ທາງລົດໄຟ ລາວ-ຈີນ ຈະເປັນແຮງຍູ້ເສດຖະກິດ-ສັງຄົມລາວ ກ້າວກະໂດດ

      ການພັດທະນາພື້ນຖານໂຄງລ່າງທາງດ້ານຄົມມະນາຄົມ-ຂົນສົ່ງ ແມ່ນເປັນໜຶ່ງໃນບູລິມະສິດຂອງການພັດທະນາຂອງ ສປປ ລາວ ຊຶ່ງໄດ້ກຳນົດໄວ້ຢູ່ໃນແຜນພັດທະນາເສດຖະກິດ-ສັງຄົມ ຂອງພັກໃນແຕ່ລະໄລຍະ, ດັ່ງຄຳເວົ້າຂອງປະທານ ໄກສອນ ພົມວິຫານ ທີ່ວ່າ:“ການຄົມມະນາຄົມຂົນສົ່ງເປັນປາຍແຫຼມຂອງເສດຖະກິດແຫ່ງຊາດ” ແລະຄຳສຸພາສິດຈີນທີ່ວ່າ: “ຢາກຮັ່ງມີກ່ອນອື່ນໝົດຕ້ອງສ້າງຖະໜົນຫົນທາງ”. ໂດຍເລັງເຫັນຄວາມສໍາຄັນດັ່ງກ່າວ, ພັກ ແລະລັດຖະບານ ສປປ ລາວ ຈຶ່ງໄດ້ເອົາ ໃຈໃສ່ກະຕຸກຊຸກຍູ້ການພັດທະນາທາງດ້ານຄົມມະນາຄົມ-ຂົນສົ່ງ ໂດຍສະເພາະບັນດາເສັ້ນທາງຫຼວງແຫ່ງຊາດໃຫ້ມີຄວາມສະດວກ ແລະ ສາມາດເຊື່ອມຕໍ່ລະ ຫວ່າງບັນດາແຂວງຕ່າງໆ. ນອກຈາກນັ້ນ, ຍັງໄດ້ມີຍຸດທະສາດໃນການຫັນເອົາປະເທດໂດຍອີງໃສ່ສະພາບທາງດ້ານພູມສາດຂອງ ສປປ ລາວ ທີ່ບໍ່ມີຊາຍແດນຕິດຈອດກັບທະເລໃຫ້ກາຍເປັນປະເທດເຊື່ອມໂຍງເຊື່ອມຈອດໃນພາກພື້ນ. ດ້ວຍເຫດນັ້ນ, ໂຄງການກໍ່ສ້າງເສັ້ນທາງລົດໄຟ ລາວ-ຈີນ ທີ່ຢູ່ພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ຈຶ່ງເປັນປັດໃຈສໍາຄັນໃນການຂັບເຄື່ອນຍຸດທະສາດດັ່ງກ່າວໃຫ້ຍັບເຂົ້າໃກ້ເປົ້າໝາຍແຫ່ງການເປັນປະເທດເຊື່ອມໂຍງເຊື່ອມຈອດຢ່າງແທ້ຈິງ.

  ໂຄງການກໍ່ສ້າງເສັ້ນທາງລົດ ໄຟລາວ-ຈີນໄດ້ເລີ່ມລົງມືກໍ່ສ້າງນັບແຕ່ວັນທີ 1 ມັງກອນ 2017 ເປັນຕົ້ນມາ ແລະມີກໍານົດເປີດນໍາ ໃຊ້ໃນທ້າຍປີ 2021 ເພື່ອປະກອບສ່ວນສະເຫຼີມສະຫຼອງວັນຊາດທີ 2 ທັນວາຄົບຮອບ 46 ປີ ແລະວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ 60 ປີ. ເສັ້ນທາງລົດໄຟລາວ-ຈີນ ມີໄລຍະທາງທັງໝົດ 426 ກິໂລແມັດ, ແຕ່ເມືອງບໍ່ເຕນ ແຂວງຫຼວງນໍ້າທາ (ຊາຍແດນລາວ-ຈີນ) ຫານະຄອນຫຼວງວຽງຈັນ, ເຊິ່ງແລວທາງລົດໄຟແລ່ນຜ່ານ 5 ແຂວງຂອງລາວ ຄື: ແຂວງອຸດົມໄຊ (126,6 ກມ), ແຂວງຫຼວງນໍ້າທາ (16,9 ກມ), ແຂວງຫຼວງພະບາງ (80 ກມ), ແຂວງວຽງຈັນ (145,5 ກມ) ແລະນະຄອນຫຼວງວຽງຈັນ (57 ກມ). ຕະຫຼອດໄລຍະທາງລວມມີ 32 ສະຖານີ ( 11 ສະຖານີໂດຍສານ ແລະ ສິນຄ້າ, ສ່ວນທີ່ເຫຼືອແມ່ນ ສະຖານີຫຼີກກັນ ຫຼື ຈອດລໍຖ້າຜູ້ໂດຍ ສານ). ຂະບວນລົດໄຟລາວ-ຈີນ ຈະແລ່ນດ້ວຍພະລັງງານໄຟຟ້າດ້ວຍຄວາມໄວ 160 ກມຕໍ່ຊົ່ວໂມງ (ເຂດພູດອຍ), 200 ກມຕໍ່ຊົ່ວໂມງ (ເຂດທົ່ງພຽງ), ຊຶ່ງມີຄວາມໄວສະເລ່ຍແລ້ວ 180 ກມຕໍ່ຊົ່ວໂມງ. ສໍາລັບຂະບວນລົດໄຟຂົນສົ່ງສິນຄ້າໄດ້ຖືກກໍານົດຄວາມໄວຢູ່ທີ່ 120 ກມຕໍ່ຊົ່ວໂມງ.

