ທນບ ສັງທອງສະໜອງແຫຼ່ງທຶນນາປີບ້ານເປົ້າໝາຍຈຸດສຸມ

ຂ່າວ: ຣັດສະໝີ ດວງສັດຈະ

    ທະນາຄານນະໂຍບາຍ (ທນບ) ໜ່ວຍບໍລິການເມືອງສັງທອງ, ນະຄອນ ຫຼວງວຽງຈັນໄດ້ສະໜອງແຫຼ່ງທຶນນາປີ 2021 ໃຫ້ບ້ານເປົ້າໝາຍຈຸດສຸມ ມີ 7 ບ້ານ ຂອງເມືອງສັງທອງໃນວົງເງິນ 1.63 ຕື້ກີບ ຊຶ່ງໄດ້ສ້າງຄວາມເພິ່ງພໍໃຈໃຫ້ແກ່ປະຊາຊົນບັນດາບ້ານດັ່ງກ່າວເພື່ອນໍາໃຊ້ເຂົ້າໃນການຊື້ແນວພັນ, ປູຍ, ປັກດໍາ, ເກັບກ່ຽວ ແລະອື່ນໆທີ່ຕິດພັນໃນວົງເງິນຄອບຄົວລະ 5.000.000 ກີບ (ແຫຼ່ງທຶນໄລຍະສັ້ນ) ດ້ວຍດອກເບ້ຍ 5% ຕໍ່ປີ.

   ທ່ານ ປັນຍາສະໄຫວ ຣັດຖະເສນາ ຫົວໜ້າ ທນບ ໜ່ວຍບໍລິການເມືອງສັງທອງໄດ້ແຈ້ງຕໍ່ຜູ້ສື່ຂ່າວໃນວັນທີ 24 ສິງຫາ 2021 ນີ້; ສໍາລັບ, ການສະໜອງແຫຼ່ງທຶນນາປີ 2021 ໃຫ້ບ້ານເປົ້າໝາຍຈຸດສຸມ ມີ 7 ບ້ານຂອງເມືອງສັງທອງໃນປີນີ້ປະກອບມີບ້ານໜອງບົວ, ເຕົາໄຫ, ນາຕານ, ວັງມ້າ, ນາປໍ, ນາຫອຍປັງ ແລະບ້ານໄຮ່ເໜືອ; ມີທັງໝົດ 40 ກຸ່ມ, 333 ຄອບຄົວ, ວົງເງິນ 1.631.000.000 ກີບ, ແຕ່ສາມາດປ່ອຍຕົວຈິງທັງໝົດ 1.564. 000 ກີບ ແລະສໍາລັບບ້ານນາຕານ ໃນເດືອນກັນຍາ 2021 ນີ້, ພວກເຮົາມີແຜນປ່ອຍແຫຼ່ງທຶນເຂົ້າໃນການລ້ຽງງົວວົງເງິນ 345.000. 000 ກີບ, ມີ 2 ກຸ່ມໆລະ 6 ແລະ 8 ຄົນ ໂດຍຄົນໜຶ່ງຈະໄດ້ຮັບເງິນຕົວຈິງ 25.000.000 ກີບ ເພື່ອຊື້ງົວຄົນລະ 5 ໂຕ, ນໍາໃຊ້ເຂົ້າໃນປູກຫຍ້າ ແລະຢາຮັກສາພະຍາດຂອງສັດ.

   ທ່ານ ຄໍາສະຫວາດ ຄໍາເມິງ ນາຍບ້ານນາຕານ ໄດ້ໃຫ້ຮູ້ວ່າ: ປະຈຸບັນບ້ານນາຕານມີ 92 ຄອບ ຄົວ, ມີພົນລະເມືອງ 383 ຄົນ, ຍິງ 183 ຄົນ, ອາຊີບສ່ວນໃຫຍ່ ເປັນຊາວກະສິກອນລ້ຽງສັດ ແລະປູກຝັງ; ທົ່ວບ້ານມີເນື້ອທີ່ 1.018 ເຮັກຕາ, ເນື້ອທີ່ນາປີ 215 ເຮັກຕາ, ປັກດໍາແລ້ວ 210 ເຮັກຕາ, ນາຫວ່ານ 5 ເຮັກຕາ ແລະຂະນະນີ້ຜືນນາອຸດົມສົມບູນດີ ແລະສະເລ່ຍຜະລິດຕະພາບ 3-4 ໂຕນຕໍ່ເຮັກຕາ; ຍອດຜະລິດຕະພັນລວມພາຍໃນຂອງບ້ານ (GDP) 20. 160.000 ກີບຕໍ່ຄົນຕໍ່ປີ ຫຼືປະມານ 2.100 ໂດລາ.

  ທ່ານນາຍບ້ານນາຕານໃຫ້ທັດສະນະວ່າ: ນັບແຕ່ປີ 2008 ເປັນຕົ້ນມາ, ທນບ ໄດ້ໃຫ້ຄວາມສໍາຄັນຕໍ່ປະຊາຊົນບ້ານຂອງຂ້າພະເຈົ້າຕະຫຼອດມາໂດຍໄດ້ສະໜອງແຫຼ່ງທຶນດອກເບ້ຍຕໍ່າໃຫ້ຫຼາຍຂະແໜງການຜະລິດຂອງບ້ານເປັນຕົ້ນແຫຼ່ງທຶນໃນການຜະລິດ, ການລ້ຽງສັດ ແລະປູກຝັງປະກອບສ່ວນສ້າງເສດຖະກິດຂອງຄອບຄົວກໍ່ຄືຂອງບ້ານໃຫ້ຂະຫຍາຍຕົວດີຂຶ້ນເປັນກ້າວໆສະເພາະແຫຼ່ງທຶນນໍາໃຊ້ເຂົ້າໃນນາປີໆນີ້, ບ້ານພວກເຮົາກໍ່ໄດ້ຮັບໃນວົງເງິນ 194.000.000 ກີບ ຕາມຄວາມປະສົງຂອງຜູ້ຜະລິດ.

แชร์