ຮອງເຈົ້າແຂວງຊຽງຂວາງຕ້ອນຮັບປະທານອົງການກາແດງລາວ

  ເມື່ອວັນທີ 20 ສິງຫາ 2021 ທ່ານ ໜໍບີຫາ ຕົ່ງປາວ ຮອງເຈົ້າແຂວງຊຽງຂວາງ ໄດ້ຕ້ອນຮັບ ທ່ານ ດຣ. ພູທອນ ເມືອງປາກ ປະທານອົງການກາແດງລາວເຂົ້າພົບປະລາຍງານການເຄື່ອນໄຫວວຽກງານກາແດງ ແລະຂໍທິດຊີ້ນຳປຶກສາຫາລື ແລະພັດທະນາວຽກງານກາແດງໃນຕໍ່ໜ້າ.

  ໃນໂອກາດນີ້, ປະທານອົງການກາແດງລາວໄດ້ສະແດງຄວາມຊົມເຊີຍດີໃຈຕໍ່ການຮັບຕ້ອນຈາກທ່ານຮອງເຈົ້າແຂວງຢ່າງອົບອຸ່ນ ຊຶ່ງຢູ່ໃນທາມກາງແຂວງຊຽງຂວາງກຳລັງພັດທະນາ ແລະປັບປຸງຊັບຊ້ອນບຸກຄະລະກອນຢ່າງເປັນລະບົບຕາມທິດຂອງພັກ, ລັດຖະບານ ແລະແຜນພັດຖະນາເສດຖະສັງຄົມທີ່ກຳນົດໄວ້ພ້ອມນັ້ນ, ໄດ້ແຈ້ງໃຫ້ທ່ານຮອງເຈົ້າແຂວງຊາບໃນການເຄື່ອນໄຫວວຽກງານກາແດງໃນໄລຍະຜ່ານມາມີທັງຂໍ້ສະດວກ ແລະຂໍ້ຫຍຸ້ງຍາກ, ຊຶ່ງ ອົງການກາແດງໄດ້ເຮັດໜ້າທີ່ຊ່ວຍເຫຼືອບັນເທົາທຸກໃຫ້ພໍ່ແມ່ປະຊາຊົນຜູ້ທຸກຍາກໃນເຂດຫ່າງໄກສອກຫຼີກພູດອຍຕາມສິດ ແລະໜ້າທີ່ຂອງກາແດງ 9 ໜ້າວຽກຕົ້ນຕໍຕາມທີ່ໄດ້ກຳນົດໄວ້ໃນກົດໝາຍ, ໃນໄລຍະຜ່ານມາອົງການກາແດງແຂວງຊຽງຂວາງສາມາດປະຕິບັດວຽກງານສຳເລັດຫຼາຍດ້ານ ແລະຄຽງຄູກັນນັ້ນຍັງມີບາງວຽກງານທີ່ຈະຕ້ອງໄດ້ເອົາໃຈໃສ່ເປັນຕົ້ນ: ການປຸກລະດົມຂົນຂວາຍແຫຼ່ງທຶນ, ການປຸກລະດົມຂົນຂວາຍການບໍລິຈາກເລືອດ, ການສ້າງ ອາສາສະໝັກກາແດງ ແລະການປະສານງານກັບອົງການປະສານສົມທົບວຽກງານກາແດງ ແລະອື່ນໆ.

  ພິເສດທ່ານປະທານອົງການກາແດງລາວໄດ້ສະເໜີໃຫ້ທ່ານເຈົ້າແຂວງເປັນປະທານກິດຕິມະສັັກຂອງອົງການກາແດງແຂວງເພື່ອຊ່ວຍຊີ້ນຳ-ນຳພາວຽກກາແດງໃຫ້ບັນລຸຕາມຄາດໝາຍ.

  ຈາກນັ້ນ, ທ່ານຮອງເຈົ້າແຂວງກໍ່ໄດ້ກ່າວສະແດງການຕ້ອນຮັບຢ່າງອົບອຸ່ນຕໍ່ການເຄື່ອນໄຫວຢ້ຽມຢາມ ແລະເຮັດວຽກໃນຄັ້ງນີ້ ແລະຈະໄດ້ເອົາໃຈໃສ່ຢ່າງໃກ້ຊິດຕິດແທດ, ເຂົ້າຮ່ວມຊຸກຍູ້ໃນການປຸກລະດົມຂົນຂວາຍຈາກສັງຄົມໃຫ້ເຂົ້າຮ່ວມຂະບວນການບໍລິຈາກເລືອດ, ການລະດົມຂົນຂວາຍແຫຼ່ງທຶນ ແລະເອົາໃຈໃສ່ຊ່ວຍໃນການປະສານງານກັບບັນດາພະແນກການທີ່ກ່ຽວຂ້ອງເພື່ອພ້ອມກັນປະກອບສ່ວນຊ່ວຍເຫຼືອປະຊາຊົນຜູ້ທຸກຍາກໃຫ້ໄດ້ ແລະທົ່ວເຖິງໃນ ວຽກງານກາແດງພ້ອມນັ້ນ, ປະທານອົງການກາແດງລາວໄດ້ມອບເຄື່ອງຮັກສາສຸຂະນາໄມເພື່ອປ້ອງກັນພະຍາດໂຄວິດ-19 ໃຫ້ແກ່ອົງການກາແດງແຂວງ, ໂດຍຊ້ອງໜ້າຄະນະນໍາຂອງແຂວງເພື່ອນໍາໄປມອບໃຫ້ບັນດານັກຮຽນທີ່ທຸກຍາກຂາດເຂີນໄດ້ນຳໃຊ້ເຂົ້າໃນການປ້ອງກັນເຊື້ອພະຍາດໂຄວິດ-19 ຈາກນັ້ນປະທານອົງການກາແດງລາວໄດ້ສືບຕໍ່ພົບປະໂອ້ລົມອ້າຍນ້ອງພະນັກງານກາແດງ ແຂວງຕື່ມອີກ.

-----

ໜັງສືພິມ ເສດຖະກິດ-ສັງຄົມ

แชร์