   ໂຄງການກໍ່ສ້າງເສັ້ນທາງລົດ ໄຟລາວ-ຈີນ ແມ່ນໂຄງການຮ່ວມມືຍຸດທະສາດຂອງສອງປະເທດ ລາວ-ຈີນ, ເຊິ່ງພັກ ແລະ ລັດຖະ ບານຂອງສອງປະເທດໄດ້ເອົາໃຈ ໃສ່ເປັນພິເສດ ແລະ ການເປີດນໍາ ໃຊ້ທາງລົດໄຟລາວ-ຈີນ ຈະນຳເອົາ ຜົນປະໂຫຍດມາໃຫ້ປະເທດຊາດ ຫຼາຍຢ່າງເປັນຕົ້ນ: 1) ສົ່ງເສີມ ການເຊື່ອມໂຍງ-ເຊື່ອມຈອດພາກ ພື້ນ:ເນື່ອງຈາກໂຄງການດັ່ງກ່າວ ແມ່ນສ່ວນໜຶ່ງໃນການຈັດຕັ້ງ ແລະ ຜັນຂະຫຍາຍແຜນຍຸດທະສາດການ ເຊື່ອມໂຍງ-ເຊື່ອມຈອດພາກພື້ນຂອງ ສປປ ລາວ ແລະ ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງສປ ຈີນ ທີ່ມີຄວາມສອດຄ່ອງກັບ ແຜນແມ່ບົດວ່າດ້ວຍການເຊື່ອມ ຈອດພາກພື້ນຂອງອາຊຽນໃນປີ 2025 (Master Plan of ASEAN Connectivity/MPAC 2025).ໂຄງການເສັ້ນທາງລົດໄຟ ລາວ-ຈີນ ຈະຊ່ວຍໃຫ້ລາວ ຫັນ ປ່ຽນຈາກປະເທດທີ່ບໍ່ມີຊາຍແດນ ຕິດຈອດກັບທະເລມາເປັນປະເທດ ເຊື່ອມໂຍງເຊື່ອມຈອດຂອງພາກ ພື້ນ. ນອກຈາກນີ້, ໂຄງການເສັ້ນ ທາງລົດໄຟ ລາວ-ຈີນ ຍັງແມ່ນ ພາກ ສ່ວນໜຶ່ງທີ່ສຳຄັນຂອງເສັ້ນທາງ ລົດໄຟຄຸນມິງ-ສິງກະໂປເພື່ອຜັນຂະຫຍາຍແຜນແມ່ບົດໃນການ ເຊື່ອມຈອດອາຊຽນໃຫ້ເປັນຮູບ ປະທໍາ, ແນໃສ່ອໍານວຍຄວາມສະ ດວກໃຫ້ແກ່ການໄປມາຫາສູ່ຂອງ ປະຊາຊົນ ແລະ ການຂົນສົ່ງສິນຄ້າພາຍໃນພາກພື້ນ; 2) ສົ່ງເສີມການ ຄ້າລາວ-ຈີນ: ເສັ້ນທາງລົດໄຟ ລາວ-ຈີນ ຈະຊ່ວຍສົ່ງເສີມການ ຮ່ວມມືທາງດ້ານການຄ້າລາວ-ຈີນ ໂດຍຜ່ານການອໍານວຍຄວາມສະ ດວກໃນການຂົນສົ່ງສິນຄ້າລະຫວ່າງສອງປະເທດ, ສົມທົບກັບຄວາມພະຍາຍາມຂອງສອງຝ່າຍໃນການສົ່ງເສີມການຮ່ວມມືທາງ ດ້ານການຄ້າໃນຂອບສອງຝ່າຍ ແລະຫຼາຍຝ່າຍໂດຍການເຂົ້າເປັນ ສະມາຊິກຂອງບັນດາກົນໄກການ ຮ່ວມມືທາງດ້ານການຄ້າທີ່ສຳຄັນຂອງພາກພື້ນ ແລະ ສາກົນ, ເປີດໂອ ກາດໃຫ້ສິນຄ້າລາວເຂົ້າເຖິງຕະຫຼາດພາຍໃນຈີນ, ເຮັດໃຫ້ມູນ ຄ່າການຄ້າລາວ-ຈີນ ຂະຫຍາຍ ຕົວ, ຊຶ່ງກ່ອນໜ້ານີ້ມູນຄ່າການຄ້າ ລາວ-ຈີນ ກໍມີການຂະຫຍາຍຕົວໃນລະດັບທີ່ສູງຈາກ 3,8 ລ້ານໂດ ລາສະຫະລັດໃນປີ 2010 ເພີ່ມຂຶ້ນ ເປັນ 3,6 