ລັດຮຽກຮ້ອງແຮງງານກັບຊອກວຽກຕາມເໝາະສົມ ແລະຄວາມສາມາດ

(ຂໍ້ມູນ: ຈາກກະຊວງແຮງງານ)

    ກະຊວງ ຮສສ ຮຽກຮ້ອງຊາວຜູ້ອອກແຮງງານລາວຢູ່ຕ່າງປະເທດກັບຄືນປະເທດຕັ້ງໜ້າຊອກຫາວຽກເຮັດງານທຳຢູ່ພາຍໃນປະເທດຂອງຕົນຕາມຄວາມເໝາະສົມ ແລະ ສົມຄູ່ກັບຄວາມຮູ້ຄວາມສາມາດຂອງຕົນພ້ອມໄດ້ເຊີນຊວນຊາວລາວທີ່ໄປອອກແຮງງານຢູ່ຕ່າງປະເທດມີຈຸດປະສົງຢາກກັບຄືນປະເທດຂໍໃຫ້ເຂົ້າມາຕາມດ່ານທີ່ທາງການໄດ້ກໍານົດ.

    ຕໍ່ໜ້າສະພາບການທີ່ມີຄວາມຫຍຸ້ງຍາກໃນການແຜ່ລະບາດຂອງພະຍາດໂຄວິດ-19 ຢ່າງຮຸນແຮງໃນທົ່ວໂລກ, ລັດຖະບານແຕ່ລະປະເທດມີຄວາມຈຳເປັນຕ້ອງປົກປ້ອງຊີວິດຂອງປະຊາຊົນຢ່າງ ສຸດຂີດ ດ້ວຍການນຳໃຊ້ມາດຕະການ ຕ່າງໆເພື່ອສະກັດກັ້ນການແຜ່ລະບາດຂອງພະຍາດດັ່ງກ່າວຊຶ່ງສົ່ງຜົນກະທົບເຮັດໃຫ້ແຮງງານຈຳນວນບໍ່ໜ້ອຍບໍ່ມີວຽກເຮັດ, ຂາດລາຍໄດ້, ກາຍເປັນຜູ້ວ່າງງານ, ເຊັ່ນດຽວກັນກັບພີ່ນ້ອງຊາວຜູ້ອອກແຮງງານລາວທີ່ໄປເຮັດວຽກຢູ່ປະເທດໃກ້ຄຽງຈຳນວນບໍ່ໜ້ອຍ ກ່ໍຕົກຢູ່ໃນສະພາບ ແລະເງື່ອນໄຂດັ່ງກ່າວ, ຮ້າຍແຮງໄປກວ່ານັ້ນແຮງງານລາວພວກເຮົາສ່ວນຫຼວງຫຼາຍ ພັດເປັນແຮງງານທີ່ໄປເຮັດວຽກໃນຊ່ອງທາງທີ່ບໍ່ຖືກຕາມບົດ ບັນທຶກຄວາມເຂົ້າໃຈຂອງສອງກະຊວງແຮງງານທີ່ສອງປະເທດຕົກລົງກັນ, ບໍ່ໄດ້ດຳເນີນເອກະສານຜ່ານຂະບວນການ ແລະຂັ້ນຕອນການບໍລິການຂອງບັນດາບໍລິສັດຈັດຫາງານ. 

