ກອງທຶນສິນເຊື່ອບ້ານແຂວງວຽງຈັນເກີດປະໂຫຍດສູງ

ຂ່າວ: ຣັດສະໝີດວງສັດຈະ

    ທ່ານ ນາງ ສີສະຫວັນ ສາຍອຸດົມ ຜູ້ປະສານງານການເງິນຊົນນະບົດຂັ້ນແຂວງປະຈຳແຂວງວຽງຈັນ ໃຫ້ຮູ້ວ່າ: ກອງທຶນສິນເຊື່ອບ້ານຢູ່ແຂວງວຽງຈັນມີທັງໝົດ 38 ກອງທຶນ, ໃນນັ້ນເມືອງຫີນເຫີບ ມີ 5 ກອງທຶນ, ເມືອງເຟືອງ 12 ກອງທຶນ, ເມືອງແມດ 11 ກອງທຶນ ແລະເມືອງກາສີ 10 ກອງທຶນ, ມີສະມາຊິກທັງໝົດ 1.557 ຄົນ, ຍິງ 415 ຄົນ ເຊິ່ງກວມເອົາ 63,4% ຂອງງົບປະມານສິນເຊື່ອທັງໝົດ; ສິນເຊື່ອດັ່ງກ່າວໄດ້ຖືກນໍາໃຊ້ເຂົ້າໃນກິດຈະກໍາສ້າງລາຍຮັບເຂົ້າຄອບຄົວເຊັ່ນ: ປູກຝັງ, ລ້ຽງສັດ, ປະມົງ, ຫັດຖະກໍາແລະການບໍລິການຄ້າຂາຍຍ່ອຍ.

     ໂດຍຄວາມເປັນຈິງແລ້ວເຂົາເຈົ້າໄດ້ນໍາໃຊ້ແຫຼ່ງທຶນເຂົ້າໃນການປູກ, ການລ້ຽງໃນທ້ອງຖິ່ນເຫັນວ່າມີຈັງຫວະເພີ່ມຂຶ້ນ, ມີທຶນໝູນວຽນໃນການສ້າງລາຍຮັບ ແລະສາມາດມີກໍາໄລພາຍຫຼັງຂາຍຜົນຜະລິດ, ຈາກຄອບຄົວທີ່ເຮັດການຜະລິດແບບພໍກຸ້ມຢູ່ກຸ້ມກິນພາຍໃນຄອບຄົວ; ແຕ່ມາບັດນີ້ກໍ່ໄດ້ມີການຂະຫຍາຍການຜະລິດເພີ່ມຂຶ້ນເພື່ອສະໜອງໃຫ້ຕະຫຼາດໂດຍປັດໄຈຕົ້ນຕໍໄດ້ມີເເຫຼ່ງທຶນເຂົ້າໃນກິດຈະກໍາການຜະລິດທີ່ສາມາດສ້າງລາຍຮັບ ແລະການດໍາເນີນທຸລະກິດຂອງຄອບຄົວ,ປະຊາຊົນພາຍໃນບ້ານມີການພັດທະນາ, ມີຊີວິດການເປັນຢູ່ທີ່ດີຂື້ນ.

    ນອກຈາກນັ້ນ, ໃນດ້ານການສ້າງຄວາມເຂັ້ມແຂງໃຫ້ຄະນະຄຸ້ມຄອງກອງທຶນສິນເຊື່ອບ້ານກໍ່ສາມາດຮຽນຮູ້ລະບຽບໃນການບໍລິຫານຄຸ້ມຄອງກອງທຶນ, ການປະກອບເອກະສານ, ການຄິດໄລ່ການລົງບັນຊີໄດ້ດີສົມຄວນ, ມີການເກັບດອກເບ້ຍເງິນກູ້ເປັນເດືອນໃນບາງບ້ານຊຶ່ງສະແດງໃຫ້ເຫັນເຖິງຄວາມຕື່ນຕົວໃນການຊຳລະໜີ້ສິນຂອງສະມາຊິກ, ພ້ອມທັງທະຍອຍກັນສົ່ງຕົ້ນທຶນຂອງສະມາຊິກບາງບ້ານພາຍຫຼັງທີ່ມີການເກັບກູ້ຜົນຜະລິດຈາກກິດຈະກໍາຕ່າງໆ ໂດຍການຕິດຕາມ ແລະສະໜັບສະໜູນຈາກທີມງານວິຊາການສະມາຄົມການເງິນຈຸລະພາກແລະຄູ່ຮ່ວມງານຈາກຂັ້ນແຂວງ ແລະຂັ້ນເມືອງ.

แชร์