ຕື້ໂດລາສະຫະລັດໃນປີ 2019; 3) ສົ່ງເສີມການລົງທຶນ ຈາກຕ່າງປະເທດໃນລາວ: ເສັ້ນທາງລົດໄຟລາວ-ຈີນ ຈະຊ່ວຍດຶງດູດເອົານັກລົງທຶນຈາກຕ່າງປະເທດເຂົ້າມາລົງທຶນໃນລາວໃຫ້ຫຼາຍຂຶ້ນໂດຍສະເພາະການລົງທຶນຢູ່ບັນດາເຂດເສດຖະກິດພິເສດ, ເຂດເສດຖະກິດສະເພາະ ແລະບັນ ດາແຂວງຕາມແລວເສັ້ນທາງລົດ ໄຟລາວ-ຈີນ. ເສັ້ນທາງລົດໄຟ ລາວ-ຈີນ ຈະຊ່ວຍຫຼຸດຜ່ອນຄ່າ ໃຊ້ຈ່າຍ, ເວລາ ແລະ ຄວາມສ່ຽງ ໃນການຂົນສົ່ງວັດຖຸດິບ ແລະ ຜະ ລິດຕະພັນຂອງຜູ້ປະກອບການ. ປະຈຸບັນ, ນັກລົງທຶນຈາກ ສປ ຈີນ ຈັດຢູ່ໃນອັນດັບທີ 1 ຂອງນັກລົງ ທຶນຕ່າງປະເທດທີ່ມາລົງທຶນໃນ ລາວ; 4) ສົ່ງເສີມຂະແໜງການ ທ່ອງທ່ຽວໃນລາວ: ເສັ້ນທາງລົດ ໄຟລາວ-ຈີນຈະຊ່ວຍຫຼຸດຄ່າໃຊ້ ຈ່າຍ, ເວລາ ແລະ ຄວາມສ່ຽງໃນ ການເດີນທາງ, ສົມທົບກັບບັນດາ ແຂວງຕາມແລວເສັ້ນທາງລົດໄຟ ລາວ-ຈີນ ທີ່ມີສະຖານທີ່ທ່ອງ ທ່ຽວທາງປະຫວັດສາດ, ທໍາມະ ຊາດແລະວັດທະນະທໍາ ທີ່ສວຍງາມ ແລະ ຫຼາກຫຼາຍ, ສ້າງຄວາມສົນ ໃຈນັກທ່ອງທ່ຽວທັງພາຍໃນ ແລະ ຕ່າງປະເທດ. ໃນປີ 2000 ມີນັກ ທ່ອງທ່ຽວເຂົ້າມາລາວປະມານ 7 ແສນເທື່ອຄົນ, ປີ 2019 ເພີ່ມຂຶ້ນ 4 ລ້ານກວ່າເທື່ອຄົນ. ພາຍຫຼັງ ເປີດນຳໃຊ້ເສັ້ນທາງລົດໄຟລາວຈີນ ຄາດວ່າຈະມີນັກທ່ອງທ່ຽວ ຕ່າງປະເທດ ໂດຍສະເພາະນັກ ທ່ອງທ່ຽວຈາກຈີນມາທ່ອງທ່ຽວລາວຫຼາຍລ້ານຄົນໃນແຕ່ລະປີ, ຊຶ່ງຈະສ້າງລາຍຮັບໃຫ້ແກ່ປະເທດຊາດຈຳນວນມະຫາສານ, ປະກອບສ່ວນສຳຄັນໃນການຟື້ນຟູເສດຖະກິດພາຍຫຼັງທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19; 5) ປະກອບສ່ວນໃນການຮັກສາສິ່ງແວດລ້ອມ: ລົດໄຟລາວ-ຈີນແມ່ນນໍາໃຊ້ ພະລັງງານໄຟຟ້າ ຊຶ່ງເປັນພະລັງ ງານສະອາດປອດໄພ ແລະເປັນມິດຕໍ່ສິ່ງແວດລ້ອມຊຶ່ງຈະຊ່ວຍຫຼຸດຜ່ອນອັດຕາການປ່ອຍອາຍກາກໂບນິກ (CO2) ຂຶ້ນສູ່ຊັ້ນບັນຍາກາດ, ໂຄງການເສັ້ນທາງລົດໄຟ ລາວ-ຈີນ ຈະເປັນສ່ວນໜຶ່ງໃນການຈັດຕັ້ງປະຕິບັດສົນທິສັນຍາສາກົນໃນການຮັບມືກັບການປ່ຽນແປງຂອງສະພາບດິນຟ້າອາກາດ, ໂດຍສະເພາະສັນຍາປາຣີ ທີ່ ສປປ ລາວ ແລະ ສປ ຈີນ ໄດ້ເຂົ້າຮ່ວມເປັນພາຄີ.

