ໂຄວິດຊຸມຊົນສະຫວັນເພີ່ມທຸກມື້ເຈົ້າແຂວງອອກ 8 ຂໍ້ຫ້າມ
ເນື່ອງຈາກສະພາບການລະບາດຂອງພະຍາດໂຄວິດ-19 ໃນຊຸມຊົນຂອງ ນະຄອນໄກສອນ ພົມວິຫານ ນັບແຕ່ວັນທີ 2 ສິງຫາ 2021 ມາເຖິງປະຈຸບັນນີ້ຈໍານວນເພີ່ມຂຶ້ນເຖິງ 80 ຄົນ, ກວມເອົາ 24 ບ້ານ ຊຶ່ງສະພາບການລະບາດຂອງພະຍາດດັ່ງກ່າວມາຮອດປະຈຸບັນແມ່ນຍັງບໍ່ສາມາດຢູ່ໃນການຄວບຄຸມໄດ້ ແລະມີທ່າອ່ຽງເພີ່ມຂຶ້ນໃນແຕ່ລະມື້ ແລະເປັນປັດໄຈສ່ຽງສູງຕໍ່ການແຜ່ລະບາດອອກໄປສູ່ວົງກວ້າງພາບໃນ ນະຄອນໄກສອນ ພົມວິຫານ ແລະເມືອງອ້ອມຂ້າງໃນທົ່ວແຂວງສະຫວັນນະເຂດ ດັ່ງນັ້ນ, ເຈົ້າແຂວງສະຫວັນນະເຂດ ຈໍາເປັນຕ້ອງອອກຄໍາສັ່ງສືບຕໍ່ປະຕິບັດມາດ ຕະການປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງພະຍາດໂຄວິດ-19 ແລະຜ່ອນຜັນບາງມາດຕະການໃນຂອບເຂດນະຄອນໄກສອນ ພົມວິຫານ ແຂວງສະຫວັນນະເຂດ ສຳລັບມາດຕະການຫ້າມມີດັ່ງນີ້:
- 1. ຫ້າມບຸກຄົນເດີນທາງເຂົ້າ-ອອກ ທ້ອງຖິ່ນ ຫຼືເຂດທີ່ມີການຕິດເຊື້ອ (ເຂດ ແດງ) ຫຼືເຂດທີ່ມີຄວາມສ່ຽງ (ເຂດ ເຫຼືອງ) ຕາມການກໍານົດຂອງຄະນະສະ ເພາະກິດແຂວງຍົກເວັ້ນຜູ້ທີ່ໄດ້ຮັບການອະນຸຍາດຈາກອົງການປົກຄອງທ້ອງຖິ່ນທີ່ກ່ຽວຂ້ອງດ້ວຍເງື່ອນໄຂ ແລະເຫດຜົນທີ່ຈໍາເປັນເຊັ່ນ: ການສົ່ງສິນຄ້າ ແລະສົ່ງສະບຽງອາຫານ, ໄປໂຮງໝໍ, ໄປຮັບວັກແຊງ, ການເຈັບເປັນ, ເສຍຊີວິດ, ການໄປກວດຕົວຢ່າງຊອກເຊື້ອໂຄວິດ-19 ໃນຈຸດບໍລິການທີ່ກໍານົດໄວ້.
- 2. ຫ້າມສັນຈອນໄປມາພາຍໃນນະຄອນໄກສອນພົມວິຫານ ຫຼັງຈາກເວລາ 20:00 ໂມງແລງ ຂອງແຕ່ລະວັນ-ໄປ ຈົນເຖິງເວລາ 05:00 ໂມງເຊົ້າ ຂອງ ວັນຖັດໄປ, ຍົກເວັ້ນກໍລະນີເຈັບເປັນ ແລະເສຍຊີວິດ.
- 3. ຫ້າມບຸກຄົນທີ່ຊໍາຜັດໃກ້ຊິດຜູ້ຕິດເຊື້ອທີ່ຢູ່ໄລຍະກັກກັນບໍ່ຄົບ 14 ວັນເດີນ ທາງໄປຕ່າງບ້ານ, ຕ່າງເມືອງ ແລະຕ່າງແຂວງຢ່າງເດັດຂາດ.
