ຮອງລັດຖະມົນຕີກະຊວງ ຖວທ ຊຸກຍູ້ວຽກງານຢູ່ໄຊຍະບູລີ

(ພາບ+ຂ່າວ: ບຸນທີ)

     ໃນວັນທີ 24 ສິງຫາຜ່ານມາ, ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ພ້ອມຄະນະໄດ້ລົງຢ້ຽມຢາມ ແລະເຮັດວຽກຢູ່ແຂວງໄຊຍະບູລີໂດຍໃຫ້ກຽດຕ້ອນຮັບຂອງ ທ່ານ ນາງ ບົວຈັນ ພັນທະວົງ ຫົວໜ້າພະແນກ ຖວທ ແຂວງພ້ອມຄະນະພະແນກ.ໃນໂອກາດ, ທ່ານຮອງລັດຖະມົນຕີ ຖວທ ພ້ອມຄະນະໄດ້ໃຫ້ກຽດພົບປະໂອ້ລົມຄະນະພັກ, ຄະນະພະແນກ, ຫົວໜ້າ, ຮອງຫົວໜ້າຂະແໜງທີ່ຫ້ອງປະຊຸມຂອງພະແນກ ຖວທ ແຂວງ.

 ທ່ານ ນາງ ບົວຈັນ ພັນທະວົງ ໄດ້ງານສະພາບຮອບດ້ານຂອງການຈັດຕັ້ງປະຕິບັດວຽກງານ ຖວທ ຂອງແຂວງໃນໄລຍະ 7 ເດືອນຜ່ານມາຊຶ່ງທ່ານໄດ້ຍົກໃຫ້ເຫັນດ້ານດີ, ດ້ານອ່ອນໃນການຈັດຕັ້ງປະຕິບັດວຽກງານ ຖວທ ຜ່ານມາໂດຍລວມແລ້ວວຽກງານ ຖວທ ແມ່ນໄດ້ມີບາດກ້າວຂະຫຍາຍຕົວ, ມີບາງວຽກງານກໍຢືນຢູ່ແຖວໜ້າ ເມື່ອທຽບໃສ່ບັນດາ ແຂວງໃນທົ່ວປະເທດເຖິງວ່າຈະມີການລະບາດຂອງພະຍາດໂຄວິດ-19 ໃນຂະນະນີ້ ແຕ່ຍ້ອນຄວາມຕັດສິນໃຈຂອງຄະນະພັກ, ຄະນະພະແນກ ແລະພະນັກງານ-ລັດຖະກອນພາຍໃນພະແນກ ຖວທ ໄດ້ມີຄວາມສາມັກຄີພາຍໃນ, ເຮັດວຽກເປັນໝູ່ຄະນະບຸກຄົນຮັບຜິດຊອບ, ມີແບບແຜນຊີ້ນໍາໆພາຕາມການ ຕົກລົງເຫັນດີຂອງຄະນະພັກວາງອອກ; ເຖິງວ່າຈະມີດ້ານດີທີ່ກ່າວມານັ້ນພວກເຮົາຍັງມີຂໍ້ຄົງຄ້າງ ໂດຍສະເພາະງົບປະມານຍັງຂາດ ເຂີນ, ອຸປະກອນຮັບໃຊ້ດ້ານວຽກ ງານຂ່າວຍັງບໍ່ພຽງພໍຕໍ່ການຮັບໃຊ້ວຽກງານຂ່າວ. ພ້ອມນີ້ວຽກທ່ອງທ່ຽວກໍຍັງບໍ່ທັນເປັນຕົນເປັນໂຕທີ່ຈະສ້າງລາຍຮັບໃຫ້ແກ່ແຂວງກໍຄືພະແນກ, ການສ້າງບ້ານວັດທະ ນະທໍາກໍບໍ່ໄດ້ຕາມຄາດໝາຍ, ມີ ບາງບ້ານເປີດໄປແລ້ວ ກໍບໍ່ໄດ້ປະ ເມີນຄືນ ແລະ ວຽກງານອື່ນໆກໍ ຍັງບໍ່ໄດ້ຕາມແຜນທີ່ວາງໄວ້. ຈາກ ນັ້ນ, ບັນດາຫົວໜ້າຂະແໜງການ, ຮອງຂະແໜງກໍໄດ້ມີຄໍາເຫັນລາຍງານຂໍ້ມູນດ້ານວຽກງານຂອງຕົນເອງຮັບຜິດຊອບມີທັງດ້ານຕັ້ງໜ້າ ແລະດ້ານຫຍຸ້ງຍາກຂອງຂະແໜງການທີ່ໄດ້ປະສົບບັນຫາໃນໄລຍະຜ່ານມາເພື່ອເປັນພື້ນຖານໃຫ້ທ່ານຮອງລັດຖະມົນຕີມີແຜນແລະໃຫ້ຄໍາເຫັນແກ້ໄຂເພື່ອພັດທະນາວຽກງານໃນພະແນກ ຖວທ ແຂວງໃຫ້ມີບາດກ້າວຂະຫຍາຍຕົວຂຶ້ນຕາມລະດັບ.