   ເພື່ອເຮັດໃຫ້ເສັ້ນທາງລົດໄຟ ລາວ-ຈີນ ນໍາຜົນປະໂຫຍດສູງສຸດມາໃຫ້ປະຊາຊົນສອງຊາດລາວຈີນ, ເຫັນວ່າມີບາງວຽກງານຕ້ອງໄດ້ສືບຕໍ່ປັບປຸງແກ້ໄຂໃຫ້ສາມາດ ຮອງຮັບການເປີດນໍາໃຊ້ທາງລົດໄຟ ລາວ-ຈີນ ເຊັ່ນ: 1) ການກະກຽມຄວາມພ້ອມທາງດ້ານນິຕິກໍາເພື່ອການຄຸ້ມຄອງ ແລະອໍານວຍຄວາມສະດວກທັງຜູ້ໂດຍສານ ແລະການຈໍລະຈອນສິນຄ້າ; 2) ການກະກຽມຄວາມພ້ອມດ້ານບຸກຄະລາກອນຕອບສະໜອງໃຫ້ແກ່ບັນດາໜ້າວຽກທີ່ກ່ຽວຂ້ອງ; 3) ການສ້າງຈິດສໍານຶກໃຫ້ແກ່ພະນັກ ງານລັດຖະກອນ, ພໍ່ຄ້າຊາວຂາຍ ແລະ ປະຊາຊົນໃນການຮັກສາຄວາມເປັນລະບຽບຮຽບຮ້ອຍ ຕາມສະຖານີ ແລະ ໃນລົດໄຟ; 4) ຂຸດຄົ້ນ ແລະນໍາໃຊ້ທ່າແຮງຂອງ ເສັ້ນທາງລົດໄຟລາວ-ຈີນໃຫ້ເກີດປະໂຫຍດສູງສຸດ; 5) ຊຸກຍູ້ບັນດາປະເທດໃນພາກພື້ນສືບຕໍ່ໂຄງການເສັ້ນທາງລົດໄຟຄຸນມິງ-ສິງກະໂປ; 6) ຄົ້ນຄວ້າມາດຕະການ ອຳນວຍຄວາມສະດວກໃຫ້ແກ່ການເຂົ້າ-ອອກປະເທດຂອງປະຊາຊົນສອງຊາດ ລາວ-ຈີນ ໂດຍຜ່ານເສັ້ນທາງລົດໄຟລາວ-ຈີນ ເພື່ອຟື້ນຟູເສດຖະກິດທັງຮັບປະກັນວຽກງານປ້ອງກັນ ແລະສະກັດກັ້ນການລະບາດຂອງພະຍາດໂຄວິດ-19.

   ສະຫລຸບແລ້ວ, ເສັ້ນທາງລົດ ໄຟລາວ-ຈີນ ເປັນເສັ້ນທາງແຫ່ງຄວາມຫວັງທີ່ປະຊາຊົນລາວ ແລະຈີນກໍຄືປະຊາຊົນໃນພາກພື້ນອາຊີຕາເວັນອອກສ່ຽງໃຕ້ຄອງຄອຍ, ເປັນເສັ້ນທາງລົດໄຟສາຍພິເສດທີ່ຈະນຳເອົາຄວາມສີວິໄລ ແລະຢູ່ດີກິນດີມາໃຫ້ປະຊາຊົນໃນພາກພື້ນ, ສົ່ງເສີມການພົວພັນຮ່ວມມື ແລະການໄປ-ມາຫາສູ່ກັນຂອງ ປະຊາຊົນໃນພາກພື້ນໃຫ້ກ້າວໄປສູ່ລວງເລິກ ແລະລວງກວ້າງຢ່າງທີ່ບໍ່ເຄີຍມີມາກ່ອນ.

แชร์