ກະຊວງການຕ່າງປະເທດກວດກາ 81 ເປົ້າໝາຍ

ຂ່າວ: ກະຊວງການຕ່າງປະເທດ

   ໂດຍປະຕິບັດແຈ້ງການແນະນໍາຂອງຄະນະກວດກາສູນກາງພັກ ເລກທີ 44/ຄກສພ, ລົງວັນທີ 15 ກຸມພາ 2021 ແລະການນຳພາ-ຊີ້ນໍາຂອງຄະນະພັກຄະນະນໍາກະຊວງການຕ່າງປະເທດ, ໃນວັນທີ 25 ສິງຫາ 2021, ກອງປະຊຸມເຜີຍແຜ່ວຽກງານກວດກາທົ່ວປະເທດ ແລະສະຫຼຸບການເຄື່ອນໄຫວວຽກງານກວດກາຂອງກະຊວງການຕ່າງປະເທດ ປະຈຳປີ 2020 ແລະ 5 ປີ (2016- 2020) ໄດ້ຈັດຂຶ້ນຢ່າງເປັນທາງການ, ໂດຍການໃຫ້ກຽດເປັນປະທານຂອງສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ, ມີຄະນະພັກຄະນະນຳກະຊວງ, ບັນດາຄະນະກົມ, ສະມາຊິກພັກ, ພະນັກງານ-ລັດຖະກອນຂອງກະຊວງການຕ່າງປະເທດເຂົ້າຮ່ວມຢ່າງພ້ອມພຽງ.

    ໃນກອງປະຊຸມ ສະຫາຍ ບຸນເຫຼືອ ພັນດານຸວົງ, ຄະນະປະຈຳພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດໄດ້ເຜີຍແຜ່ເຊື່ອມຊືມ ເນຶ້ອໃນເອກະສານປາຖະກະຖາລະນຶກວັນສ້າງຕັ້ງອົງການກວດກາພັກ-ລັດ ຄົບຮອບ 39 ປີ (ວັນທີ 16 ກຸມພາ 1982-16 ກຸມພາ 2021) ແລະຍົກໃຫ້ເຫັນຜົນງານ ແລະດ້ານຄົງຄ້າງ ແລະບົດຮຽນຖອດຖອນໃນການເຄື່ອນໄຫວວຽກງານກວດກາທົ່ວປະເທດ 5 ປີ (2016-2020), ປະຈຳປີ 2020 ແລະທິດທາງຄາດໝາຍສູ້ຊົນວຽກງານກວດກາປີ 2021 ຂອງຄະນະກວດກາສູນກາງພັກ.

   ພ້ອມນັ້ນ, ກອງປະຊຸມໄດ້ຜ່ານບົດສະຫຼຸບຕີລາຄາການເຄື່ອນໄຫວວຽກງານກວດກາໄລຍະ 5 ປີ (2016-2020), ປະຈໍາປີ 2020 ແລະ ທິດທາງແຜນການເຄື່ອນໄຫວສຳລັບປີ 2021 ຂອງກະຊວງການ ຕ່າງປະເທດ. ຊຶ່ງຕະຫຼອດ 5 ປີ ຜ່ານມາວຽກງານກວດກາໄດ້ຮັບຄວາມເອົາໃຈໃສ່ຊີ້ນໍາ-ນໍາພາຢ່າງ ໃກ້ຊິດ ແລະເປັນປົກກະຕິຂອງຄະນະພັກ-ຄະນະນຳກະຊວງການຕ່າງປະເທດເປັນຕົ້ນໄດ້ເຜີຍແຜ່ບັນ ດາມະຕິຂອງພັກ, ນິຕິກໍາທີ່ກ່ຽວ ຂ້ອງກັບວຽກງານຕິດຕາມ, ກວດກາ, ຕ້ານພະຍາດອາດຍາສິດ, ກົດໝາຍວ່າດ້ວຍການກວດກາລັດ, ຕ້ານການສໍ້ລາດບັງຫຼວງກໍ່ຄືຍຸດ ທະສາດການຕ້ານການສໍ້ລາດບັງຫຼວງ ຮອດປີ 2020 ເພື່ອຍົກສູງຄວາມເຂົ້າໃຈຂອງຖັນແຖວສະມາຊິກພັກ, ພະນັງການ-ລັດຖະກອນ ຕໍ່ບົດບາດ ແລະຄວາມສໍາຄັນຂອງວຽກງານກວດກາ. ໄດ້ດໍາເນີນການຕິດຕາມ-ກວດກາປົກກະຕິ, ກວດກາຕາມຄໍາສັ່ງ ແລະ ກວດກາສະເພາະກິດວຽກພັກ-ລັດຕໍ່ໝາຍເປົ້າທີ່ຢູ່ພາຍໃນກະຊວງ ແລະ ສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງປະເທດຈໍານວນ 81 ເປົ້າໝາຍ; ຜ່ານການເຄື່ອນໄຫວກວດກາຕົວຈິງເຫັນວ່າຄະນະພັກແຕ່ລະຂັ້ນ, ສະມາຊິກພັກ, ພະນັກງານ-ລັດຖະກອນມີຄວາມຮັບຮູ້, ເຂົ້າໃຈຢ່າງຖືກຕ້ອງຕໍ່ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ, ມີສະຕິຕໍ່ການຈັດຕັ້ງ, ເຄົາລົບກົດລະບຽບຂອງພັກ ແລະ ກົດໝາຍຂອງລັດຢ່າງເຂັ້ມງວດ, ພ້ອມທັງມີຄວາມຕື່ນຕົວ ແລະໃຫ້ການຮ່ວມມືເປັນຢ່າງດີຕໍ່ວຽກງານວດກາ, ຊຶ່ງສາມາດຕີລາຄາວ່າສະພາບການພາຍໃນກະຊວງການຕ່າງປະເທດມີຄວາມສະຫງົບ, ມີຄວາມໂປ່ງໃສໃນການນຳພາ-ຊີ້ນຳ ແລະມີຄວາມສາມັກຄີເອກະພາບໃນການເຄື່ອນໄຫວວຽກງານການຕ່າງປະເທດຢ່າງຮອບດ້ານຕາມແນວທາງນະໂຍບາຍການຕ່າງປະ ເທດຂອງພັກ-ລັດ. 

 ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມໄດ້ຮັບຟັງການໂອ້ລົມຂອງ ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ, ຊຶ່ງສະຫາຍໄດ້ສະແດງຄວາມຊົມເຊີຍຕໍ່ຜົນງານທີ່ຍາດມາໄດ້ໃນ 5 ປີ ແລະ ເນັ້ນໃຫ້ຄະນະພັກ-ຄະນະນຳ ທຸກຂັ້ນມີຄວາມເຂົ້າໃຈເລິກເຊິ່ງຕໍ່ພາລະບົດບາດຄວາມສຳຄັນຂອງວຽກງານຕິດຕາມ, ກວດກາ, ຕີຖອຍທັດສະນະແນວຄິດຖືເບົາຕໍ່ວຽກງານກວດກາ, ສືບຕໍ່ບຸກລະດົມໃຫ້ຖັນແຖວສະມາຊິກພັກ, ພະນັກງານ-ລັດຖະກອນ ແລະ ອົງການຈັດຕັ້ງມະຫາຊົນເຂົ້າຮ່ວມວຽກງານກວດກາຢ່າງເປັນຂະບວນ. ສືບຕໍ່ປະຕິບັດວຽກງານກວດກາປົກກະຕິວຽກພັກ-ວຽກ ລັດຢ່າງມີຈຸດສຸມ ແລະມີຄວາມເອກະພາບ, ກວດກາໃຫ້ເຫັນໄດ້ປັດໃຈທີ່ສົງເສີມ, ປັບປຸງແກ້ໄຂໄດ້ຈຸດປົກຜອງຢ່າງພາວະວິໄສ ແລະຮັກສາໄດ້ຄວາມສາມັກຄີພາຍໃນ. ພ້ອມນັ້ນກໍ່ໃຫ້ມີການປັບປຸງການຈັດຕັ້ງ,ມີການປະສານງານລະຫວ່າງສາຍຕັ້ງ-ສາຍຂວາງຢ່າງເປັນລະບົບ ແລະສືບຕໍ່ບໍາລຸງກໍ່ສ້າງພະນັກງານ-ລັດຖະກອນທີ່ເຮັດວຽກງານກວດກາໃຫ້ເຂັ້ມແຂງຕໍ່ເນື່ອງເພື່ອຮັບປະກັນໃນການເປັນເສນາທິການວຽກງານກວດກາໃຫ້ຄະນະພັກ-ຄະນະນໍາແຕ່ລະຂັ້ນ ແລະ ຕັ້ງໜ້າປະຕິບັດຕາມການຊີ້ນໍາຂອງຄະນະກວດກາສູນກາງພັກ, ອົງການກວດການລັດຖະບານ ແລະ ຕາມການແນະນໍາອົງການກວດສອບແຫ່ງລັດ ແລະ ເອົາໃຈໃສ່ປະຕິບັດທິດທາງ ແລະຄາດໝາຍສູ້ຊົນທີ່ກອງປະຊຸມວຽກງານກວດກາທົ່ວປະເທດກໍ່ຄືຂອງກະຊວງການຕ່າງປະເທດວາງອອກໃຫ້ໄດ້ຮັບຜົນດີ.

แชร์