 ໝາຍວ່າ (ບໍ່ມີຜູ້ສົ່ງ ແລະຜູ້ຮັບຢ່າງຖືກຕ້ອງ) ຈຳນວນຫຼາຍນຳໃຊ້ວີຊ່າ (visa) ທ່ອງທ່ຽວ ຫຼືບັດຜ່ານແດນຍິ່ງໄປກວ່ານັ້ນຈຳນວນໜຶ່ງຊໍ້າພັດລັກຂ້າມເຂົ້າໄປປະເທດປາຍທາງໂດຍທີ່ບໍ່ຜ່ານດ່ານເຂົ້າ-ອອກຂອງສອງປະເທດໂດຍບໍ່ຄຳນຶງຄວາມຖືກຕ້ອງທາງດ້ານກົດໝາຍຂອງສອງປະເທດ. ດ້ວຍເຫດນັ້ນ, ຈຶ່ງເກີດມີຊ່ອງວ່າງໃຫ້ແຮງ ງານເຫຼົ່ານັ້ນມີຄວາມສ່ຽງ, ຖືກເອົາລັດເອົາປຽບຈາກນາຍຈ້າງ ແລະມີຄວາມສ່ຽງສູງຈະຕົກເປັນເຫຍື່ອຂອງການຄ້າມະນຸດ. 

   ໃນເງື່ອນໄຂທີ່ມີສະພາບການລະບາດຂອງພະຍາດໂຄວິດ-19 ຢູ່ປະເທດເພື່ອນບ້ານທີ່ຮ້າຍແຮງ ແລະຈຳເປັນຕ້ອງໄດ້ພ້ອມກັນອວ່າຍໜ້າກັບຄືນມາຫາປະເທດຊາດ ດັ່ງນັ້ນ, ພັກ ແລະລັດຖະບານໄດ້ມີນະໂຍບາຍທີ່ເປັນຫວ່ງເປັນໃຍເຖິງຄວາມສຸກທຸກຂອງຊາວຜູ້ອອກແຮງງານລາວບັນດາເຜົ່າໃນເວລາພີ່ນ້ອງຊາວຜູ້ອອກແຮງງານທີ່ກັບມາຈາກຕ່າງປະເທດກໍ່ລ້ວນແຕ່ໄດ້ຮັບການຕ້ອນຮັບຈາກອົງການປົກຄອງແຕ່ລະຂັ້ນເປັນຢ່າງດີດ້ວຍການເອົາໃຈໃສ່ເບິ່ງແຍງດູແລ,ໃຫ້ຄວາມສະດວກທາງດ້ານທີ່ພັກ, ອຳນວຍຄວາມສະດວກຕ່າງໆ, ສະໜອງເຄື່ອງອຸປະໂພກ-ບໍລິໂພກ, ກວດສຸຂະພາບກວດຫາເຊື້ອໂຄວິດ-19 ຖ້າພົບເຊື້ອກໍ່ໄດ້ ຮັບການປິ່ນປົວໂດຍບໍ່ໄດ້ເສຍຄ່າຖ້າບໍ່ມີ ການຕິດເຊື້ອພະຍາດໂຄວິດ-19 ເມື່ອຄົບກຳນົດຕາມມາດຕະການທາງດ້ານການແພດແລ້ວກໍ່ຖືກຈັດສົ່ງໄປຫາຄອບຄົວ, ຍາດພີ່ນ້ອງ ແລະ ສັງຄົມຊຶ່ງທັງໝົດນັ້ນສະແດງເຖິງການປະຕິບັດນະໂຍບາຍຢ່າງຖືກຕ້ອງເປັນທຳຂອງພັກ-ລັດຖະບານ ແລະ ອົງການປົກຄອງທຸກຂັ້ນຕໍ່ພົນລະເມືອງລາວບັນດາເຜົ່າ.