- 4. ຫ້າມຈັດກອງປະຊຸມ, ໂຮມຊຸມນຸມ ຫຼືກິດຈະກໍາ ແລະງານບຸນປະເພນີຕ່າງໆ ທີ່ມີຜູ້ເຂົ້າຮ່ວມຫຼາຍກວ່າ 10 ຄົນ ໃນກໍລະນີທີ່ຈໍາເປັນຈັດກິດຈະກໍາໃດໜຶ່ງຕ້ອງໄດ້ຮັບອະນຸຍາດຈາກຄະນະສະເພາະຄະນະກິດຂັ້ນແຂວງ ແລະຕ້ອງປະຕິບັດຕາມຄະນະສະເພາະກິດວາງອອກຢ່າງເຂັ້ມງວດ. ຫ້າມກິນດື່ມຊຸມແຊວທີ່ມີທາດເຫຼົ້າທຸກປະເພດໃນສະຖານທີ່ຕ່າງໆ ລວມທັງພາຍໃນເຮືອນ.
- 5. ສືບຕໍ່ໂຈະການຮຽນ-ການສອນຊົ່ວ ຄາວຂອງມະຫາວິທະຍາໄລສະຫວັນນະເຂດ, ວິທະຍາໄລພາກລັດ ແລະເອກະຊົນ, ອາຊີວະສຶກສາ, ໂຮງຮຽນສຶກສາສົງ, ໂຮງຮຽນ (ມັດຖະຍົມຕົ້ນ, ມັດຖະຍົມປາຍ, ປະຖົມ, ອະນຸບານ, ລ້ຽງເດັກໃນຂອບເຂດທົ່ວນະຄອນໄກສອນ ພົມວິຫານ.
- 6. ໃຫ້ສືບຕໍ່ປິດກິດຈະການຊົ່ວຄາວໃນຂອບເຂດນະຄອນໄກສອນ ພົມວິຫານ ເຊັ່ນ: ການບໍລິການຫ້ອງກວດພະຍາດເອກະຊົນທຸກປະເພດ, ຮ້ານຂາຍຄໍາ, ຮ້ານ ແລກປ່ຽນເງິນຕາ, ຮ້ານຊຸບເປີມາແກັດໄອເຕັກ, ຮ້ານກິນດື່ມ-ປີ້ງແກ້ມ, ຮ້ານກາເຟ, ຮ້ານຄາລາໂອເກະ, ຮ້ານບໍລິການນວດ, ຮ້ານຮົ່ມຢາ, ຮ້ານສະປາ, ຮ້ານບັນເທີງ, ຄາສິໂນ, ຣີສອດ, ສວນນໍ້າ, ສະຖານທີ່ທ່ອງທ່ຽວຕ່າງໆ, ຮ້ານເກມອອນລາຍ, ຕະຫຼາດກາງຄືນ, ຮ້ານເສີມສວຍ, ຮ້ານຕັດຜົມ, ຮ້ານຂາຍເສືອຜ້າ, ທຸລະກິດການບໍລິການຂົນສົ່ງອາຫານທຸກປະເພດ (Foof pvnda, ແຄນດີ້ ແລະບໍລິການສົ່ງອາຫານສ່ວນບຸກຄົນ) ລວມທັງສະຖານທີ່ອອກກໍາລັງກາຍທຸກປະເພດທີ່ມີການສໍາພັດກັນ ແລະກີລາໃນສະໜາມຮົ່ມທຸກປະເພດ.
- 7. ຫ້າມບັນດາບຸກຄົນ ແລະນິຕິບຸກຄົນກັກຕຸນ ແລະຂຶ້ນລາຄາສິນຄ້າທຸກປະເພດເປັນຕົ້ນ: ຜ້າປິດປາກ-ປິດດັງ, ນໍ້າຢາລ້າງມື, ຢາປົວພະຍາດ, ເຂົ້າ, ອາຫານ, ນໍ້າດື່ມ ແລະເຄື່ອງອຸປະໂພກ-ບໍລິໂພກອື່ນໆ. 8. ສືບຕໍ່ໂຈະການຂົນສົ່ງໂດຍສານລະຫວ່າງນະຄອນໄກສອນພົມວິຫານກັບບັນດາເມື່ອງຕ່າງໆໃນທົ່ວແຂວງ ແລະບັນດາແຂວງຕ່າງໆໃນທົ່ວປະເທດ.
