານເຕັກໂນໂລຊີໄດ້ຜັດປ່ຽນກັນຂຶ້ນນໍາສະເໜີໃນຫົວຂໍ້ດັ່ງກ່າວ, ນອກນີ້ ໃນເວທີຍັງມີການແລກປ່ຽນຄໍາຄິດຄໍາເຫັນຜ່ານສື່ອອນລາຍຈາກ CRI ທີ່ປັກກິງ ສປ ຈີນ, ຈາກອົງການສື່ມວນຊົນຕ່າງແຂວງ ແລະພາກສ່ວນກ່ຽວຂ້ອງ.

ທ່ານ ນາງ ແສງແກ້ວ ກ່າວວ່າ: ໃນສະພາບປະຈຸບັນທີ່ສື່ພວກເຮົາມີທັງກາລະໂອກາດ ແລະສິ່ງທ້າທາຍຫຼາຍປະການ, ສື່ສອງປະເທດລາວ-ຈີນ ຄວນຮ່ວມມືກັນຍິ່ງກວ່າເວລາໃດໝົດ, ຕ້ອງໄດ້ເອກະພາບກັນ, ຊ່ວຍເຫຼືອເຊິ່ງກັນ ແລະກັນຢ່າງແໜ້ນແຟ້ນ, ດ້ວຍການສະໜອງຂໍ້ມູນຂ່າວສານທີ່ໜ້າເຊື່ອຖື ແລະມີອິດທິພົນ, ນັ້ນແມ່ນສ່ອງແສງໃຫ້ເຫັນເຖິງຄວາມຮັບຜິດຊອບ ແລະຈັນຍາບັນຂອງສື່ມວນຊົນບົນພື້ນຖານສອດຄ່ອງກັບສາຍພົວພັນມິດຕະພາບອັນດີງາມຂອງສອງຊາດລາວ-ຈີນ.

  ທ່ານປະທານ ສຂລ ໄດ້ຕີລາຄາສູງຕໍ່ການພົວພັນ ແລະຮ່ວມມືທີ່ດີງາມລະຫວ່າງ ລາວ-ຈີນ ໃນໄລຍະຜ່ານມາ ແລະປີນີ້ເປັນປີທີ່ມີຄວາມໝາຍສໍາຄັນຍິ່ງຕໍ່ການພົວພັນ ແລະຮ່ວມມືລະຫວ່າງລາວຈີນ, ອົງການສື່ມວນຊົນລາວທັງສູນກາງ ແລະທ້ອງຖິ່ນໄດ້ສຸມໃສ່ໂຄສະນາໃຫ້ແກ່ປີມິດຕະພາບລາວ-ຈີນ ຄົບຮອບ 60 ປີ, ຊຶ່ງໃນໄລຍະຜ່ານມາສື່ມວນຊົນລາວ ແລະຈີນໄດ້ພົບປະຫາລື, ແລກປ່ຽນຂໍ້ມູນຂ່າວສານນໍາກັນຢ່າງສະໝໍ່າສະເໝີ, ພ້ອມນັ້ນທ່ານປະທານ ສຂລ ໄດ້ຮຽກຮ້ອງມາຍັງອົງການສື່ມວນຊົນລາວທຸກພາກສ່ວນຈົ່ງພ້ອມກັນນໍາເອົາບົດຮຽນໃນການພັດທະນາສື່ແບບໃໝ່ໄປນໍາໃຊ້ໃຫ້ເກີດປະໂຫຍດສູງສຸດຕໍ່ວຽກງານຂອງຕົນ.

แชร์