ຫຼວງພະບາງ ເຂັ້ມງວດຈຸດກວດຄົນເຂົ້າ-ອອກ ລະຫວ່າງດ່ານ

  ໃນວັນທີ 23 ສິງຫາ 2021  ຄະນະສະເພາະກິດ, ເພື່ອປ້ອງກັນ, ຄວບຄຸມ ແລະແກ້ໄຂການລະບາດ ພະຍາດໂຄວິດ-19 ແຂວງຫຼວງພະບາງ ນຳໂດຍທ່ານ ບຸນເລື່ອມ ມະນີວົງ ຮອງເຈົ້າແຂວງຫົວໜ້າຄະນະສະເພາະກິດຂັ້ນແຂວງພ້ອມຄະນະໄດ້ລົງເຄື່ອນໄຫວຊີ້ນຳດ່ານເຂດແດນລະຫວ່າງ ແຂວງຫຼວງພະບາງ ຫາແຂວງອຸດົມໄຊ (ຂົວຫ້ວຍໝ້ຽງ).

  ໃນໂອກາດດັ່ງກ່າວ ທ່ານ ບຸນເລື່ອມ ມະນີວົງ ໄດ້ມີຄຳເຫັນເນັ້ນໃຫ້ຜູ້ຮັບຜິດຊອບປະຈຳດ່ານມີຄວາມເອົາໃຈໃສ່ກວດກາກັ່ນຕອງຜູ້ທີ່ເດີນທາງເຂົ້າມາ ແຂວງຫຼວງພະບາງ ດ້ວຍຄວາມຮັບຜິດຊອບສູງ, ເຂັ້ມງວດການປະຕິບັດມາດຕະການກວດກາການເດີນທາງເຂົ້າ-ອອກແຂວງຫຼວງພະບາງ, ເປັນຕົ້ນແມ່ນການຕັ້ງຈຸດກວດກາຊາຍແດນລະຫວ່າງແຂວງຕະຫຼອດ 24 ຊົ່ວໂມງ, ເຂັ້ມງວດຕໍ່ກັບບັນດາພາກສ່ວນທີ່ມາຈາກພື້ນທີ່ເຂດແດງ, ກໍລະນີບໍ່ມີບັດສັກຢາ ແລະໜັງສືອານຸຍາດເດີນທາງຈາກຄະນະສະເພາະກິດໃນເຂດດັ່ງກ່າວແມ່ນບໍ່ອະນຸຍາດໃຫ້ເຂົ້າມາແຂວງຫຼວງພະບາງຢ່າງເດັດຂາດ, ຍົກເວັ້ນກໍລະນີທີ່ຈຳ ເປັນແຕ່ຕ້ອງໄດ້ກວດຫາເຊື້ອ ແລະປະຕິບັດຕາມມາດຕະການຂອງຄະນະສະເພາະກິດວາງອອກຢ່າງເຂັ້ມງວດ.

  ທັງນີ້ກໍ່ເພື່ອເປັນການສືບຕໍ່ປະຕິບັດຕາມຄຳສັ່ງຂອງທ່ານນາຍົກລັດຖະມົນຕີສະບັບເລກທີ 15/ນຍ, ຄຳສັ່ງຂອງທ່ານເຈົ້າ ແຂວງຫຼວງພະບາງເລກທີ 01/ຈຂຫບ, ແຈ້ງການຂອງສຳນັກງານນາຍົກລັດຖະມົນຕີເລກທີ 1036/ຫສນຍ ແລະແຈ້ງການຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂການລະບາດພະຍາດໂຄວິດ-19 ແຂວງຫຼວງພະບາງເລກທີ 6896/ສພກ.ຫຼບ ລົງວັນທີ 19 ສິງຫາ 2021 ເພື່ອສືບຕໍ່ກຽມຄວາມພ້ອມຮອບດ້ານຮອງຮັບການເດີນທາງເຂົ້າ-ອອກແຂວງຫຼວງພະບາງ ໂດຍບໍ່ຖືກຕ້ອງ ແລະອາດຈະເປັນຄວາມສ່ຽງທີ່ກະຈາຍອອກເປັນວົງກວ້າງໃຫ້ຮັບການຄວບຄຸມໄດ້ຢ່າງວ່ອງໄວ.

  ໃນການລົງເຄື່ອນໄຫວຊີ້ນຳ ຄັ້ງນີ້ ທ່ານ ບຸນເລື່ອມ ມະນີວົງໄດ້ມອບອຸປະກອນປ້ອງກັນພະຍາດໂຄວິດ-19, ນໍ້າດື່ມ ແລະອາຫານແຫ້ງຈຳນວນໜຶ່ງໃຫ້ແກ່ຜູ້ຮັບຜິດຊອບວຽກງານກວດກາປະຈຳດ່ານນຳອີກ .

----

ຂ່າວ: ເກສອນ ແກ້ວລາ

แชร์