ເຊື່ອມຊຶມວາລະແຫ່ງຊາດ ແກ້ຫຍຸ້ງຍາກເສດຖະກິດ-ການເງິນ

   ໃນວັນທີ 25 ສິງຫາ 2021 ນີ້, ກະຊວງການເງິນ, ໄດ້ຈັດກອງປະຊຸມເຜີຍແຜ່-ເຊື່ອມຊຶມເອກະສານວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ໂດຍການເປັນປະທານຂອງ ທ່ານ ບຸນໂຈມ ອຸບົນ ປະເສີດລັດຖະມົນຕີກະຊວງການເງິນ, ມີສະຫາຍຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງການເງິນ, ບັນດາສະຫາຍຄະນະບໍລິຫານງານ, ເລຂາ-ຮອງເລຂາຄະນະພັກຮາກຖານ, ຄະນະໜ່ວຍພັກຮາກຖານ, ສະມາຊິກພັກຂັ້ນຫົວໜ້າພະແນກ-ຮອງຫົວໜ້າພະແນກເຂົ້າຮ່ວມ.

   ໃນກອງປະຊຸມ, ທ່ານ ບຸນໂຈມ ອຸບົນ ປະເສີດກໍາມະການສູນກາງພັກເລຂາຄະນະບໍລິຫານງານພັກລັດຖະມົນຕີກະຊວງການເງິນ,ໄດ້ມີຄຳເຫັນກ່ຽວກັບການຈັດຕັ້ງ ເຊື່ອມຊຶມເອກະສານວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ແມ່ນສ້າງຄວາມເອກະພາບ, ສ້າງຄວາມຕັດສິນໃຈພາຍໃນຄະ ນະພັກໃນການດໍາເນີນວຽກງານຕົວຈິງໂດຍສະເພາະພະນັກງານນໍາພາຄຸ້ມຄອງໃນແຕ່ລະຂົງເຂດ, ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ແມ່ນຄວາມຮັບຜິຊອບຂອງໝົດທຸກຄົນຮ່ວມກັນແກ້ໄຂ, ຄົ້ນຄວ້າ, ລົງເລິກບັນຫາຄວາມຮັບຜິດຊອບທາງການເມືອງເນັ້ນໜັກໃສ່ການຄົ້ນຄວ້າເຊື່ອມຊຶມເນື້ອໃນຕົ້ນຕໍເພື່ອໃຫ້ຄະນະພັກກະຊວງຮີບຮ້ອນສ້າງແຜນງານ, ແຜນດໍາເນີນງານພາຍໃນອົງຄະນະພັກ ແລະບັນດາກົມເພື່ອດໍາເນີນການຈັດຕັ້ງປະຕິບັດ.

    ໃນກອງປະຊຸມເຜີຍແຜ່-ເຊື່ອມຊຶມເອກະສານວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນຄັ້ງນີ້, ຈະໄດ້ພ້ອມກັນເຊື່ອມຊຶມ 4 ເອກະສານໃຫຍ່ສຳຄັນເຊັ່ນ: ຄໍາສັ່ງຂອງກົມການເມືອງສູນກາງພັກວ່າດ້ວຍການເພີ່ມທະວີການຊີ້ນໍາ-ນໍາພາ ຂອງຄະນະພັກແຕ່ລະຂັ້ນໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງຍາກດ້ານເສດຖະກິດການເງິນສະບັບເລກທີ 01/ກມສພ, ລົງວັນທີ 26 ກໍລະກົດ 2021, ເອ ກະສານວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ຮ່າງຄໍາສັ່ງຂອງນາຍົກລັດຖະມົນຕີວ່າດ້ວຍການເພີ່ມທະວີການຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ແລະແນະນໍາກ່ຽວກັບການປັບປຸງກົງຈັກການຈັດຕັ້ງ ແລະພັດທະນາບຸກຄະລາກອນຂະແໜງການເງິນ, ຊຶ່ງເປັນບັນຫາທີ່ພັກກໍ່ຄືລັດລັດຖະບານຕັດສິນໃຈສ້າງບາດລ້ຽວໃໝ່ໃນການບໍລິຫານລັດ, ການປຸກລະດົມທາງດ້ານກົນໄກ, ແບບແຜນເພື່ອບັນລຸໄດ້ຕາມຈຸດປະສົງທີ່ມະຕິກອງປະຊຸມໃຫຍ່ໄດ້ວາງອອກ.

   ພ້ອມກັນນັ້ນ,ທ່ານລັດຖະມົນຕີກະຊວງການເງິນ, ໄດ້ຍົກໃຫ້ເຫັນບາງບັນຫາທີ່ສໍາຄັນໃນເອກສານຄໍາສັ່ງຂອງກົມການເມືອງສູນກາງພັກເປັນຕົ້ນ: ການຈັດຕັ້ງເຜີຍ ແຜ່ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນຢ່າງທົ່ວເຖິງ, ເພື່ອໃຫ້ພະນັກງານສະມາຊິກພັກໄດ້ຮັບຮູ້ເຂົ້າໃຈເປັນເອກະພາບສູງຕໍ່ເນື້ອໃນຈິດໃຈຊີ້ນໍາ ແລະມີຄວາມຕັດສິນໃຈເດັດດ່ຽວໃນການຈັດຕັ້ງປະຕິບັດວາລະແຫ່ງຊາດ, ເນັ້ນໃຫ້ຄະນະພັກແຕ່ລະຂັ້ນຍົກສູງສະຕິລະວັງຕົວຕໍ່ກົນອຸບາຍ, ຮີບດ່ວນ ດໍາເນີນການແກ້ໄຂບັນດາຈຸດອ່ອນ ແລະ ຂໍ້ຄົງຄ້າງຫຼາຍໆດ້ານໃນການພັດທະນາເສດຖະກິດ-ສັງຄົມ ທີ່ມີລັກສະນະຊໍາເຮື້ອຜ່ານມາ, ຕິດພັນໂດຍກົງກັບການປັບປຸງພາຍໃນພັກຂອດຂັ້ນດ້ານການບໍລິຫານລັດ, ສຸມໃສ່ການແກ້ໄຂການຮົ່ວໄຫຼການຈັດເກັບລາຍຮັບງົບປະມານແກ້ທັງກົນໄກ, ລະບຽບການທັງຂອດການຈັດຕັ້ງ ແລະບຸກຄະລາກອນ, ຄົ້ນຄວ້ານະໂຍບາຍຈໍານວນໜຶ່ງທີ່ມີຄວາມຈໍາເປັນ ແລະມີປະສິດທິຜົນທາງເສດຖະກິດອອກໃຫ້ໄວ, ເລັ່ງປະຕິຮູບລັດວິສາຫະກິດເປັນບຸລິມະສິດແຖວໜ້າຂອງການແກ້ໄຂບັນຫາຫຍຸ້ງຍາກດ້ານເສດຖະກິດ-ການເງິນ.

แชร์