   ໃນໂອກາດວິກິດ ແລະຫົວລ້ຽວຫົວ ຕໍ່ນີ້, ໃນນາມກະຊວງ ຮສສ ໃນຖານະທີ່ຖືກມອບໝາຍຈາກລັດຖະບານກໍ່ຄືອົງການປົກຄອງທ້ອງຖິ່ນໃຫ້ຮັບຜິດຊອບວຽກງານແຮງງານ ແລະ ສະຫວັດດີການສັງຄົມຂໍຮຽກຮ້ອງມາຍັງຜູ້ອອກແຮງງານທີ່ກັບຄືນມາຈາກຕ່າງປະເທດທັງໝົດຂໍໃຫ້ເຂົ້າມາຕາມດ່ານທີ່ທາງການໄດ້ກຳນົດ, ຫ້າມເດັດຂາດບໍ່ໃຫ້ລັກລອບເຂົ້າມາໂດຍບໍ່ໄດ້ອະນຸຍາດ ແລະບໍ່ຜ່ານຂະບວນການກວດຫາເຊື້ອໂຄວິດ-19 ແລະຢູ່ສູນກັກກັນຕາມຂັ້ນຕອນຖ້າຫາກແຮງງານຜູ້ໃດລະເມີດແມ່ນຈະໄດ້ຮັບຜິດຊອບຕໍ່ໜ້າກົດໝາຍຢ່າງເຂັ້ມງວດ.

   ກໍລະນີແຮງງານລາວທີ່ພວມເຮັດວຽກຢູ່ຕ່າງປະເທດຍັງມີວຽກເຮັດເປັນປົກກະຕິ, ໄດ້ຮັບການຄຸ້ມຄອງຈາກນາຍຈ້າງບໍ່ມີຄວາມສ່ຽງທີ່ຈະຕິດເຊື້ອ ແລະມີເງື່ອນໄຂເຂົ້າເຖິງການດູແລສຸຂະພາບລວມທັງການເຂົ້າເຖິງວັກແຊງປ້ອງກັນໂຄວິດ-19 ກໍ່ໃຫ້ສືບຕໍ່ເຮັດວຽກນຳນາຍຈ້າງດ້ວຍຄວາມອຸ່ນອ່ຽນທຸ່ນທ່ຽງເຮັດວຽກຕາມຕຳແໜ່ງງານ, ຕາມສັນຍາແຮງງານບໍ່ໃຫ້ເຄື່ອນຍ້າຍຊະຊາຍເພື່ອຈຳກັດການແຜ່ລະບາດຂອງເຊື້ອພະຍາດໂຄວິດ-19 ທັງເປັນການຫຼຸດຜ່ອນພາລະແບກຫາບຂອງລັດຖະບານ ແລະອົງການປົກຄອງທ້ອງຖິ່ນ.

    ຜູ້ອອກແຮງງານທີ່ກັບມາຮອດບ້ານຮອດເຮືອນແລ້ວໃຫ້ຕັ້ງໜ້າສະແຫວງຫາຄວາມຮູ້ພັດທະນາອາຊີບໃຫ້ມີຄວາມຊຳນານງານຊອກຫາວຽກເຮັດງານທຳຢູ່ພາຍໃນປະເທດຕາມຄວາມເໝາະສົມຢູ່ຕາມໂຄງການລົງທຶນ, ຫົວໜ່ວຍແຮງ ງານຕ່າງໆ ທີ່ຍັງມີຄວາມຕ້ອງການແຮງງານເປັນຈຳນວນຫຼວງຫຼາຍຢູ່ໃນຂອບເຂດທົ່ວປະເທດສະເພາະຢູ່ນະຄອນຫຼວງວຽງຈັນຍັງມີຄວາມຕ້ອງການແຮງງານປະມານ 10.000 ຄົນ ແລະແຂວງອື່ນໆ ເປັນຕົ້ນແມ່ນແຂວງຈຳປາສັກ, ສະຫວັນນະເຂດ, ຄຳມ່ວນ ແລະ ບັນດາແຂວງທາງພາກເໜືອຈຳນວນໜຶ່ງໃຫ້ພ້ອມກັນໄປຂຶ້ນທະບຽນຕ້ອງການເຮັດວຽກນຳຫ້ອງການແຮງງານ ແລະ ສະຫວັດດີການສັງຄົມເມືອງ, ພະແນກແຮງງານ ແລະສະຫວັດດີການສັງຄົມແຂວງ ແລະນະຄອນຫຼວງວຽງຈັນ.

แชร์