ຫຼວງພະບາງ ປະຊຸມດ່ວນຮັບມືໂຄວິດ

ຂ່າວ: ສີສຸວັນ 

    ຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງໄດ້ປະຊຸມດ່ວນໃນວັນທີ 26 ສິງຫາ 2021 ນີ້ຫຼັງຈາກທີ່ຜູ້ຕິດເຊື້ອຈາກແຂວງບໍ່ແກ້ວມາຮ່ວມງານເຮືອນດີພີ່ນ້ອງຢູ່ບ້ານນາຝາຍ ເມືອງນານ ແຂວງຫຼວງພະບາງ ແລະມີຜູ້ຕິດເຊື້ອຕໍ່ມື້ນີ້ລວມ 3 ກໍລະນີ ຢູ່ບ້ານໂຄມຂວາງ 1 ຄົນ, ບ້ານເມືອງງາ 2 ຄົນ ສະນັ້ນທາງຄະນະສະເພາະກິດຈຶ່ງໄດ້ຈັດປະຊຸມດ່ວນຮ່ວມກັນເພື່ອຊອກຫາທາງຮັບມື, ປິ່ນປົວ ແລະ ຕ້ານການລະບາດບໍ່ໃຫ້ອອກເປັນວົງກວ້າງ ແລະຊອກຫາຜູ້ໃກ້ສິດສໍາພັດມີຄວາມສ່ຽງມາກວດຫາເຊື້ອໃຫ້ທັນການ. 

   ທ່ານ ດຣ ຄໍາສອນ ພົງສະຫວັດດີ ຮອງຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ຂັ້ນແຂວງ ໄດ້ໃຫ້ສໍາພາດຕໍ່ນັກຂ່າວພວກເຮົາວ່າ: ຫຼັງຈາກທີ່ຜູ້ຕິດເຊື້ອຈາກແຂວງບໍ່ແກ້ວມາຮ່ວມງານເຮືອນດີພີ່ນ້ອງຢູ່ ບ້ານນາຝາຍ ເມືອງນານແຂວງ ຫຼວງພະບາງ ແລະ ມີຜູ້ຕິດເຊື້ອຕໍ່ມື້ນີ້ລວມ 3 ກໍລະນີ ຢູ່ບ້ານໂຄມຂວາງ 1 ຄົນ, ບ້ານເມືອງງາ 2 ຄົນ ສະນັ້ນທາງຄະນະສະເພາະກິດໄດ້ປະຊຸມດ່ວນເພື່ອພ້ອມກັນວາງມາດຕະການຄືນໃໝ່ເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ໃນຄັ້ງນີ້ໂດຍສະເພາະແມ່ນມາດຕະການທາງສັງຄົມຈະໄດ້ສືບຕໍ່ປະຕິບັດຄໍາສັ່ງເລກທີ 15/ນຍ ແລະ ແຈ້ງການຂອງທ່ານເຈົ້າແຂວງຫຼວງພະບາງເລກທີ 01/ຈຂຫຼ.ບ ພ້ອມດຽວກັນນັ້ນກໍ່ຈະເລັ່ງຊອກຫາທາມລາຍເພື່ອເອົາຜູ້ທີ່ຢູ່ໃນກຸ່ມສ່ຽງມາກວດຫາເຊື້ອໃຫ້ໄວທີ່ສຸດ ແລະຫາກຜູ້ໄດທີ່ຮູ້ສຶກວ່າຕົນເອງຢູ່ໃນກຸ່ມສ່ຽງໃກ້ສິດກັບຜູ້ຕິດເຊື້ອແມ່ນໃຫ້ກັກຕົນເອງກ່ອນ ຫຼືຮີບຮ້ອນໄປກວດຫາເຊື້ອໂຄວິດ-19 ທີ່ໂຮງໝໍແຂວງ.

 ສໍາລັບແຜນຮັບມືຕໍ່ການລະບາດພະຍາດໂຄວິດ-19 ນີ້ທາງຄະນະສະເພາະກິດແມ່ນໄດ້ກະກຽມສະຖານທີ່ໄວ້ຢູ່ 3 ສູນຄືສູນຫ້ວຍມາວ, ຫໍຄອຍສະໜາມບິນເກົ່າ ແລະສູນປາກມອງ ເມືອງນໍ້າບາກ ແລະໄລຍະມີການລະບາດນີ້ທ່ານຍັງໄດ້ຮຽກຮ້ອງໃຫ້ພໍ່ແມ່ປະຊາຊົນໃຫ້ຄວາມຮ່ວມມືທົ່ວສັງຄົມຫາກບໍ່ມີຄວາມຈໍາເປັນແມ່ນບໍ່ໃຫ້ເດີນທາງອອກຈາກພື້ນທີ່, ສິ່ງສໍາຄັນຫາກໃຜບໍ່ໄດ້ຮັບວັກແຊງແມ່ນຮີບຮ້ອນພາກັນໄປສັກວັກແຊງ ແລະ ຫາກມີຄວາມຈໍາເປັນອອກຈາກເຮືອນແມ່ນໃຫ້ໃສ່ຜ້າປິດປາກ-ປິກດັງ ແລະຮັກສາໄລຍະຫ່າງໃນການໄປຊື້ເຄື່ອງໃຊ້ຕ່າງໆໃນຕະຫຼາດ, ໝັ່ນລ້າງມືດ້ວຍສະບູ ຫຼືເຈວຂ້າເຊື້ອ, ຕໍ່ກັບບັນຫາການຈັດກິດຈະກໍາຕ່າງໆເປັນຕົ້ນແມ່ນຈັດກອງປະຊຸມ, ລົງຕະຫຼາດນັດແມ່ນຈະໄດ້ສັ່ງໂຈະກ່ອນ.

  ສໍາລັບຄົນພາຍໃນ ແລະຄົນທີ່ຢູ່ຕ່າງແຂວງຈະເດີນທາງເຂົ້າແຂວງຫຼວງພະບາງຫາກບໍ່ໄດ້ສັກຢາວັກແຊງຄົບສອງເຂັມແມ່ນຈະບໍ່ອະນຸຍາດໃຫ້ເຂົ້າຫຼວງພະບາງດັ່ງນັ້ນຫາກໃຜຍັງສັກບໍ່ຄົບແລ້ວຈະເດີນທາງໄປຫຼວງພະບາງແມ່ນໃຫ້ລໍສັກຄົບສອງເຂັມກ່ອນເດີ.

แชร์