ໄອປາ ຫາລືຫຼາຍບັນຫາ

ຂ່າວ: ສະ​ພາ

    ໃນວັນທີ 23 ສິງຫາ 2021 ທີ່ຫ້ອງປະຊຸມຄະນະປະຈຳສະພາແຫ່ງຊາດຫຼັງໃໝ່ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດພ້ອມດ້ວຍຄະນະໄດ້ເຂົ້າຮ່ວມກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 42 ແບບທາງໄກຈັດໂດຍສະພານິຕິບັນຍັດແຫ່ງ ບຣູໄນ ດາຣູຊາລາມ, ກອງປະຊຸມດັ່ງກ່າວ, ຈະໄດ້ດຳເນີນໃນລະຫວ່າງວັນທີ 23-25 ສິງຫາ 2021 ພາຍໃຕ້ການເປັນປະທານຂອງທ່ານ ເປຮິນ ດາໂຕະ ຮາຈິອາດູນ ລາມັນ ຕາອິບ ປະທານສະພານິຕິບັນຍັດແຫ່ງ ບຣູໄນ ດາຣູຊາລາມ ປະທານກອງປະຊຸມໃຫຍ່ໄອປາ ຄັ້ງທີ 42.

   ກອງປະຊຸມໃຫຍ່ປະຈຳປີຄັ້ງນີ້, ໄດ້ສຸມໃສ່ຄົ້ນຄວ້າປຶກສາຫາລືແລກປ່ຽນຄວາມຄິດຄວາມເຫັນໃນຫົວຂໍ້: “ເຊື່ອມສານການຮ່ວມມືລັດຖະສະພາໃນການນຳໃຊ້ລະບົບດີຈີຕອລຢ່າງເທົ່າທຽມກັນເພື່ອກ້າວສູ່ປະຊາຄົມອາຊຽນ 2025.

   ຫຼັງຈາກພິທີເປີດຢ່າງເປັນທາງການ, ຫົວໜ້າຄະນະຜູ້ແທນຂອງລັດຖະສະພາແຕ່ລະປະເທດສະມາຊິກໄອປາໄດ້ຜັດປ່ຽນກັນຂຶ້ນກ່າວປາໄສຕໍ່ກອງປະຊຸມຕາມລຳດັບ ຊຶ່ງໃນໂອກາດນີ້ ທ່ານ ໄຊ ສົມພອນ ພົມວິຫານ ໄດ້ກ່າວປາໄສຕໍ່ກອງປະຊຸມຄົບຄະນະວາລະທີ 1 ໂດຍທ່ານ ໄດ້ຕີລາຄາສູງ ແລະ ສະໜັບສະໜູນຕໍ່ຄຳຂວັນຂອງກອງປະຊຸມໃຫຍ່ໄອປາຄັ້ງນີ້ມີຄວາມໝາຍ ແລະຄວາມສຳຄັນຫຼາຍຊຶ່ງຈະເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນແມ່ບົດດີຈີ ຕອລອາຊຽນ 2025 ແລະແຜນປະຕິບັດງານອາຊຽນດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ 2016-2025. ພ້ອມກັນນີ້, ທ່ານຍັງໄດ້ຕີລະຄາສະພາບການໃນພາກພື້ນກໍ່ຄືໃນທົ່ວໂລກທີ່ພວມສືບຕໍ່ຜັນແປໄປຢ່າງສັບສົນ ແລະປະເຊີນໜ້າກັບສິ່ງທ້າທາຍຫຼາຍຢ່າງເປັນຕົ້ນແມ່ນການແຜ່ລະບາດຂອງພະຍາດໂຄວິດ-19, ໄພພິບັດທໍາມະຊາດ ແລະອື່ນໆຊຶ່ງໄດ້ສົ່ງຜົນກະທົບຢ່າງໜັກໜ່ວງຕໍ່ສຸຂະພາບ, ການພັດທະນາເສດຖະກິດ-ສັງຄົມ, ສະຖຽນລະພາບ ແລະຄວາມໝັ້ນຄົງໃນພາກພື້ນ ແລະໃນໂລກ.

  ທ່ານປະທານສະພາແຫ່ງຊາດແຫ່ງ ສປປ ລາວ ຍັງໄດ້ຮຽກຮ້ອງໃຫ້ລັດຖະສະພາສະມາຊິກໄອປາສືບຕໍ່ຮັດແໜ້ນການຮ່ວມມືໃນການຊຸກຍູ້ສົ່ງເສີມການຄົ້ນຄວ້າ, ການພັດທະນາວິທະຍາສາດ ແລະເຕັກໂນໂລຊີ, ເຊື່ອມສານການຮ່ວມມືລັດຖະສະພາໃນການນຳໃຊ້ ແລະເຂົ້າເຖິງລະບົບດີຈີຕອລຂອງທຸກຊັ້ນຄົນໃນສັງຄົມຢ່າງທົ່ວເຖິງ ແລະເທົ່າທຽມກັນ, ກ້າວສູ່ປະຊາຄົມອາຊຽນ, ສົ່ງເສີມການຮ່ວມມືລະຫວ່າງພາກລັດ ແລະ ເອກະຊົນໃຫ້ມີສ່ວນຮ່ວມໃນວຽກງານດັ່ງກ່າວໃຫ້ຫຼາຍຂຶ້ນພ້ອມທັງຊຸກຍູ້ໃຫ້ລັດຖະບານປະເທດສະມາຊິກອາຊຽນຈັດຕັ້ງຜັນຂະຫຍາຍແຜນແມ່ບົດດ້ານດີຈີຕອລຂອງອາຊຽນ 2025 ແລະແຜນປະຕິບັດງານອາຊຽນດ້ານວິທະຍາສາດເຕັກໂນໂລຊີ ແລະນະວັດຕະກໍາ 2016-2025 ເຂົ້າໃນນະໂຍບາຍ ແລະລະບຽບກົດໝາຍຂອງແຕ່ລະປະເທດສະມາຊິກອາຊຽນໃຫ້ມີຄວາມສອດຄ່ອງກົມກຽວກັນ.

   ກອງປະຊຸມໃຫຍ່ຂອງໄອປາຄັ້ງນີ້ຍັງມີກອງປະຊຸມກຳມາທິການຕ່າງໆ ຂອງໄອປາຄື: ກອງປະຊຸມຄະນະສະມາຊິກລັດຖະສະພາເພດຍິງ, ກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະກຳມາທິການວຽກງານພາຍໃນຂອງໄອປາຈະໄດ້ດຳເນີນຕາມວາລະຂອງກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ, ກອງປະຊຸມຍັງຈະໄດ້ຄົ້ນຄວ້າ, ປຶກສາຫາລື ແລະພິຈາລະນາຮັບຮອງເອົາຮ່າງມະຕິ ຈຳນວນ 28 ສະບັບ.

แชร์