2 ພາກສ່ວນ ຊ່ວຍສະຫວັນສູ້ໂຄວິດ

    ໃນວັນທີ 25 ສິງຫາ 2021 ບໍລິສັດ ນໍ້າຕານມິດລາວ ຈຳກັດ ແລະ ບໍລິສັດ ປຸ໋ຍສະຫວັນ ຈຳກັດ ໄດ້ມອບອຸປະກອນການແພດ ແລະໄດ້ສະໜັບສະໜູນເພີ່ມເຕີມມອບອາຫານທ່ຽງໃຫ້ແກ່ຄະນະສະເພາະກິດປ້ອງກັນ, ສະກັດກັ້ນ ແລະຄວບຄຸມການແຜ່ລະບາດພະຍາດໂຄວິດ-19, ຊຶ່ງໃຫ້ກຽດຮັບໂດຍທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ພ້ອມຄະນະຫ້ອງວ່າການປົກຄອງແຂວງ,ມອບໂດຍ ທ່ານ ອະທິພອນ ຣາຫຸນປານ ກຳມະການຜູ້ຈັດການບໍລິສັດນໍ້າຕານມິດລາວ ຈຳກັດ, ຊຶ່ງພິທີດັ່ງກ່າວໄດ້ຈັດຂຶ້ນທີ່ສະໂມສອນຫ້ອງວ່າການປົກຄອງ ແຂວງສະຫວັນນະເຂດ.

   ເຄື່ອງທີ່ນຳມາມອບໃນຄັ້ງນີ້ປະກອບດ້ວຍ: ເຄື່ອງກວດຫາເຊື້ອ Covit-19 ແບບ RT-PCR ຈຳນວນ 1 ເຄື່ອງ, ເຄື່ອງກວດວັດແທກອົກຊີໃນປາຍນິ້ວມືຈຳນວນ 500 ເຄື່ອງ, ເຄື່ອງວັດແທກອຸນນະພູມແບບອັດຕະໂນມັດ ຈຳນວນ 50 ຊຸດ, ຊຸດ PPE ຈຳນວນ 500 ຊຸດ, ໜ້າກາກ N95 ຈຳນວນ 500 ອັນ, ຖົງມືແພດ ຈຳນວນ 2.000 ຄູ່, ຖົງມືແບບທຳມະດາ ຈຳນວນ 2.000 ຄູ່, ແອວກໍຮໍ ຈຳນວນ 5.000 ລິດ, ພ້ອມນັ້ນກໍ່ໄດ້ສະໜັບສະໜູນອາຫານທ່ຽງໃຫ້ແກ່ເຈົ້າໜ້າທີ່ ແລະປະຊາຊົນຜູ້ທີ່ກັກຕົວວັນລະ 500 ກ່ອງ, ຈຳນວນ 30 ວັນ. ຊຶ່ງທັງໝົດລວມມູນຄ່າ 2,5 ລ້ານບາດ.

  ໂອກາດດັ່ງກ່າວທ່ານເຈົ້າແຂວງສະຫວັນນະເຂດກໍ່ໄດ້ກ່າວສະແດງຄວາມຂອບໃຈມາຍັງບໍລິສັດ ນໍ້າຕານມິດລາວ ຈຳກັດ ທີ່ ໄດ້ສະຫຼະທຶນຮອນກໍ່ຄືອຸປະກອນການແພດເພື່ອຊ່ວຍເຫຼືອບັນດາຜູ້ທີ່ກຳລັງປິ່ນປົວ ແລະ ກຳລັງກັກຕົວຢູ່ບັນດາສູນຕ່າງໆພາຍໃນແຂວງສະຫວັນນະເຂດເພື່ອຈະໄດ້ພ້ອມກັນຜ່ານຜ່າວິກິດຄັ້ງນີ້ໃຫ້ຜ່ານພົ້ນໄປໂດຍໄວ.

   ຂ່າວແຈ້ງໃຫ້ຮູ້ຕື່ມວ່າ: ໃນຂະນະດຽວກັນນັ້ນທ່ານເຈົ້າແຂວງສະຫວັນນະເຂດກໍ່ຍັງໄດ້ຮັບການປະກອບສ່ວນອຸປະກອນການແພດ ແລະສິ່ງຂອງຈຳເປັນຈາກທ່ານ ອະທິປັດ ໂຣດຈະນະໄພບູນ ຫົວໜ້າກົງສູນໃຫຍ່ ແຫ່ງລຣາຊະອານາ ຈັກໄທ ປະຈຳແຂວງສະຫວັນນະເຂດ, ຊຶ່ງເຄື່ອງທີ່ນຳມາມອບໃນຄັ້ງນີ້ປະກອບດ້ວຍ: ຊຸດ PPE ຈຳນວນ 100 ຊຸດ, ໜ້າກາກອະນາໄມ N95 ຈຳນວນ 10 ກ່ອງ, ຖົງມືຢາງຊະນິດມີແປ້ງ 600 ຄູ່, ໝວກຄຸມຜົນທາງການແພດຈຳນວນ 1.000 ຫົວ, ໜ້າກາກອະນາໄມແບບທຳມະດາ 350 ກ່ອງ, ຈາກນັ້ນກໍ່ມີ: ມຸ້ງ, ໝອນ, ຜ້າຫົ່ມ ແລະສາດຍາງຢ່າງລະ 50 ອັນ. ລວມມູນຄ່າທັງໝົດ 100.000 ບາດ.

แชร์