ເຜີຍແຜ່ ຄູ່ມືປົກປ້ອງສັງຄົມໃນວຽກຄຸ້ມຄອງໄພພິບັດ

  ກອງປະຊຸມເຜີຍແຜ່ຄູ່ມື ກ່ຽວກັບວຽກງານປົກປ້ອງທາງສັງຄົມໃນວຽກງານຄຸ້ມຄອງໄພພິບັດອາຊຽນ ແລະການຈັດຕັ້ງປະຕິບັດວຽກງານປົກປ້ອງທາງ ສັງຄົມຢູ່ສປປ ລາວ ໄດ້ຈັດໃນວັນທີ 20 ສິງຫາ 2021 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ກິນດາວົງ ຫຼວງລາດ ຮອງຫົວໜ້າກົມສັງຄົມສົງເຄາະ, ມີບັນດາທ່ານຜູ້ຕາງໜ້າຄູ່ຮ່ວມງານອົງການສາກົນ, ພ້ອມດ້ວຍບັນດາທີ່ຕາງໜ້າຈາກຂະແໜງການກ່ຽວຂ້ອງເຂົ້າຮ່ວມ.

  ກອງປະຊຸມດັ່ງກ່າວ, ບັນດາ ຜູ້ເຂົ້າຮວ່ມໄດ້ພ້ອມກັນເຮັດບົດທົດສອບ, ສົນທະນາຖາມ-ຕອບເພືື່ອປະເມີນຄວາມເຂົົ້າໃຈຕໍ່ການປົກປ້ອງສັງຄົມໃນວຽກງານຕອບໂຕ້ໄພພິບັດ ແລະການກຽມຄວາມພ້ອມເພືື່ອຕອບໂຕ້ກ່ອນເກີດໄພພິບັດນຳອີກ.

  ທ່ານ ກິນດາວົງ ຫຼວງລາດ ໄດ້ມີຄຳເຫັນວ່າ: ເພື່ອການປ້ອງກັນ, ການຄວບຄຸມ ແລະການຟື້ນຟູຄືນທີ່ດີກວ່າເກົ່າຫຼັງໄພພິບັດ; ພັກ ແລະລັດຖະບານໄດ້ໃຫ້ຄວາມສໍາຄັນຕໍ່ວຽກງານຄຸ້ມຄອງໄພພິບັດດ້ວຍການກຳນົດນະໂຍບາຍ ແລະຍຸດທະສາດ, ສ້າງຄວາມເຂັ້ມແຂງໃຫ້ແກ່ກົນໄກການຈັດຕັ້ງວຽກງານຄຸ້ມ ຄອງໄພພິບັດແຕ່ສູນກາງລົງຮອດທ້ອງຖິ່ນໂດຍສະເພາະຢູ່ຊຸມຊົນຂັ້ນບ້ານ, ເພີ່ມທະວີຄວາມເຂັ້ມແຂງໃຫ້ແກ່ລະບົບການພະຍາກອນ ແລະການເຕືອນໄພ ລ່ວງໜ້າ, ການຝຶກອົບຮົມ ແລະການສາທິດຝຶກຊ້ອມເພື່ອຮັບມືໄພພິບັດສຸກເສີນ, ການໂຄສະນາ ແລະສ້າງຈິດສໍານຶກຊຸມຊົນທົ່ວສັງຄົມໄດ້ຮັບຮູ້ເຖິງຄວາມສ່ຽງໄພພິບັດ ແລະປະກອບສ່ວນເຂົ້າໃນການກຽມພ້ອມຮັບມືກັບໄພພິບັດ; ເພີ່ມທະວີການຮ່ວມມືສາກົນ, ບັນດາປະເທດເພື່ອນມິດ, ການຮ່ວມມື ພາກລັດ ແລະເອກະຊົນທັງໄລຍະການກຽມພ້ອມ, ການປ້ອງກັນ, ການຫຼຸດຜ່ອນຄວາມສ່ຽງ ແລະການຕອບໂຕ້ສຸກເສີນຫຼັງໄພພິບັດ, ອັນທີ່ພົ້ນເດັ່ນ, ພວກເຮົາໄດ້ສໍາເລັດການສ້າງກົດໝາຍວ່າດ້ວຍການຄຸ້ມຄອງໄພພິບັດ ຊຶ່ງໄດ້ຖືກຮັບຮອງ ແລະປະກາດໃຊ້ຢ່າງເປັນທາງການໃນປີ 2019 ທີ່ຜ່ານມາ, ສ້າງຍຸດທະສາດການປົກປ້ອງສັງຄົມແຫ່ງຊາດ, ວິໄສທັດຮອດປີ 2030, ເປົ້າໝາຍລວມຮອດປີ 2025 ຊຶ່ງໄດ້ຖືກຮັບຮອງ ແລະປະກາດໃຊ້ຢ່າງເປັນທາງການໃນ ປີ 2020 ທີ່ຜ່ານມາ.

  ທ່ານຮອງຫົວໜ້າກົມສັງຄົມ ສົງເຄາະໃຫ້ຮູ້ຕື່ມວ່າ: ໄດ້ສຳເລັດສ້າງຍຸດທະສາດຫຼຸດຜ່ອນຄວາມສ່ຽງໄພພິບັດແຫ່ງຊາດ 2021-2030, ຊຶ່ງໃນເດືອນ 10 ປີ 2020 ທີ່ຜ່ານມາອາຊຽນກໍ່ໄດ້ມີຄູ່ມືແນະນໍາການເພີ່ມທະວີການປົກປ້ອງສັງຄົມໃຫ້ມີຄວາມທົນທານໃນການຕອບໂຕ້ໄພພິບັດ ຊຶ່ງໄດ້ລະບຸຢູ່ໃນສັນຍາອາຊຽນວ່າດ້ວຍການຄຸ້ມຄອງໄພພິບັດ ແລະຕອບໂຕ້ໄພພິບັດ (AADMER) ແລະຕິດພັນກັບຖະແຫຼ່ງການຮຽວໂກ ແລະຂອບປະຕິບັດງານຮຽວໂກທີ່ໄດ້ຮັບການສ້າງຕັ້ງຂຶ້ນໃນກອງປະຊຸມຫຼຸດຜ່ອນຄວາມສ່ຽງໄພພິບັດໃນເດືອນມັງກອນ 2005, ເພື່ອໃຫ້ບັນດາປະເທດສະມາຊິກອາຊຽນມີຄວາມເຂັ້ມແຂງໃນວຽກ ງານປົກປ້ອງສັງຄົມ, ຊຶ່ງອາຊຽນໄດ້ມີການຮ່ວມມືກັບອົງການ FAO ປະຈຳໃນພາກພື້ນອາຊີເພື່ອປຶກສາແລກປ່ຽນ ແລະຜັນຂະຫຍາຍວຽກງານປົກປ້ອງທາງສັງຄົມໃນວຽກງານໄພພິບັດ ແລະການຈັດຕັ້ງວຽກງານທາງສັງຄົມຢູ່ ສປປ ລາວ.

-----

ໜັງສືພິມ ເສດຖະກິດ-ສັງຄົມ

แชร์