    ຕອນທ້າຍທ່ານຮອງລັດຖະມົນຕີກະຊວງ ຖວທ ໄດ້ຮຽກຮ້ອງໃຫ້ຄະນະນໍາພະແນກ ແລະ ພະນັກງານ-ລັດຖະກອນ ຈົ່ງໄດ້ສືບຕໍ່ສ້າງຄວາມສາມັກຄີເປັນປຶກແຜ່ນແໜ້ນໜາ, ເອົາໃຈໃສ່ເຜີຍແຜ່ນິຕິກໍາຕ່າງໆ ໃຫ້ເປັນລະບົບຕໍ່ເນື່ອງ, ລົງຮາກຖານທ້ອງຖິ່ນ, ສືບຕໍ່ເປັນກະບອກສຽງໂຄສະນາຕອບໂຕ້, ສະກັດກັ້ນການອອກຂ່າວທີ່ບິດເບືອນຄວາມຈິງໃນສື່ສັງຄົມອອນລາຍໃນໄລຍະການເກີດລະບາດພະຍາດໂຄວິດ-19, ເອົາໃຈໃສ່ກວດກາຄຸ້ມຄອງຮ້ານກິນດື່ມ, ຮ້ານອາຫານ, ຮ້ານບັນເທີງ, ບ້ານພັກ, ໂຮງແຮມໃຫ້ເປັນລະບົບຕໍ່ເນື່ອງ ແລະເດັດຂາດໃນໄລຍະພະຍາດໂຄວິດ-19 ລະບາດ, ເອົາໃຈໃສ່ຊຸກຍູ້ສົ່ງເສີມການສ້າງບ້ານ, ຄອບຄົວ, ກົມກອງວັດທະນະທໍາໃຫ້ຫຼາຍ ແລະຖືກຕ້ອງຕາມເງື່ອນໄຂມາດຖານທີ່ກະຊວງ ຖວທ ກໍານົດໄວ້ ສິ່ງທັງໝົດນັ້ນແມ່ນໄດ້ພ້ອມກັນຈັດຕັ້ງໃນຕໍ່ໜ້າຕາມທິດນໍາຂອງກະຊວງກໍຄືແຂວງວາງອອກ ເພື່ອເຮັດໃຫ້ພະແນກ ຖວທ ມີການພັດທະນາຂະຫຍາຍຕົວທັງດ້ານປະລິມານ ແລະຄຸນນະພາບເທົ່າທຽມກັບ ແຂວງອື່ນໆໃນທົ່ວປະເທດ.
  ໃນໂອກາດທີ່ທ່ານຮອງລັດຖະມົນຕີກະຊວງ ຖວທ ພ້ອມຄະນະລົງມາຊີ້ນໍາວຽກງານຮອບດ້ານຢູ່ແຂວງໄຊຍະບູລີຄັ້ງນີ້, ກໍໄດ້ນໍາເອົາຄອມພີວເຕີຈໍານວນ 5 ຊຸດ, ເຄື່ອງ ນຸ່ງຫົ່ມ, ຜ້າອັດປາກຈໍານວນໜຶ່ງມອບໃຫ້ພະແນກ ຖວທ ແຂວງໂດຍໃຫ້ກຽດຮັບຂອງທ່ານ ນາງ ບົວຈັນ ພັນທະວົງ.

แชร์